Tẽgẽl 28
Tẽgẽl cĩ Davide.
1 Makayyioit, kavvuyyi na aniitia,
eeni niia thiir cannĩ cĩ kalugunyẽnẽ nana.
Nyĩ aburi tũvũwẽnĩt cannĩ.
Katĩ ngĩ ĩjakcie niinia,
kaavẽ katĩ na kĩ eeta cĩk adaaitõ.
2 Thĩk ulua cannĩ cĩ tamatintio,
kĩcĩ kavvuyyi na aniitia ijjia ẽẽlanĩ,
kĩcĩ kodongeei na athĩn cĩganĩk
Ngĩtĩ Angiranni cĩ Dĩhĩmĩ Õrrõt cunni.
3 Nyĩ agurutta kõdõwẽ kĩ eet cĩk gerthek,
cĩk adĩman gerthetin,
cĩk õthõõthõy jurrung kĩ eet cĩk abakanõy,
ĩthõng kẽnnẽ ayait gerthetin thinnetinẽy cĩgĩk.
4 Uuk niia ĩnõõgõ, nyatarka tiicanẽ cĩgĩk
kĩ thoothonniok cĩgĩk cĩk gerthek wo,
uuk ĩnõõgõ, nyatarka tiicanẽ
cĩk balna atican nẽẽgẽ,
ĩthõng etediwu ĩnõõgõ thõõth,
nyatarka tiicanẽ cĩgĩk.
5 Kĩcĩ athii cĩ alnai nẽẽgẽ tiicanẽ cĩk Makayyioktak
kĩ tiicanẽ cĩk atican balna nẽ athĩnẽy ĩcĩgĩnĩk,
atanyĩ katĩ nẽ ĩnõõgõ looc,
ĩthõng ĩthĩnga õdõng ĩnõõgõ naboo.
6 Kaanyi na Makayyioit kĩdĩhĩthẽ,
nyatarka ĩthĩrar nẽ ulua cannĩ cĩ tamatintio.
7 Ẽẽn Makayyioiti tiirthẽt kĩ kilib cannĩ.
Kaari na thĩnĩn cannĩ kĩ ĩnõõnõ,
ĩthõng ẽẽla nẽ aneeta.
Õngõth thĩnĩn cannie talintia,
ĩthõng kebelei katĩ ĩnõõnõ tẽgẽl
cĩ kẽnnẽccẽ ne, ibalallẽ.
8 Ẽẽn Makayyioiti tiirthẽt cĩ eet cĩgĩnĩk.
Ẽẽn nẽ ngĩtĩ alũwẽ kõkõm cĩ elianto
cĩ alaan wũ balna ẽbẽra nẽnẽ.
9 Ẽẽla niia eet cugunik, ĩthõng agatanu
ĩnõõgõ cĩk ẽẽn ragithiok cugunik.
Ĩthĩ tũwayyioit cĩnĩng,
ĩthõng ũthũũtẽ ĩnõõgõ kũdũt.