Tẽgẽl 19
Ẽẽn tẽgẽl cĩ Davide coo, cĩ makayyioit cĩ tegeluanu.
1 Õthõõth tammutiddin bulẽnĩt cĩ Nyekuco jurrung!
Ẽyẽla nẽ tiicanẽ cĩk athĩn cĩgĩnĩk!
2 Uduwak tammutiddin waathĩn dõõkĩthĩ bulẽnĩt cĩ Nyekuco,
ĩthõng uduwak nẽ baalin dõõkĩthĩ gawinit cĩnnĩ.
3 Athii thõõth cĩ othooththi,
cĩ athii molooĩ cĩ tammutiddino cĩ athĩrar eeta tõ.
4 Ĩthõng thĩ, nẽnnẽ õkkõ moloowĩ cĩnĩng ĩcĩ looc vẽlẽk,
ĩthõng ĩthĩraritõ eeta cĩk looc vẽlẽk molook cĩnĩng.
Engenyceei balna Nyekuci kõr kõrõõk tammuatiddina,
5 ẽẽkta kõr ngatĩvõrĩ ngerethietĩna kĩ nyẽtẽranti õlõõ cĩnnĩ,
kĩ eeti cĩ tiiri cĩ ẽbẽlbẽl ngatĩ aviri thõng.
6 Ithiananĩ kõr ĩcĩ alibanĩ kõrra,
ĩthõng ũũk okolothĩk ĩcĩ okolothĩcẽ,
ĩthõng athii gii cĩ alugunyi aburthẽta cĩnnĩ tõõ.
7 Abũnna goolliowa cĩk Makayyioktak õrrõt kũdũt,
anyi nẽ ririwac kũbũna katal.
Aari eeta thinneti cĩgĩk tĩrĩthẽntiowẽy ĩcĩk Makayyiokto,
aanyĩk nẽ gẽẽnyĩth eet cĩk athii cĩ ẽgẽẽnyĩ.
8 Edeemothi limanĩ cĩ Makayyiokto õrrõt,
anyi thĩnĩn kẽbẽlbẽl.
Callẽ tĩrĩthẽntiowa cĩk Makayyioktak,
anyet nẽẽgẽ ageeta kĩcĩntẽ jurrung.
9 Calla tongolinti cĩ Makayyiokto,
alna nẽ kũdũt.
Ẽtẽd Makayyioiti thoothonniok
gõõla ĩcĩ edeemothi, cĩ ẽẽn dĩdĩ.
10 Ijiar nẽẽgẽ daab cĩ callĩ,
kõdẽ ijiar nẽẽgẽ daab cobbi õrrõt,
ẽmmẽdẽ nẽẽgẽ õrrõt ijiar lotec cĩ callĩ,
kõdẽ lotecĩ cĩ kwuanu õrrõt.
11 Atĩrthẽ ticciannioiti cunnie ĩcĩnĩng,
eeti cĩ athũnnĩ ĩnõõgõ, arũba anyinit cobbi.
12 Athii eeti cĩ acĩn gerthetin cĩnnĩ mĩn tõõ.
Tũngẽẽa niia aneeta gerthetina cĩ athii cĩ edenyiay!
13 Bilia niia aneeta thoothonniowẽy ĩcĩk gerthek cĩk kadĩmani na kiyacaneei,
nyĩ anyi ĩnõõgõ kagamta aneeta.
Ĩthõng kĩmĩra katĩ na kũdũt,
athii katĩ gerthetini cobbi õrrõt ĩcannĩ tõõ.
14 Anyĩk thoothonniok cĩk kũtũk cannĩ kĩ muwẽẽnĩt
cĩ thĩnĩn cannĩ, kaanyci bẽlbẽllũ,
Makayyioit, eeni niia thiir cannĩ,
ĩthõng eeni Ellioit cannĩ.