Tẽgẽl 18
Tẽgẽl cĩ Davide ticciannioit cĩ Makayyioit Nyekuc cĩ eyeleei makayyioiti belliok kebelit. Ẽbẽl balna Davide tẽgẽl coo, thoothiowẽy ĩcĩk kõr wũ balna ẽẽlanẽ Makayyioiti ĩnõõnõ, kĩĩ katĩ kithii cĩ aruk mĩrõwa ĩnõõnõ, kõdẽ aruk alaanĩ Thaulo ĩnõõnõ.
1 Makayyioit, kamĩnani na aniitia, eeni niia tiirthẽt cannĩ.
2 Ẽẽn Makayyioiti Thiir cannĩ kĩ Ellioit cannĩ,
ẽẽn nẽ Thiir cannĩ cĩ kalugunyẽnẽ nana.
Ẽẽn nẽ kilib cannĩ kĩ tiirthẽt cĩ ẽlla aneeta,
ẽẽn nẽ ngĩtĩ nannĩ cĩ tiiri.
3 Kala na Makayyioit cĩ ẽtẽmanõy ngatĩ kadĩhĩthĩ,
ĩthõng keeliay na mĩrõwẽy cĩganĩk.
4 Ẽcẽbja balna aneeta lõõrõnẽta cĩk daaĩthak,
ĩthõng ũmũrmũrana tõwõnĩ cĩ daaĩtho.
5 Atakucothĩca balna aneeta lõõrõnẽta cĩk look cĩ daaĩtho,
ĩthõng ẽdẽta daaĩthĩ aneeta gõõla ĩcannĩ.
6 Ĩthõng pĩrnanta cannĩ,
kikiyyia balna kalawa na Makayyioit,
kalawa na Nyekuc cannĩ,
kĩĩ katĩ kẽẽla aneeta.
Ĩthĩrar nẽ molook cannĩ Ciitha cĩnnĩ,
õdõlan ulua cannie kĩĩn cĩgĩnĩk.
7 Ngaatĩ abarriti balna lõõcĩ, ĩthõng õtõmmõwa,
ivitia õtõmõthõ thiiryiowa, ĩthõng abarritita,
nyatarka balna avarac Nyekuci.
8 Ẽẽkta balna burruti ũngũẽnẽy cĩgĩnĩk,
ĩthõng ẽtẽha gua cĩ atũũthĩ kũtũga cĩnnĩ,
atdukua balna nẽ thõlõmõ cĩk ẽẽn tũkũlõn loota.
9 Apuuk balna nẽ tammutiddin,
ĩthõng ikiyyia loota,
Aatĩ balna diithiowa cĩk ollik cuc
thoonĩy cĩgĩnĩk loota.
10 Eceremothi balna nẽ anjĩlõ,a ĩthõng ukula,
ikiyyia ukul nẽ kavutẽnẽy cĩk ngõõtak.
11 Abung balna nẽ ẽlẽ cĩnnĩ muwura,
aliheei ĩnõõnõ diithiowa cĩk ariri tẽr.
12 Abung balna diithiowa cĩk obbitik lanyĩt cĩnnĩ,
ĩthõng itillia diithiowa kagũra cĩk tammuak
nguuma cĩnnĩ kĩ badi cĩ tammuo.
13 Ĩthõng õthõõth balna Makayyioiti
tammuatiddina moloowa cobbi,
ĩthõng ĩthĩrarẽ moloowĩ cĩ
Nyekuc cĩ Ijiar vẽlẽk.
14 Iccia balna nẽ mĩrõk cĩgĩnĩk nyarangĩtẽy,
ĩthõng athaan ĩnõõgõ,
anyĩk nẽ ĩnõõgõ kivirit tammua ĩcĩ abadĩ.
15 Makayyioit, ikiyyia edenyiay bũlũc cobbi loota,
ngaatĩ edenyianẽ ngĩtĩ balna engenycianĩ lõõcĩ,
nyatarka egerenyewu niia,
tivongia cĩ ũngũẽ cugunik.
