Tẽgẽl 10
1 Makayyioit, nyia bĩl rẽẽna wo?
Nyia lugunyie niia katĩ ngĩ kapĩrna na wo?
2 Alĩk eeti cĩ gerthe ngẽrẽna cĩnnĩ et cĩ alalĩ,
cĩ agamnyi thoothiowẽy cĩk gerthek ĩcĩk ahad nẽ ẽẽ.
3 Ẽngẽrẽn nẽ, nyatarka thoothonniok cĩk abarriteei thĩnĩn cĩnnẽ,
abuluth nẽ eet cĩk ngarubik, ĩthõng ĩcĩĩn Makayyioit.
4 Nyatarka ngẽrẽn cĩnnĩ, athii cĩ adiim eeti cĩ gerthe Makayyioit.
Muwẽẽnta cĩnnĩ vẽlẽk, athii nẽ cĩ amuk Nyekuc.
5 Amũda nẽ kaal cĩk abũnna goolliowẽy cĩgĩnĩk dõõkĩthĩ.
Ngẽrẽna cĩnnĩ athii nẽ cĩ ongollie teedinet cunni.
Arannĩ nẽ mĩrõk cĩgĩnĩk vẽlẽk.
6 Aduwaai nẽ ẽlẽ cĩnnĩ ethei ne,
“Athii gii cĩ woccia omonnia aneeta tõ.
Katali katĩ na dõõkĩthĩ, ĩthõng athii katĩ aneeta cananĩ tõ.”
7 Abĩththĩ cĩĩnẽnẽtĩ cobbi kĩ volongnyiok kũtũk cĩnnĩ
kĩ thõõth cĩ gerthe cĩ katĩ adĩmaneei nẽ eeta.
Õthõõth nẽ thõõth cĩ gerthe ahaata cĩnnĩ dõõkĩthĩ.
8 Alugunyi nẽ õjõõn kĩ korookjiok,
ẽbẽk eet cĩk amĩrĩ cĩk adiim aruk wo.
Ĩnganna nẽ lugunyẽnta cĩnnĩ wo, kuruk eeta.
9 Alugunyi nẽ õõngĩ loota kĩ maa,
alugunyi nẽ, kĩĩ katĩ kagam eet cĩk athii cĩ ayak ellioit,
ĩthõng agam ĩnõõgõ, ĩthõng utugur nyeritie cĩnnĩ.
10 Uuk nẽ eet,
ĩthõng uukitõ looc tiirthẽta cĩnnĩ.
11 Ethei nẽ ẽlẽ cĩnnĩ ne, “Erektek balna Nyekuc eeta cĩkkõ.
Ũmmũt Nyekuci nguum cĩnnĩ, ĩthõng katĩ ĩthĩnga acĩnĩ.”
12 Makayyioit, tĩnga jiena! Nyekuc, dõng athiit cunni.
Nyĩ anyi kerekteei eeta cĩk athii elinti tõ.
13 Nyia thẽk eeti cĩ gerthe kõthõõth Nyekuc buth wo?
Nyia thẽk kennek nẽ ẽlẽ cĩnnĩ ne,
“Athii katĩ cĩ ajinna Nyekuci thoothonniok cĩk kadĩmani wo?”
14 Ĩthõng thĩ kẽnnẽ, niinia Nyekuc
acini niia thõõth cĩ gerthe kĩ mothinit,
ĩthõng idiimu eelu dõõkĩthĩ.
Aari eeta cĩk athii elinti tõ thinneti cĩgĩk kĩ aniitia.
Ẽẽla niia boyyiok.
15 Duul athiit cĩ et cĩ gerthe wo.
Uuk ĩnõõnõ, nyatarka thõõth cĩ gerthe cĩ atican nẽ wo,
cĩ amuk balna nẽ athĩ ne, athii katĩ niia cĩ amũda.
16 Ẽẽn Makayyioiti Alaan kũdũt,
adĩmẽ katĩ eeta cĩk loociowu
cĩk athii cĩ athĩrar thõõth cĩnnĩ looca cĩnnĩ.
17 Makayyioit, athihi niia thõõth cĩ abarriteei eeta cĩk acananni,
etheri niia ĩnõõgõ, ĩthõng ithiwu ulua cĩnĩng,
18 Ẽẽla niia boyyiok kĩ eet cĩk ĩtdany eeta,
kĩĩ katĩ kithii cĩ ẽhẽcĩ katĩ eeta ĩnõõgõ naboo.