Tẽgẽl 33
1 Ebelliothĩk Makayyioit talintia
niigia eeta cĩk edeemicu thõõth,
nyatarka koccia adĩhĩth eeta
cĩk athĩrar thõõth cĩnnĩ ĩnõõnõ.
2 Ĩdĩhĩthĩt niigia Makayyioit,
ebelliek ĩnõõnõ tẽgẽl kidoria,
ĩthõng ebelliewu ĩnõõnõ tegelua,
kidoria cĩ ayak lõõrõnẽt õmmõtõ.
3 Ebelliek ĩnõõnõ tẽgẽl cĩ jõr,
uukit kidõrẽt jurrung,
ĩthõng ebelliowu õrrõt talintia.
4 Nyatarka mũrra thõõth cĩ Makayyiokto,
ĩthõng ẽẽn dĩdĩ, ẽẽn nẽ Et
cĩ athũnnĩ thoothonniok vẽlẽk
cĩk aduwa nẽnẽ.
5 Amĩnan Makayyioiti bũnnathĩt
kĩ thoothonniok cĩk eteddi gõõla ĩcĩ edeemothi.
Abbĩththĩ lõõcĩ mĩnan cĩnnĩ cĩ alna kũdũt.
6 Engenyciay balna tammutiddin thõõtha cĩ Makayyiokto,
kĩ mũnyũny vẽlẽk, engenyciay thõõtha cĩ kũtũk cĩnnĩ.
7 Atĩla balna nẽ maam cĩk bũlũcak vẽlẽk,
ĩthõng ũlũtek ĩnõõgõ ngatĩ aatiyyie wo.
8 Anycĩk niigia looc vẽlẽk kõtõngõlẽ Makayyioit!
Anycĩk eet cĩk loocu vẽlẽk, kubuluthit ĩnõõnõ.
9 Nyatarka õthõõth balna nẽ, ĩthõng utugu kĩcĩ aduwa nẽ wo.
Õthõõth balna nẽnẽ, ĩthõng ikiyyia aavu gii vẽlẽk.
10 Athaan Makayyioiti thoothonniok cĩk atukwuan loociowa,
ĩthõng ẽgẽrẽthan thoothonniok cĩk gerthek cĩk eetu.
11 Ĩthõng thĩ, abĩlĩ muwẽẽnĩtĩ cĩ Makayyiokto kõkõm kũdũt,
abĩlĩ thoothiowa cĩk thĩnĩn cĩnnĩ erkinya kĩ erkinya.
12 Agatanni eeta cĩk looc cĩ ẽẽn Nyekuci cĩnĩng, Makayyioit!
Eet cĩk ẽbẽra Makayyioiti kĩĩ cĩgĩnĩk.
13 Ẽdẽnya Makayyioiti looc loota
tammuatiddina, ĩthõng ĩcĩn eet vẽlẽk.
14 Ẽdẽnya nẽ õlõõ cĩnnĩ
eet vẽlẽk cĩk aatĩ loota ngato,
15 ĩnõõnõ cĩ ẽngẽnyca thinneti cĩgĩk vẽlẽk,
ĩthõng aga thoothonniok cĩk atican nẽẽgẽ vẽlẽk.
16 Athii nyĩcẽkẽrĩ cĩk meelĩk cĩ ẽẽla alaan cĩnĩng,
kõdẽ athii cĩ ẽẽla dootiti cĩ joro tiirthẽta cĩnnĩ ẽlẽ cĩnnĩ.
17 Athii woccia cĩ ẽẽla nyangõlẽ et ĩmma,
kõdẽ woyyia ngĩ maka tiirthẽtĩ cĩnnẽ õrrõt.
18 Ẽbẽk Makayyioiti eet cĩk ongollie ĩnõõnõ,
eet cĩk aari thinneti cĩgĩk vẽlẽk,
mĩnanintia cĩnnĩ ĩcĩ alna kũdũt,
19 kĩĩ kẽẽla ĩnõõgõ daaĩtha,
ĩthõng ĩthĩnga adaaĩ boobo.
20 Kẽrẽ naaga Makayyioit muwẽẽnta cĩ abũnna,
ẽẽn nẽ elinit cĩnac, ĩthõng ĩthĩ kilib cĩnac.
21 Ẽbẽlbẽl thinneti cĩgaac, nyatarka ĩnõõnõ,
nyatarka kaari naaga thinneti cĩgaac
thaarĩy cĩgĩnĩk ĩcĩk callĩk.
22 Makayyioit, anyĩk mĩnan cunni cĩ alna kũdũt,
kaavu kĩ ageeta, kĩcĩ kaarĩca naaga
muwẽẽnĩt cĩnang cĩ abũnna kĩ aniitia.