Tẽgẽl 21
Ẽẽn tẽgẽl cĩ Davide coo, cĩ makayyioit cĩ tegeluanu.
1 Makayyioit, ẽbẽlbẽl alaanĩ tiirthẽta cunni.
Ẽẽn bẽlbẽllõnĩ cĩnnẽ kuu, nyatarka elinit cĩ anyi niia!
2 Anyiwu balna niia ĩnõõnõ thõõth cĩ adiim thĩnĩn cĩnnẽ,
ĩthõng athii cĩ aburi thõõth cĩ ajin nẽnẽ.
3 Anyi balna niia ĩnõõnõ gatan cobbi,
ĩthõng ũpũrũcẽhẽ niia ĩnõõnõ lũlũwoc cĩ ẽẽn daab cĩ callĩ, õõwa cĩnnĩ.
4 Ajinni balna nẽ aniitia thũũtĩ rũgẽt cĩnnĩ,
ngaatĩ anyĩcẽ ĩnõõnõ rũgẽt cĩ alna kuumuc.
5 Maka bulẽnĩtĩ cĩnnẽ, nyatarka jiariniet wũ balna anyiwu niia ĩnõõnõ,
anyiwu niia ĩnõõnõ bulẽnĩt kĩ makathĩt.
6 Ĩthõng dĩdĩ, anyiwu balna niia ĩnõõnõ gatan cĩ alna kũdũt,
ĩthõng anyiwu ĩnõõnõ kẽbẽlbẽl talintia cunni ngatĩ aavẽ niia.
7 Aari alaanĩ thĩnĩn cĩnnĩ ĩcĩ Makayyiokto,
nyatarka mĩnan cĩ Makayyioit cĩ Ijiar vẽlẽk, cĩ athii cĩ edeciay,
athii katĩ cĩ õmmõnnĩ eeti ĩmma alaan.
8 Agam katĩ athiiti cunnie mĩrõk cugunik,
agam katĩ athiiti cunnie cĩ athio eet cĩk aaburnecci aniitia.
9 Ma ngĩ uppuaniay niia,
anyi katĩ ĩnõõgõ kaavutõ kĩ nyekitetĩ cĩ aaburi patdahac.
Makayyioit, ẽdẽcaai katĩ niia ĩnõõgõ varacintia cunni,
ĩthõng atuuthi katĩ niia ĩnõõnõ guyyia cunni.
10 Agĩĩra katĩ niia dõõlĩ cĩgĩk loota ngato,
athii katĩ doolia cĩgĩk tõõ.
11 Kõdẽ woyyia ngĩ atukwuan nẽẽgẽ thoothonniok
cĩk gerthek kĩ aniitia,
athii katĩ cĩ adĩmanni thoothiowa cĩgĩk
cĩk gerthek wo,
12 nyatarka ũũkcĩ katĩ nẽẽgẽ, ĩthõng ivirita,
katĩ ngĩ acĩn nyarangĩt cugunik ngatĩ ũũvĩ ĩnõõgõ.
13 Makayyioit, kadihiththi naaga aniitia,
nyatarka makathĩt cunni cobbi.
Kẽbẽlla katĩ tẽgẽl,
ĩthõng kidihithia tiirthẽt cunni cobbi õrrõt.