Tẽgẽl 29
Tẽgẽl cĩ Davide.
1 Otongollie Makayyioit niigia anjĩlẽta cĩk tammutiddinak,
otongollie Makayyioit, nyatarka bulẽnĩt kĩ tiirthẽt cĩnnĩ.
2 Otongollie Makayyioit, nyatarka bulẽnĩt cĩ thar cĩgĩnĩk,
alaac Makayyioit bulẽnta cĩ callitin cĩnnĩ.
3 Aavĩ moloowĩ cĩ Makayyiokto maamĩy tiddina,
ẽgẽrẽny Nyekuci cĩ bulẽnto kĩ tammu cĩ icciayyi,
ẽgẽrẽny Makayyioiti bũlũca maamĩy ĩcĩk meelĩk tiddina.
4 Tiir moloowĩ cĩ Makayyiokto,
maka moloowĩ cĩ Makayyiokto.
5 Aduul moloowĩ cĩ Makayyiokto kẽẽn cĩk obbitik.
Aduul Makayyioiti kẽẽn cĩk obbitik cĩk Lẽbanõnĩ kithiic.
6 Anyĩk nẽ thiir cĩ Lẽbanõnĩ kiyiakan kĩ mooleta,
ĩthõng anyĩk thiir cĩ Hermonia kiyiakan kĩ kĩthĩwanĩ cĩ dĩcĩ.
7 Icciayyi moloowĩ cĩ Makayyiokto
badia cĩ tammuo.
8 Anyi moloowĩ cĩ Makayyiokto baath cĩ õdõõĩ kak kõtõmõ.
Õmmõnnĩ Makayyioiti baath cĩ Kadẽthĩ.
9 Õmõnnĩ moloowĩ cĩ Makayyiokto kẽẽn cĩk obbitik,
ĩthõng uturur ballõk cĩk keenu bõõnatõ.
Ĩthõng Ciitha cĩnnĩ, ẽgẽrẽny eeta vẽlẽk athĩ ne, “Bulẽnĩt!”
10 Agam Makayyioiti maam cĩk tõwõnak cĩk meelĩk,
ẽẽn Makayyioiti Alaan kũdũt.
11 Anyĩk Makayyioiti tiirthẽt eet cĩgĩnĩk,
agatan Makayyioiti eet cĩgĩnĩk ganõna.