Tegeluanu 11

Tẽgẽl 11

Ẽẽn tẽgẽl cĩ Davide coo, cĩ makayyioit cĩ tegeluanu.

1 Kalugunyie na Makayyiokta.

Nyia kennea eeti ĩmma aneeta ne,

“Vir kĩ kĩballĩcĩ bĩt ĩcĩ thiir cunni wo,

2 nyatarka aryik eeta cĩk gerthek nyarangĩt lõõrõnẽtẽy cĩgĩk,

ĩthõng utugurit kirihinya cĩgĩk,

kĩĩ katĩ kicciacõ nẽẽgẽ eet ngatĩ alugunyi muwuratõ,

eet cĩk abũnna nyarangĩtẽy.

3 Mĩ ẽgẽrẽthantẽ thoothonniowa cĩk abũnna cĩk ngiranak vẽlẽk,

nyia cĩ woccia atican eeti cĩ abũnna?”

4 Aavĩ Makayyioiti Ciitha cĩnnĩ ĩcĩ Dĩhĩmĩ,

agam Makayyioiti eet tammuatiddina.

Ẽdẽnya nẽ eet vẽlẽk,

ĩthõng ĩtĩman ĩnõõgõ.

5 Atĩman Makayyioiti eet cĩk abũnna,

ĩthõng akata eet cĩk amĩnan jõrẽnĩn cĩk aaburneei nẽ.

6 Atdukwuaai katĩ nẽ eet cĩk gerthek,

thõlõmõ cĩk ẽẽn guo kĩ guo cĩ aaburi patdahac,

ĩthõng arũba katĩ nẽẽgẽ ngõõt cĩ aaburi patdahac.

7 Nyatarka adĩman Makayyioiti thõõth cĩ edeemothi,

amĩnan nẽ ngatĩ adĩmanĩ eeta thõõth gõõla ĩcĩ edeemothi.

Acĩn katĩ eeta cĩk abũnna nguum cĩnnĩ.