Tẽgẽl 30
Tẽgẽl cĩ Davide cĩ agatanini Ciith cĩ Nyekuco kaanyĩwothĩk Nyekuc, kĩĩ katĩ kalayyiõĩ eeta.
1 Makayyioit, kadihithi na aniitia,
nyatarka ẽẽlawa balna niia aneeta kithii cĩ kadaai,
ĩthõng ĩthĩnga balna anyi niia
mĩrõk cĩganĩk katararyia aneeta.
2 Makayyioit Nyekuc cannĩ,
kavvuyyi balna na aniitia ẽẽlanĩ,
ĩthõng anya kũbũna.
3 Makayyioit, athunnia balna niia
aneeta looca ĩcĩ daakciawu,
ẽẽlawa balna niia aneeta loowa.
4 Ebelit niigia eeta cĩgĩnnẽk cĩk callĩk, Makayyioit,
ubuluthit thar cĩgĩnĩk cĩk callĩk.
5 Athii nẽ cĩ avaracĩth kuumuc,
ĩthõng thĩ, alna bũnnathĩtĩ cĩnnẽ kũdũt,
aavĩ koccia ulua baalin codoi doo,
ĩthõng thĩ kẽnnẽ, ma ngerenniet, ikiyyia talinti.
6 Ma balna ngĩ kaavu jurrung, kikiyyia kĩthĩ ne,
“Athii katĩ eeti cĩ omonnia tõõ.”
7 Makayyioit, ma balna ngĩ ebelbeleha niia aneeta,
ikiyyia anya kĩthĩ tiir,
ĩthõng thĩ kẽnnẽ, balna ulugunyu niia nguum cunni,
ĩthõng kikiyyia kõmõthẽ nana.
8 Makayyioit, kavvuyyi balna na aniitia,
kaluei na Makayyioit katamatĩhanĩ.
9 Nyia cĩ woccia arũba niia katĩ ngĩ kadaaha nana,
wueeta cannĩ cĩ kũũwẽ na loowatõ?
Adihiththi katĩ aniitia tuduwacĩ?
Aduwa thẽk katĩ nẽ athĩ ne, thũũtĩ niia thõõth cunni?
10 Makayyioit, thĩrara, ĩthõng atamatĩhanĩ.
Makayyioit, ĩthĩ Ellioit cannĩ.
11 Utuwuwu balna niia ulua cannĩ kĩĩ rũgũmõn cĩ talintio,
ũpũrũcaha balna niia ceremua cĩganĩk cĩk uluanak,
ĩthõng itihimeha cĩk talintiak,
12 kĩĩ woccia katĩ kebelei thĩnĩn cannie
aniitia tegelua, kithii cĩ ĩjakci.
Makayyioit Nyekuc cannĩ,
kennecci katĩ na aniitia kũdũt ne, ibalallẽ.