Tẽgẽl 22
Ẽẽn tẽgẽl cĩ Davide coo, cĩ makayyioit cĩ tegeluanu. Ebellie balna moloowa cĩ tẽgẽl cĩ athĩ ne, “Mẽgẽr cĩ ngayyi cĩ ngerethetino.”
1 Nyekuc cannĩ, Nyekuc cannĩ, nyia tũngẽẽa wo?
Nyia ĩthĩ rẽẽn ngatĩ ẽẽlania aneeta,
thoothiowẽy cĩk kabalacẽ na wo?
2 Nyekuc cannĩ, kalayyi na aniitia waathĩna,
ĩthõng thĩ kẽnnẽ, athii niia cĩ ẽdẽcca aneeta.
Kalayyi na aniitia baalina, ĩthõng athii cĩ koongi.
3 Ĩthõng ngaanĩ aavẽ niia taabawa, eeni Et cĩ callĩ.
Adihiththi aniitia eeta cĩk Ĩthraĩlĩ.
4 Aari balna õõ baatĩ baatĩ baangietĩ cĩgaak
thinneti cĩgĩk kĩ aniitia,
ĩthõng ẽẽla niia ĩnõõgõ.
5 Alueci balna nẽẽgẽ aniitia,
ĩthõng eliay nẽẽgẽ,
aari balna nẽẽgẽ thinneti cĩgĩk kĩ aniitia,
ĩthõng ũthũũtẽ ĩnõõgõ athii
cĩ anyi ĩnõõgõ kangawanit.
6 Ĩthõng thĩ, keeni na kulutianit kaganoko,
athii cĩ keeni et,
ĩthõng aaburyieha balna eeta aneeta.
7 Arannia eeta cĩk acĩnna aneeta vẽlẽk,
adaacca aneeta, ĩthõng ĩlĩnglĩnganit ooti cĩgĩk ĩĩtõ ne,
8 “Aari nẽ thĩnĩn cĩnnĩ Makayyiokta.
Anyĩk Makayyioit kẽẽl ĩnõõnõ,
nyatarka atarnanĩ nẽ ĩnõõnõ.”
9 Ĩthõng thĩ, kẽnnẽ balna ũũkcana niia aneeta
kẽẽnga cĩ yaang cannĩ jurrung,
anya niia aneeta kaarĩk thĩnĩn cannĩ kĩ aniitia,
balna ngaanĩ kõrõktõ na keethit cĩ yaangĩ.
10 Balna thẽk tirrianta, balna ngĩ athunnia niia aneeta.
Ĩĩthĩ balna niia Nyekuc cannĩ balna thẽk tirrianta.
11 Nyĩ eeni niia rẽẽn kĩ aneeta,
nyatarka obokci thõõth cĩ gerthe,
ĩthõng athii eeti cĩ ẽlla aneeta tõõ.
12 Alĩhecca aneeta mĩrõwa kĩ olenya cĩk meelĩk,
olenya cĩk tiirtik cĩk looc cĩ Bathanĩ.
13 Apuuk nẽẽgẽ kutugeti cĩgĩk kĩ maata,
cĩk õrõĩ, ĩthõng adiim adakca aneeta.
14 Ithii aneeta tiirthẽtĩ
kutugu kĩ maama cĩk atduutothi looc.
Aatĩ ammẽ cĩganniek vẽlẽk kĩcĩ apuuciay ẽla cannĩ.
Õbõõwẽ thĩnĩn cannie kaavu kĩ doolianĩ.
15 Ithii aneeta tiirthẽtĩ kaavu kĩ ijjia cĩ ilibie,
ĩthõng odongnothi ahaatĩ cannie dahalit.
Utdukea niia aneeta tuduwaca, kĩĩ katĩ kadaawũ.
16 Ĩlĩha balna aneeta meelitini cĩ eet cĩk gerthek kĩ kũrthĩĩ,
ĩbooritõ nẽẽgẽ athĩn kĩ thoo cĩganĩk.
17 Edenyciay ammẽ cĩganniek vẽlẽk ngatĩvõrĩ.
Ĩcĩnta eeta, ĩthõng atararyianĩ.
18 Engeryiek nẽẽgẽ eleeti ceremua cĩganĩk,
ĩthõng ĩmmĩcĩt lirlir, nyatarka cẽrẽm cannĩ.
19 Ĩthõng thĩ, niia Makayyioiti, nyĩ eeni rẽẽn.
Eeni niia tiirthẽt cannĩ, tõõwa taman ijjia ẽẽla aneeta.
20 Ẽẽlawa aneeta nyetubata cĩ mĩrõk cĩganĩk.
Ẽẽla rũgẽt cannĩ kũrthẽnẽy ĩcĩkkõ.
21 Ẽẽlawa aneeta mĩrõwẽy cĩk aatĩ kĩ maata.
Ẽẽlawa mĩrõwẽy cĩk aatĩ kĩ kĩthĩwanẽta.
22 Kaduwai katĩ na eet cĩganĩk thar cugunik.
Kadihiththi katĩ na aniitia meelitina ĩcĩ lemnyiowu.
23 Ĩdĩhĩthĩt Makayyioit, niigia eeta cĩk ongolinu ĩnõõnõ.
Ubuluthit ĩnõõnõ, niigia doolia cĩk dõõlĩ cĩk Yokobĩ.
Alaac ĩnõõnõ, niigia vẽlẽk doolia cĩk dõõlĩ cĩk Ĩthraĩlĩ.
24 Nyatarka ngaanĩ balna katararĩ nẽ
canan cĩ et cĩ eheccie.
Ngaanĩ kuluguny nẽ nguum cĩnnĩ ĩcĩnnĩ,
ĩthõng thĩ, kẽnnẽ ĩthĩrarẽ ulua cĩnnẽ cĩ elianto.
25 Kadihiththi katĩ na aniitia meelitina cobbi.
Kathũnnẽ katĩ na kõngan cannĩ nguumtẽnẽy ĩcĩk eet cĩk ongolini aniitia.
26 Aduwue katĩ ngĩjũrra, ĩthõng umuddia kaal vẽlẽk cĩk adiim nẽẽgẽ.
Eeta cĩk adiim Makayyioit, adĩhĩth katĩ ĩnõõnõ.
Ĩthõng alna woccia thinneti cĩgĩk kũdũt.
27 Ẽlẽmĩ katĩ eeta cĩk loocu vẽlẽk Makayyioit,
ĩthõng imiiryie kĩ ĩnõõnõ,
ĩthõng katĩ alaacõ korookjiowa cĩk loociowu vẽlẽk Makayyioit,
ĩthõng akattiek ĩnõõnõ kuthungti.
28 Ẽẽn Makayyioiti Alaan,
ĩthõng agam nẽ loociok.
29 Adak katĩ balliowa cĩk loocu peyian, ĩthõng alaacõ ĩnõõnõ,
akaneei katĩ eeta cĩk katĩ adaaĩ ĩnõõnõ kuthungti.
30 Aticanothi katĩ ĩnõõnõ doolia cĩk katĩ ngaanĩ avvu erkinyiay.
Aduwaai katĩ nẽẽgẽ eet cĩk ngaanĩ katĩ avvu
thõõth cĩ Makayyiokto.
31 Aduwaai katĩ nẽẽgẽ bũnnathĩt cĩnnĩ
eet cĩk ngaanĩ kittiryiay, nyatarka balna
ĩdĩman Makayyioiti thoothonniok cĩkkõ.