Tẽgẽl 17
Lawinit cĩ Davide.
1 Makayyioit, thĩk ĩlaalii cannĩ cĩ thõõth cĩ edeemothi,
thĩk thõõth cĩ kalue na wo.
Thĩk lawinit cannĩ, nyatarka athii
kũtũgĩ cannie cĩ õthõõth võlõng.
2 Anyĩk kũtũk cunni kuduwa ngatĩ kamiri nana,
anyĩk kẽbẽrẽ cugunik kĩcĩnĩt thõõth cĩ ẽẽn dĩdĩ.
3 Kõdẽ woyyia rẽpan niia thĩnĩn cannĩ,
ĩthõng ĩtĩmana aneeta baal,
kõdẽ woyyia ngĩ atĩmanna niia aneeta,
athii katĩ gii cĩ arũba niia cĩ gerthe tõõ.
Kuduwa balna na kĩthĩ ne,
ĩthĩnga katĩ ẽgẽrẽthan kũtũgĩ cannie thõõth.
4 Kĩthĩrara balna na thõõth cĩ aduwa niinia,
kĩĩ katĩ woccia athii na cĩ kowobi eet cĩk ẽẽn lõrĩmĩnya.
5 Kalna na kowobi goolliok cugunik,
athii thoona cĩganniek cĩ aritaniay.
6 Nyekuc, kalayyi na aniitia,
nyatarka atajana katĩ niia aneeta,
thĩk lawinit cannĩ.
7 Yeleha mĩnan cunni cĩ obbi õrrõt,
niia cĩ ẽẽla niia eet tiirthẽta cĩ athiit cunni cĩ athio,
eet cĩk avvu alugunyeni aniitia, nyatarka mĩrõk cĩgĩk.
8 Thuutia aneeta kĩcĩ athũnnẽ kẽbẽrẽ cugunik,
lugunya aneeta kaavu ria cĩ kavutanẽ cugunik.
9 Bẽha aneeta eetĩnẽy ĩcĩk kuukona kĩ aneeta,
mĩrõwẽy ĩcĩk avvu alĩkca aneeta.
10 Athii ĩnõõgõ tamati tõõ,
ĩthõng ẽngẽrẽn nẽẽgẽ thõõtha cĩ õthõõth nẽẽgẽ.
11 Õwõb nẽẽgẽ thoo cĩganĩk, ĩthõng ĩlĩktaha nẽẽgẽ aneeta,
acĩnna kẽbẽrẽnĩy ĩcĩgĩk, adiim uukwa looc.
12 Ẽrẽyya nẽẽgẽ aneeta kĩ maa cĩ adak boobo,
kaavutõ kĩ maa cĩ dĩcĩ cĩ ongiyyiei gõõla.
13 Makayyioit, ijjia uuktõy kĩ mĩrõk cĩganĩk,
ĩthõng ijiaru ĩnõõgõ,
ẽẽlawa aneeta eetĩnẽy ĩcĩk gerthek
nyetubata cunni.
14 Makayyioit, tiirthẽta cĩ athiit cunni,
ẽẽla aneeta eetĩnẽy ĩcĩkkõ,
eetĩnẽy ĩcĩk ahad athĩ ne,
amũda anyinit katĩ ngĩ aruk eet looca ĩcoo.
Ĩthõng thĩ kẽnnẽ, anyĩk dainit eet cĩk amĩnani niinia,
ĩthõng naboo anyiwu dõõlĩ cĩgĩk kaal cĩk meelĩk,
kĩĩ katĩ kumuddia doolia cĩk dõõlĩ cĩgĩk vẽlẽk.
15 Ĩthõng bũnnatina cannĩ, kacini katĩ nguum cunni,
ĩthõng kẽbẽlbẽla katĩ ngĩ kĩtĩnga, ĩthõng kicini aniitia.