Tẽgẽl 34
Tẽgẽl cĩ Davide cĩ balna ẽbẽl nẽ balna ngĩ adĩman nẽ ẽlẽ cĩnnĩ nguuma cĩ Abimẽlẽĩ kaavu kĩcĩ adak ngaamõnĩ ĩnõõnõ, ĩthõng itingka Abimẽlẽĩ ĩnõõnõ.
1 Kadihithi katĩ na Makayyioit cannĩ dõõkĩthĩ,
alna katĩ dĩhĩthẽnĩtĩ cĩnnẽ dõõkĩthĩ kũtũga cannĩ.
2 Irian katĩ ririwacĩ cannie, nyatarka Makayyioit.
Anyĩk niia eet cĩk apĩrna kĩthĩraritõ, ĩthõng ebelbelita.
3 Kubuluthit naaga Makayyioit kõdõwẽ kĩ aneeta,
kĩdĩhĩthĩt naaga vẽlẽk thar cĩgĩnĩk kõdõwẽ.
4 Kadiimi balna na Makayyioit, ĩthõng ẽdẽca nẽ aneeta.
Õgaha nẽ aneeta tongolintia cannĩ vẽlẽk.
5 Ẽbẽlbẽl eeta cĩk ẽrẽpan ĩnõõnõ, nyatarka elinit,
athii cĩ amũtẽẽ nguumti cĩgĩk ngawanintia.
6 Nyatarka ngĩjũrrakthẽt cannĩ,
kalawa balna na Makayyioit,
ĩthõng ĩthĩrara Makayyioiti aneeta,
ẽẽla balna nẽ aneeta pĩrnanta cannĩ vẽlẽk.
7 Obokci anjĩlõ cĩ Makayyiokto
ĩcĩ eet cĩk ongollie ĩnõõnõ, ĩthõng ẽẽla ĩnõõgõ.
8 Atarit niigia, ĩthõng agayyu ngatĩ abũnnanĩ Makayyioiti.
Agatanni eeti cĩ alugunyi ĩcĩnnĩ.
9 Otongollie Makayyioit, niigia eeta cĩgĩnnẽk cĩk callĩk.
Ayak eeta cĩk ongollie ĩnõõnõ kaal vẽlẽk.
10 Adak koccia boobo maata, ĩthõng athii cĩ tiirti,
ĩthõng thĩ, eeta cĩk ẽrẽppan Makayyioit,
athii cĩ abacĩ kaala cĩk abũnna.
11 Dõõlĩ cĩganĩk ivitia, ĩthõng ĩthĩktangũ aneeta,
kĩĩ katĩ kilimanung agiitia
gõõl cĩ ongolinu Makayyioit.
12 Eeti ĩmma ĩcunung cĩ amĩnan rũgẽt,
ĩthõng abarritek ngatĩ acĩn wathinniok
cĩk meelĩk cĩk abũnna,
13 anycĩk ĩnõõnõ kũthũtĩ ahaat cĩnnĩ gerthetina,
ĩthõng ĩthĩnga õthõõth thoothonniok cĩk ẽẽn võlõng.
14 Ũtũngek nẽ thoothonniok cĩk gerthek,
ĩthõng itican kaal cĩk abũnna.
Idiim nẽ ganõn,
ĩthõng ũthũũtĩ nẽ ganõn jurrung.
15 Ẽbẽk kẽbẽrẽ cĩk Makayyioktak eet cĩk abũnna,
ĩthõng athĩrar kĩĩna cĩgĩnnẽk ulua cĩnĩng.
16 Abũrĩ nguum cĩ Makayyiokto
eet cĩk gerthek,
ẽnyẽẽĩ katĩ nẽ ĩnõõgõ
muwẽẽnta ĩcĩ eetu loota ngato.
17 Avvũ eeta cĩk abũnna elinit,
ĩthõng athĩrar Makayyioiti ĩnõõgõ,
ẽẽla ĩnõõgõ canana cĩnĩng vẽlẽk.
18 Obokci Makayyioiti kĩ eet cĩk aatĩ mothintia,
ĩthõng ẽẽla nẽ eet cĩk ithii muwẽẽnĩtĩ cĩ abũnna tõõ.
19 Ayak koccia eeti cĩ edeemi thõõth pĩrnanẽt cobbi,
ĩthõng thĩ, kẽnnẽ ẽẽla Makayyioiti ĩnõõnõ
thoothiowẽy nĩĩkẽ vẽlẽk.
20 Athũnnĩ Makayyioiti ammẽ cĩgĩnĩk jurrung,
kithii ammẽnĩ codoi cĩ aduuli.
21 Aruk katĩ gerthetini eet cĩk gerthek,
ĩthõng uuki katĩ eeta cĩk aaburneei eet cĩk abũnna.
22 Ẽẽla Makayyioiti ticcianniok cĩgĩnĩk,
athii katĩ eeta cĩk alugunyi ĩcĩnnĩ cĩ uuki.