Tẽgẽl 16
Tẽgẽl cĩ Davide.
1 Nyekuc, thuutia aneeta,
kalugunyie na ngatĩ aavẽ niinia.
2 Kennei na Makayyioit ne,
“Eeni niia Makayyioit cannĩ,
mĩ athii niia tõõ,
athii katĩ cĩ karũba na gii ĩmma cĩ abũnna.”
3 Abũnna eeta cĩk Nyekucak looca,
katali na ngĩ karũmẽna kĩ ĩnõõgõ.
4 Ayak katĩ eeta pĩrnanẽt cĩ obbi õrrõt,
cĩk avirothi nyekucnya cĩk athii cĩ ẽẽn dĩdĩ,
Athii katĩ na cĩ karũmẽna kĩ ĩnõõgõ,
katĩ ngĩ anyi nẽẽgẽ nyekucnya cĩgĩk anyintiok,
ĩthõng athii katĩ na cĩ kala nyekucnya cĩgĩk.
5 Makayyioit, anya niia aneeta dainit kĩ wũdẽnĩt cannĩ,
athũnnẽ niia kaal cĩganĩk jurrung.
6 Ĩdĩhĩmẽ lõõcĩ cĩ anya niia aneeta kabarĩc,
anya aneeta katal õrrõt kũdũt!
7 Kadihithi katĩ na Makayyioit cĩ atĩrĩtha aneeta,
ĩthõng ĩtĩrĩtha thĩnĩn cannie aneeta baal buu.
8 Kagga na ngĩ aavĩ Makayyioiti dõõkĩthĩ kĩ aneeta.
Nyatarka aavĩ nẽ attia cannĩ cĩ athio,
athii katĩ gii cĩ omonnia aneeta tõõ.
9 Ĩthõng thĩna, ẽbẽlbẽl thĩnĩn cannie õrrõt,
ĩthõng atalĩ katĩ ahaatĩ cannie,
ĩthõng uyuwuth katĩ ẽlẽ cannie jurrung,
10 nyatarka athii katĩ cĩ ũũngnĩca niia loowatõ,
kõdẽ ũũngnĩca aneeta et cunni cĩ dĩhĩmĩ kummu.
11 Eyeleea balna niia aneeta gõõl cĩ rũgẽtõ,
kĩ ngatĩ aavẽ niia joonui kĩ aneeta anya kẽbẽlbẽl jurrung,
ĩthõng katali katĩ na kũdũt, attia cunni ĩcĩ athio.