Tẽgẽl 32
Tẽgẽl cĩ Davide.
1 Agatanẽ eeti cĩ ũtũngtothĩk
thoothonniowa cĩgĩnnẽk cĩk gerthek,
eeti cĩ upucanẽ gerthetini cĩnnẽ.
2 Agatanẽ eeti cĩ ũtũngek Makayyioiti
gerthetin cĩnnĩ,
et cĩ athii cĩ ayak ririwacĩ cĩnnẽ võlõng.
3 Ma balna ma ngĩ kaburi na
ngatĩ kaduwanẽ gerthetin cannĩ,
ivitia eceretit ammẽ cĩganniek,
ĩthõng kabalaci waath tub.
4 Nyatarka baalin kĩ waathĩn
etedĩca niia aneeta thõõth.
Ĩthõng balna ithii aneeta tiirthẽtĩ kutugu
kĩ aburthẽtĩ cĩ attienõ.
5 Ngaatĩ kaduwaci na aniitia gerthetin cannĩ,
ĩthõng athii cĩ kamuti gerthetin cannĩ buu.
Kathĩ balna ne, “Kaduwai katĩ na Makayyioit
thoothonniok cĩganĩk cĩk gerthek.”
Ngaatĩ uungnicia niia aneeta gerthetin cannĩ.
6 Ĩthõng thĩna, anyĩk eet vẽlẽk cĩk callĩk kalayyi aniitia
ngaanĩ woccia amudiay niia,
ĩthõng dĩdĩ mĩ ĩtĩnga tõwõnĩ cĩ tiiri,
athii katĩ cĩ atik ĩnõõgõ.
7 Eeni niia ngĩtĩ kalugunyẽnẽ nana.
Ẽlla katĩ niia aneeta pĩrnanta,
ĩthõng arihia tegelua cĩk eliantak thĩnĩna cannĩ.
8 Athĩ Makayyioiti ne, “Katiriththi katĩ na aniitia,
kĩĩ katĩ wõb gõõl cĩ edeemothi.
Kirionnici katĩ na aniitia, ĩthõng kebeei aniitia.
9 Nyĩ ogoonnu kĩ nyangõlẽ, kõdẽ kĩ thigiriecĩ
cĩ athii cĩ ayak muwẽẽnĩt, ĩthõng thĩ, kẽnnẽ
agam ĩnõõnõ looronĩ kĩ thiihit cĩ dĩcĩ kũtũk cĩnnĩ,
kõdẽ athii katĩ cĩ aku ĩcunni.”
10 Maka hecinti cĩ eet cĩk gerthek,
ĩthõng thĩ, kẽnnẽ alna mĩnanĩ cĩ Makayyiokto kũdũt,
ẽbẽk mĩnanĩ cĩnnẽ et cĩ aari thĩnĩn cĩnnĩ ĩcĩnnĩ.
11 Ebelbelit, ĩthõng iyiakantu, nyatarka Makayyioit,
niigia eeta cĩk abũnnanu, ebelliõy niigia
eeta cĩk võõrĩk thinneti cuguk!