16 Ulucciay balna Makayyioiti tammuatiddina loota,
ĩthõng ẽẽlawanĩ,
ikiyyia acalũwaha nẽ aneeta
maamĩy cĩk wuuntik.
17 Ikiyyia balna ẽẽlawa nẽ aneeta
mĩrõwẽy cĩganĩk ĩcĩk tiirtik,
kĩ eetĩnẽy vẽlẽk ĩcĩk aaburnecca aneeta,
ĩcĩk tiirtik õrrõt ĩcannĩ.
18 Ivitia uukta nẽẽgẽ aneeta
balna ngĩ kaavẽ canana,
ĩthõng thĩ, kẽnnẽ,
balna ẽlla Makayyioiti aneeta.
19 Ayahana balna nẽ aneeta ngatĩ obbi,
ẽẽlana nẽ aneeta, nyatarka atalla nẽ aneeta.
20 Adũmanna balna aneeta Makayyioiti,
nyatarka kathĩrari na thõõth cĩ aduwa nẽnẽ,
agatana nẽ aneeta,
nyatarka kamiri nana.
21 Kĩthĩrara balna na goolliok cĩk Makayyioktak
ngaanĩ kũtũngek na Nyekuc cannĩ,
ĩthõng kĩdĩmana thõõth cĩ gerthe.
22 Kõwõba balna na ngirantiok cĩgĩnĩk vẽlẽk,
ĩthõng ngaanĩ kũtũngek thoothonniok cĩgĩnĩk.
23 Agayya nẽ aneeta ngatĩ athiina gerthetini tõõ,
kĩ ngatĩ kathũnnẽ balna ẽlẽ cannĩ
thoothonniowẽy ĩcĩk gerthek.
24 Adũmanna balna Makayyioiti aneeta,
nyatarka kathĩrari na tĩrĩthẽnĩt cĩnnĩ,
nyatarka aga nẽ athĩ ne, kamiri nana.
25 Kĩ eet cĩk athĩrar thõõth cunni Makayyioit,
ẽyẽla niia ngatĩ athũnnẽ niia thõõth cunni kĩ ĩnõõgõ,
abũnna niia õrrõt kĩ eet cĩk athii cĩ ayak gerthetin.
26 Eeni niia calla kĩ eet cĩk callĩk,
ĩthõng thĩ kẽnnẽ, egeenyu kĩ eet cĩk gerthek.
27 Ẽẽla niia eet cĩk athii cĩ ẽngẽrẽnĩ,
ĩthõng anyiwu eet cĩk ẽngẽrẽn kĩĩtõ dĩcẽ.
28 Makayyioit, ogooni niia kĩ gii cannie cĩ katũkũlẽnĩ,
ũũwũ Nyekuci cannie muwur cannĩ kĩĩ lanyĩt.
29 Anya niia aneeta tiirthẽt cĩ kuukonia kĩ mĩrõk cĩganĩk,
anya Nyekuci cannie tiirthẽt cĩ kõngõthẽ lũwat.
30 Abũnna gõõl cĩ Nyekuco,
ẽẽn thoothiowa cĩk Makayyioktak vẽlẽk dĩdĩ.
Ẽẽn nẽ kilib, cĩ eet vẽlẽk
cĩk alugunyẽnĩ ĩnõõnõ.
31 Makayyioit dõ cĩ ẽẽn Nyekuc.
Nyekuc cĩnac dõ cĩ ẽẽn thiir cĩ athunniet ageeta.
32 Ẽẽn nẽ Nyekuc cĩ anya aneeta kĩthĩ tiir,
cĩ anyĩk gõõl cannĩ kũbũna õrrõt.
33 Aanyĩk balna nẽ thoo cĩganĩk kaavutõ kĩ cĩk mĩrĩcantak,
anya nẽ aneeta kĩbĩl jurrung thiira tiddina.
