Tẽgẽl 25
Tẽgẽl cĩ Davide.
1 Makayyioit, kalayyi na aniitia thĩnĩna cannĩ,
2 Nyekuc cannĩ, kaari na thĩnĩn cannĩ kĩ aniitia.
Nyĩ thẽk anya kagama ngawani,
kõdẽ anyi mĩrõk cĩganĩk kijiaryanĩ.
3 Athii eeti cĩ aari thĩnĩn kĩ aniitia,
woccia cĩ angawanĩ,
ĩthõng thĩ, angawan katĩ eeta
cĩk ovolongi aniitia.
4 Makayyioit, tĩrĩtheha aneeta goolliok cugunik,
limaneha aneeta thoothonniok cugunik.
5 Yeleha aneeta kõwõb thõõth cunni
cĩ ẽẽn dĩdĩ, ĩthõng illimana,
nyatarka eeni niia Nyekuc Ellioit cannĩ,
ĩthõng aavĩ muwẽẽnĩtĩ cannie cĩ abũnna
kĩ aniitia waathĩn vẽlẽk.
6 Makayyioit, hada tamati kĩ mĩnan cunni cobbi,
wũ balna ẽyẽla niia baa lõõla.
7 Makayyioit, nyĩ ahada gerthetin wũnanĩ
baa ngaanĩ keeni dĩca,
kĩ goolliok cĩk kaburni aniitia,
mĩnanintia cunni hadaha aneeta,
nyatarka bũnnathĩt cunni.
8 Abũnna Makayyioiti, ĩthõng mũrra thõõth cĩnnẽ.
Eyeleei nẽ gẽrẽthanniok kowobit goolliok cĩgĩnĩk.
9 Eyeleei nẽ eet cĩk athii cĩ ẽngẽrẽn,
kowobit thõõth cĩ edeemothi,
ĩthõng ilimanek ĩnõõgõ gõõl cĩnnĩ.
10 Ẽẽn gõõl cĩ Makayyiokto mĩnan
kĩ ngatĩ athũnnĩ thõõth cĩnnĩ,
kĩ eet cĩk athũnnĩ ngẽrẽmngẽrẽm cĩnnĩ.
11 Makayyioit, nyatarka thar cugunik,
tũngek gerthetin cannĩ, kõdẽ woyyia
ngĩ maka õrrõt buu nuun.
12 Ngẽnẽ woccia thẽk eeti cĩ ongollie Makayyioit?
Eyeleei katĩ Makayyioiti ĩnõõnõ
gõõl cĩ ẽbẽranĩ nẽ ĩnõõnõ.
13 Amũda katĩ nẽ kaal cĩk abũnna rũgẽta cĩnnĩ,
ĩthõng abarĩcĩt doolia cĩgĩnnẽk looc.
14 Ẽẽn Makayyioiti gõõnĩ eet cĩk ongollie ĩnõõnõ,
ĩthõng ilimanek ĩnõõgõ kagaacõ ngẽrẽmngẽrẽm cĩnnĩ.
15 Kakannẽ na Makayyioit dõõkĩthĩ kẽbẽrẽ cĩganĩk,
nyatarka ĩnõõnõ cĩ katĩ õõga thoo cĩganĩk nyeritiewa.
16 Muuda aneeta, ĩthõng atamatĩhanĩ,
nyatarka uuwa lõõcĩ, ĩthõng kapĩrna.
17 Ĩthĩ maka pĩrnanẽtĩ thĩnĩna cannĩ õrrõt,
õgaha niia aneeta thoothiowẽy cĩk gerthek wo.
18 Cĩn mothinit kĩ canan cannĩ,
ĩthõng ẽnyẽhẽ thoothonniok cĩganĩk cĩk gerthek vẽlẽk.
19 Cĩn meelitin cĩ mĩrõk cĩganĩk,
ĩthõng icinu gõõl cĩ akanania nẽẽgẽ aneeta õrrõt wo.
20 Thũũtĩ rũgẽt cannĩ, ĩthõng ẽẽlawanĩ,
nyĩ anya kangawanũ,
nyatarka kalugunyie na ngatĩ aavẽ niia.
21 Anyĩk niia woccia bũnnathĩt
kĩ thõõth cĩ ẽẽn dĩdĩ kẽbẽha aneeta,
nyatarka kaari muwẽẽnĩt cannĩ cĩ abũnna kĩ aniitia.
22 Makayyioit, ẽẽla baai eet cĩk Ĩthraĩlĩ
pĩrnanta ĩcĩnĩng vẽlẽk!