Tẽgẽl 7
Ẽẽn tẽgẽl cĩ Davide coo, cĩ ebelei nẽ Makayyioit, nyatarka et cĩ athĩ Kuuth cĩ tatũk cĩ Benyamini.
1 Makayyioit Nyekuc cannĩ, kalugunyie na ngatĩ aavẽ niinia,
thuutia, ĩthõng ẽẽlawa eetĩnẽy vẽlẽk ĩcĩk ingkayya aneeta,
2 kõdẽ athanna kĩthĩ tẽbẽlẽcẽ kĩ gõõ ngĩ adak maa kelegit,
ĩthõng athii eeti cĩ ẽlla aneeta tõõ.
3 Makayyioit Nyekuc cannĩ, ma da balna kĩdĩmana na thõõth coo,
ĩthõng aavu gerthetini athĩnẽy cĩganĩk,
4 ma da balna kĩdĩmana et cĩ kattĩyya kĩ aneeta ganõna buth,
kõdẽ kĩtdanyaa miroit cannĩ gimma thõõtha ĩcĩ kaganoko,
5 ĩthõng thĩ, anyĩk miroit cannĩ kitingkawa, ĩthõng agamanĩ.
Anyĩk ĩnõõnõ kiciaha aneeta,
ĩthõng anya aneeta katangu tuduwaca.
6 Makayyioit, tĩnga varacintia cunni.
Tĩngawĩk varac cĩ mĩrõk cĩganĩk.
Nyekuc cannĩ, tĩnga tẽẽd thõõth cĩ edeemothi.
7 Anyĩk eet kuluttiay kĩlĩktaai aniitia.
Gam ĩnõõgõ tammuatiddina.
8 Ẽngẽr Makayyioiti cĩnac thõõth cĩ eet vẽlẽk.
Makayyioit cĩ Ijiar vẽlẽk, tẽẽd thõõth cannĩ,
ĩthõng eyeleea ngatĩ kabũnnanẽ na, ĩthõng kĩmĩra.
9 Nyekuc cĩ abũnna,
cĩ ẽrẽpan ooti kĩ thinneti cĩk eetu,
cĩ abĩlnĩ jõrẽnĩn cĩk adĩman eeta cĩk gerthek,
ĩthõng anyĩk eet cĩk abũnna kaavutõ jurrung.
10 Ẽẽn Nyekuci cĩ Ijiar vẽlẽk kilib cannĩ,
Nyekuc cĩ ẽẽla eet cĩk abũnna thinneti cĩgĩk.
11 Ẽẽn Nyekuci et cĩ ẽtẽd thõõth gõõla ĩcĩ abũnna,
Nyekuc cĩ avaraci eet cĩk gerthek dõõkĩthĩ.
12 Mĩ athii cĩ õbõdanĩ eeti thĩnĩn cĩnnĩ,
ĩvõl katĩ Nyekuci nyetubat cĩnnĩ kĩĩ lẽhẽda,
adĩmana katĩ nẽ kirihit cĩnnĩ kẽrẽwõy.
13 Ĩdĩmanek nẽ ijjio cĩk jorak,
ĩthõng ĩdĩmanek nyarangĩt cĩgĩnĩk cĩk alanyĩt guo.
14 Eeti cĩ anyakcie thõõtha cĩ gerthe,
arittia pĩrnanẽt kĩ võlõng.
15 Eeti cĩ ada look, ĩthõng utuara tõdõwa cĩgĩnĩk,
atdukothi thẽk nẽ loowa cĩ ada ẽẽ.
16 Õbõdaĩ ĩnõõnõ gerthetini wũ balna ĩkõtha nẽnẽ.
Õbõdaĩ ĩnõõnõ jore õõ cĩnnĩ dõ.
17 Kennei katĩ na Makayyioit ne, ibalallẽ,
nyatarka bũnnathĩt cĩnnĩ.
Kadihithi katĩ Makayyioit, ĩthõng kẽbẽla
thar cĩk Makayyioit cĩ Ijiar vẽlẽk.