Tẽgẽl 5
Ẽẽn tẽgẽl cĩ Davide coo, cĩ eyeleei makayyioiti belliok, ĩthõng ũtũbẽcõ nyalomorieta.
1 Makayyioit, thĩk thõõth cannĩ,
ĩthõng ahada niia ulua cannĩ.
2 Nyekuc cannĩ, Alaan cannĩ,
thĩk ulua cannĩ cĩ kadiimie elinit cunni,
nyatarka kalayyi na aniitia.
3 Makayyioit, athihi niia molook cannĩ ngerenniet,
kalayyi na aniitia ngerenniet,
ĩthõng kẽrẽwa tajan cunni.
4 Athii cĩ eeni niia Nyekuc cĩ ebelbeli, nyatarka thoothonniok cĩk gerthek.
Athii woccia cĩ arumenu niia kĩ eet cĩk gerthek.
5 Athii woccia cĩ abĩlĩ eeta cĩk ẽngẽrẽn nguuma cunni,
aabureei niia eet vẽlẽk cĩk atican thoothonniok cĩk gerthek.
6 Makayyioit, uruwu niia eet cĩk õvõlõngĩ,
aaburneei niia eet cĩk adiim aruk eet, ĩthõng õvõlõng thõng.
7 Ĩthõng thĩ, nyatarka tamati cunni cobbi,
kakuni katĩ na Ciitha cunni,
ĩthõng kigiinya õõ cannĩ
Ciitha cunni ĩcĩ Dĩhĩmĩ.
8 Makayyioit, tĩwa aneeta bũnnathĩta cunni,
nyatarka mĩrõk cĩganĩk.
Anyĩk gõõl cunni kedenyiay, kĩĩ katĩ kõwõb nana.
9 Athii thõõth cĩ kutugeti cĩk mĩrõk cĩganĩk cĩ woccia kaari na thĩnĩna cannĩ,
ahad thinneti cĩgĩk gõõl cĩ ẽgẽrẽthanĩ gõõnõgĩ.
Õgõõn lõgõrlõngẽta cĩgĩk kĩ loowuana cĩk aavutõ ngaburur,
õthõõth nẽẽgẽ ahaatuanĩy cĩgĩk, thõõth cĩ ẽẽn võlõng.
10 Nyekuc, tẽẽd thõõth cĩnĩng!
Anyĩk thõõth cĩnĩng cĩ gerthe wo, kaanyĩk ĩnõõgõ kuukitõ looc.
Umur ĩnõõgõ, nyatarka thoothonniok cĩgĩk cĩk gerthek cĩk meelĩk,
nyatarka aburni nẽẽgẽ aniitia.
11 Ĩthõng thĩ kẽnnẽ, anyĩk eet cĩk adiim elinit kĩ aniitia, kebelbelit,
anyĩk kebelliõy nẽẽgẽ kũdũt talintia.
Ẽẽl ĩnõõgõ, kĩĩ katĩ kebelbelit eeta,
cĩk amĩnan thar cugunik.
12 Makayyioit, agatani niia eet cĩk abũnna dĩdĩ,
ẽẽla niia ĩnõõgõ mĩnana, kaavu kĩ kiliba.