Tẽgẽl 26
Tẽgẽl cĩ Davide.
1 Makayyioit, ĩthĩ ne, kamiri nana,
nyatarka kabaaha balna na rũgẽta
cĩ athii thoothonniowa cĩk gerthek tõ.
Kaarĩha balna na thĩnĩn cannĩ ĩcĩ Makayyiokto,
ĩthõng athii cĩ kakidani.
2 Makayyioit, tĩmananĩ,
diim thĩnĩn cannĩ kĩ õõ cannĩ,
3 nyatarka kagga na ngatĩ amĩnanna niia aneeta dõõkĩthĩ,
ĩthõng kõwõba thõõth cunni cĩ ẽẽn dĩdĩ kũdũt.
4 Athii cĩ kiiriokca naaga kĩ eet cĩk ĩgõõl eeta,
kõdẽ karũmẽna kĩ eet cĩk ẽẽn volongnyiak.
5 Kaaburneei na meelitin cĩ eet cĩk gerthek,
ĩthõng kũtũbũra ngatĩ karũmenia kĩ eet cĩk gerthek.
6 Makayyioit, kuunyi na athĩn cĩganĩk, kĩĩ katĩ kẽyẽla ngatĩ kamĩrnẽ nana,
ĩthõng kõtõõwa ngatunni, ngatĩ todongintio.
7 Kaduwa moloowa cobbi dĩhĩthẽnĩt cunni,
ĩthõng kuduwa tiicanẽ vẽlẽk cĩk anaat eeta
cĩk ĩdĩmanu niinia.
8 Makayyioit, kamĩnani na Ciith cĩ aavẽ niinia,
kamĩnani ngĩtĩ aavẽ bulẽnĩtĩ cunnie.
9 Nyĩ arukca aneeta kõdõwẽ kĩ gẽrẽthanniok,
nyĩ õkõyyẽ rũgẽt cannĩ kõdõwẽ kĩ eet cĩk aruk eeta,
10 ĩnõõgõ cĩk ahad tukwuan cĩ gerthe,
ĩthõng abbĩththĩ athĩn cĩgĩk cĩk athio taabinieti.
11 Ĩthõng thĩ kẽnnẽ, kayai na rũgẽt cĩ athii gerthetini tõõ.
Ẽẽlanĩ, ĩthõng atamatĩhanĩ.
12 Kaathi na ngĩtĩ abũnna cĩ athii cĩ ayak tõwõdõm.
Kadihithi katĩ na Makayyioit meelitina cobbi.