Tẽgẽl 24
Tẽgẽl cĩ Davide.
1 Ẽẽn Makayyioiti baatĩ loocu kĩ kaal vẽlẽk cĩk aatĩ loota,
looc kĩ eet vẽlẽk cĩk abaak ĩcĩnnĩ.
2 Ĩnõõnõ balna cĩ engenyceei looc bulucuanĩy,
engenyceei nẽ ĩnõõnõ kõkõm maamĩy.
3 Ngẽnẽ woccia cĩ õtõd thiir cĩ Makayyiokto?
Ngẽnẽ woccia cĩ abĩlĩ ngatĩnnĩ ngatĩ angiranni?
4 Et cĩ callẽ athĩna, ĩthõng ĩthĩ calla thĩnĩn,
cĩ athii cĩ ala thĩnĩn cĩnnẽ nyekuc cĩ athii cĩ ẽẽn dĩdĩ,
kõdẽ abũtan thõõtha ĩcĩ ẽẽn võlõng.
5 Arũba katĩ nẽ gatan ĩcĩ Makayyiokto,
ĩthõng ẽtẽd katĩ Nyekuci Ellioiti cĩnnẽ thõõth cĩnnĩ jurrung.
6 Eet cĩk õgõõn ketee cĩk ẽrẽppanni aniitia,
ĩthõng alayyi aniitia, Nyekuc cĩ Yokobo.
7 Niigia araantiowa cĩk obbitik, oyyi niigia,
oyyi niigia araantiowa cĩk baa lõõla,
kĩĩ katĩ koccia kẽtẽẽha Alaanĩ cĩ bulẽnto ĩcĩtõ.
8 Ngẽnẽ cĩ ẽẽn Alaan cĩ bulẽnto wo?
Makayyioit cĩ tiiri, ĩthõng ijiar vẽlẽk,
Makayyioit cĩ tiiri jora.
9 Odongit ooti cuguk jiena, niigia araantiowa cĩk obbitik,
odongit ĩnõõgõ jiena, niigia araantiowa cĩk baa lõõla,
kĩĩ katĩ koccia kẽtẽẽha Alaanĩ cĩ bulẽnto ĩcĩtõ.
10 Ngẽnẽ cĩ ẽẽn Alaan cĩ bulẽnto wo?
Makayyioit cĩ Ijiar vẽlẽk,
cĩ ẽẽn Alaan cĩ bulẽnto wo.