Tẽgẽl 4
Ẽẽn tẽgẽl cĩ Davide coo, cĩ eyeleei makayyioiti belliok kebelit kidorĩtẽy.
1 Nyekuc cĩ abũnna,
dẽca aneeta ngĩ kavvuyyi nana.
Õgaha niia aneeta pĩrnanta,
tamatĩha aneeta, ĩthõng ithiwu lawinit cannĩ.
2 Niigia eeta, uwuyyu niigia bulẽnĩt cannĩ
kĩĩ ngawani kuumuc kĩĩ tĩngan?
Aduwuanu katĩ niigia thõõth cĩ ovolongiangũ aneeta kĩĩ tĩngan?
Amĩnannu katĩ niigia võlõng kuumuc kĩĩ tĩngan?
3 Agaac ngatĩ ẽbẽraaĩ balna Makayyioiti eet
cĩk athũnnĩ thõõth cĩnnĩ kĩĩ eet cĩgĩnĩk,
athĩknẽ katĩ Makayyioiti katĩ ngĩ kavvũ na ĩnõõnõ.
4 Nyĩ anyiccu varac cunung kaanyung ẽgẽrẽthantõy,
ngĩ attiyyu lõbẽlẽtẽy cuguk,
ẽrẽpanit niigia thinneti cuguk, ĩthõng ĩjaktõwu tiv.
5 Anycĩk anyintiok cĩk edeemothi,
ĩthõng aryiwu thinneti cuguk Makayyioit.
6 Mẽẽlĩ eeta cĩk ajinie athĩ ne,
“Ngẽnẽ woccia thẽk cĩ amannĩcet ageeta?”
Makayyioit, anyĩk lanyĩt cĩ nguum cunni
kũtũkũlet ageeta.
7 Anyiwu niia thĩnĩn cannĩ talinit,
kijiar talinit cĩ eet cĩk ẽtẽda labĩ cĩgĩk cĩk meelĩk
kĩ mẽrtẽ cĩnĩng cĩ obbi.
8 Makayyioit, koongi katĩ loota jurrung,
nyatarka aniitia dõ,
cĩ anya kaavu jurrung.