Tẽgẽl 31
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Makayyioit, kalugunyie na ngatĩ aavẽ niinia,
nyĩ anya kagama ngawani kũdũt,
bũnnatina cunni, õgaha aneeta kaavu jurrung.
2 Thĩrara aneeta, ĩthõng ikiyyia ẽẽla aneeta tamanoko,
ĩthĩ thiir cannĩ cĩ kalugunyẽnẽ nana,
ĩthõng ĩthĩ ngĩtĩ alũwẽ kõkõm, cĩ ẽẽlana aneeta.
3 Nyatarka eeni niia Thiir cannĩ cĩ kalugunyẽnẽ,
tĩwa, ĩthõng ẽbẽha aneeta, nyatarka thar cugunik.
4 Õgaha niia aneeta nyeritiewa ĩcĩ ẽdẽtta aneeta wo,
nyatarka kalugunyeni na aniitia.
5 Kaari na ririwac cannĩ athĩnẽy cugunik,
Makayyioit, Nyekuc cĩ thõõth cĩ ẽẽn dĩdĩ, ẽẽlawanĩ.
6 Kakanna na eet cĩk ala nyekucnya cĩk ẽẽn võlõng.
Kaari na thĩnĩn cannĩ ĩcĩ Makayyiokto dõ.
7 Katali katĩ na, ĩthõng kẽbẽlbẽla, nyatarka mĩnan cunni,
nyatarka balna icinu niia canan cannĩ,
ĩthõng agawu wuciith cĩ ririwac cannĩ.
8 Alaami balna niia mĩrõk cĩganĩk kithiic cĩ agamia aneeta,
õgaha niia aneeta kaavu jurrung ngatĩ abũnna.
9 Makayyioit, tamatĩha aneeta, nyatarka kaavẽ pĩrnanta,
ipiryia kẽbẽrẽ cĩganniek, nyatarka ulua,
ĩpĩra aneeta ẽlẽ cannie kĩ ririwac õrrõt kũdũt ulua.
10 Uruwa cẽrẽtõnĩ aneeta,
ĩthõng abĩththĩ erkinya cĩganĩk mothinti,
ẽdẽcak pĩrnanẽtĩ tiirthẽt cannĩ,
kalalit ammẽ cĩganniek kaganoko.
11 Adaacia mĩrõwa cĩganniek vẽlẽk,
atararyia aneeta eeta cĩk kaarõna,
kõdẽ gõõnõga cĩganniek buu,
cĩk acĩnna aneeta gõõla ivirit ĩcannĩ.
12 Erekteha balna nẽẽgẽ aneeta kaavu
kĩcĩ balna kadaaha vẽlẽk.
Kikiyyia kaavu kĩ ijjia cĩ ilibie kithii.
13 Kĩthĩrara na eet cĩk meelĩk
cĩk ayahaca aneeta kirirẽn.
Ilibaha tongolinti goolliowẽy vẽlẽk.
Atukwuan mĩrõwa cĩganniek,
adiim ngĩ arukca aneeta.
14 Ĩthõng thĩ kẽnnẽ, Makayyioit,
kaari na thĩnĩn cannĩ kĩ aniitia
kathĩ ne, “Eeni niia Nyekuc cannĩ.”
15 Aavĩ rũgẽtĩ cannie athĩnẽy cugunik,
ẽẽla aneeta athĩnẽy cĩk mĩrõk cĩganĩk,
kĩ ĩcĩk eet cĩk alĩkca aneeta.
16 Anyĩk niia nguum cunni kũtũkũl ticciannioit cunni,
ẽẽla aneeta mĩnanintia cunni ĩcĩ alna kũdũt.
17 Makayyioit, nyĩ anya kagama ngawani,
nyatarka kaluecci na aniitia,
ĩthõng thĩ, anyĩk ngawani eet cĩk gerthek,
ĩthõng anyiwu ĩnõõgõ kataguthõ tiv loowatõ.
18 Anyĩk volongnyiak kĩjaktõy tiv,
nyatarka ẽngẽrẽn, ĩthõng eteditõ eet
cĩk abũnna cĩk athũnnĩ thõõth cunni.
19 Ẽẽn bũnnathĩtĩ cunnie cobbi kuu,
cĩ itiangeei niia eet cĩk ongolini aniitia
cĩ anyi niia eet cĩk alugunyeni aniitia,
kĩĩ katĩ kĩcĩnĩt eeta gwuak.
20 Alugunyi niia ĩnõõgõ nguuma cunni
ngatĩ abũnna, kĩĩtõ rẽẽntĩ kĩ eet
cĩk atukwuan thoothonniok cĩk gerthek,
ngatĩ aavẽ niinia, ẽẽla ĩnõõgõ
kithii cĩ eyewothi eeta ĩnõõgõ kirirẽn.
21 Kadihithi na Makayyioit, nyatarka
eyeleea mĩnan cĩnnĩ cĩ abũnna õrrõt,
kaavẽ balna õlõõ ĩcĩ gaalawu cobbi cĩ aliheei jore.
22 Kongollie balna na, ĩthõng kutuluwihi aniitia kĩthĩ ne,
“Kitingkawẽ wõnõ na nguuma cunni thõng.”
Ĩthõng thĩ, kẽnnẽ balna ikiyyia ithiwu
ulua cannĩ cĩ tamatintio, balna ngĩ
kavvuyyi na aniitia ijjia ẽẽlanĩ.
23 Ĩmĩnanit Makayyioit, niigia eeta cĩgĩnnẽk cĩk callĩk!
Athũnnĩ Makayyioiti eet cĩk ẽlẽmĩ thõõth cĩnnĩ,
ĩthõng thĩ, kẽnnẽ uuk eet cĩk ẽngẽrẽn õrrõt.
24 Ĩĩtõ tiirti, anycĩk thinneti cuguk kokomit,
eeta vẽlẽk cĩk ayakcu
muwẽẽnĩt cĩ abũnna ĩcĩ Makayyiokto.