34 Alimaneei nẽ athĩn cĩganĩk jore,
kĩĩ katĩ kicciawõõĩ na kirihit cĩ tiiri õrrõt.
35 Makayyioit, anya aneeta kilib cunni kẽẽla aneeta,
uthuutia aneeta athiiti cunnie cĩ athio,
õkkõ niia loota, ĩthõng õdõnga aneeta kubulie.
36 Anyi niia gõõl cannĩ kĩĩ obbua õrrõt,
kĩĩ katĩ athii cĩ aritaniay thoocĩ cannie.
37 Kumuri na mĩrõk cĩganĩk ĩĩthõng kagama ĩnõõgõ,
athii cĩ kabili na, ĩĩthõng kathaanĩk ĩnõõgõ looc.
38 Koroceei balna na ĩnõõgõ looc,
kĩĩ katĩ kithii cĩ arũkna nẽẽgẽ,
uukitõ balna nẽẽgẽ looc
loota thoonĩy cĩganĩk.
39 Anya balna niia aneeta tũũrẽn cĩk tiirtik cĩk jorak,
ĩthõng anyiwu mĩrõk cĩganĩk kuulullie thoonĩy cĩganĩk.
40 Anyi balna niia mĩrõk cĩganĩk kivirit ĩcannĩ,
karui na eet cĩk aaburnecca aneeta.
41 Alu balna nẽẽgẽ adiim elinit,
athii kẽnnẽ eeti cĩ aku ẽẽl ĩnõõgõ tõõ,
ivitia utuluththik nẽẽgẽ Makayyioit,
ĩthõng thĩ, abũrĩ kẽnnẽ nẽ lawinit cĩnĩng.
42 Kerei balna na ĩnõõgõ kĩmĩnkĩtĩt kaavutõ
kĩ tuduwacĩ ngõõta tõ.
Kaathi na ĩnõõgõ kĩ lorobocĩ gõõla.
43 Ikiyyia balna anya niia kijiar eet cĩk ovolongia aneeta.
Ẽbẽraha niia aneeta kagam loociok,
eet cĩk athii cĩ kagga na buu,
ĩthõng yoko iticantothĩha aneeta.
44 Agiiny loociowa cĩk rẽẽng ooti cĩgĩk kĩ aneeta.
Mĩ athĩkna nẽẽgẽ aneeta, õwõb thõõth cannĩ.
45 Athii thinneti cĩgĩk vẽlẽk cĩ õkõmĩ,
ĩthõng ivitia kĩ aneeta abarrit jiena
avvu vatĩkẽy ĩcĩgĩk ĩcĩk tiirtik.
46 Arũgĩ Makayyioiti!
Kadihithi na Nyekuc cĩ ẽẽn nẽ thiir cannĩ.
Anycĩk niigia Nyekuc cĩ ẽẽla aneeta kĩdĩhĩthẽ!
47 Anya balna Nyekuci aneeta kijiar mĩrõk cĩganĩk,
anya nẽ aneeta kagam loociok,
48 ĩthõng ẽẽlawa aneeta mĩrõwẽy ĩcĩganĩk.
Nyekuc, anya niia aneeta kijiar mĩrõk cĩganĩk,
eetĩnẽy cĩk ẽẽn lõrĩmĩnya.
49 Ĩthõng thĩna, Makayyioit,
kadihiththi katĩ na aniitia kõrgẽna cĩ loociowu
kebelei katĩ na thar cugunik tegelua cĩk dĩhĩthẽntak.
50 Anyĩk niia alaan cunni kijiar mĩrõk cĩgĩnĩk
ngõnana cĩk meelĩk.
Yelek niia mĩnan cunni dõõkĩthĩ alaan cunni cĩ eberiay,
Davide kĩ dõõlĩ cĩgĩnĩk kũdũt.