Tẽgẽl 2
1 Nyia kutukwuanit loociowa thoothonniok cĩk gerthek wo,
ĩthõng eeta cĩk atukwuan thõõth cĩ gerthe wo,
athii nẽẽgẽ cĩ ayak tiirthẽt cĩ adĩmanĩ?
2 Aito alaanẽta cĩk loociowu jore,
ĩthõng athaddie makayyiowa kõõt kuuktõy
kĩ Makayyioit kĩ alaan cĩ balna ẽbẽra nẽnẽ.
3 Ĩthõng othoothitõ ĩĩtõ ne, “Ketedit naaga ngariko cĩk ecebjet ageeta wo,
ĩthõng kõõkta eleeti cĩgaac.”
4 Arannĩ ĩnõõgõ Makayyioiti cĩ aavĩ loota taabawa tammuatiddina kaganoko,
ĩthõng amĩnyĩ ĩnõõgõ thõng.
5 Ma natẽ, egerenyek nẽ ĩnõõgõ varaaca
kabarritit õrrõt, ĩthõng ethek ne,
6 “Kaarĩha na alaan cannĩ
Thiona,a thiira cannĩ ĩcĩ dĩhĩmĩ.”
7 Kaduwa katĩ na thõõth wũ balna abũtaneca Makayyioiti.
Aduwacca balna nẽ aneeta etheca ne,
“Eeni niia ngẽrnanĩ cannĩ,
ĩthõng yoko kõr coo, kikiyyia kĩthĩ na Baaba cunni.
8 Jina aneeta,
ĩthõng katĩ kaanyi loociok vẽlẽk loota ngato,
kĩĩ katĩ barĩc niia,
ẽẽn katĩ lõõcĩ vẽlẽk cunni.
9 Agami katĩ niia ĩnõõgõ tẽlẽẽa cĩ ẽẽn thiihit,
ĩthõng uuku ĩnõõgõ kathaantẽ kĩ gõõ ngĩ alibie ijjia kĩĩ tẽbẽlẽcẽ.”
10 Ĩthõng thĩ, niigia alaanẽta, egeenyit,
ĩtĩrĩthĩt niigia makayyiowa cĩk loocu eleeti cuguk.
11 Iticantothĩk niigia Makayyioit tongolintia,
ĩthõng utuwuyyu goolliok cuguk cĩk gerthek barritõna.
12 Otongollie Ngẽrĩnĩ, kõdẽ katĩ ngĩ avaracĩth nẽ,
ĩthõng uruwung tamanoko,
nyatarka ĩngathĩ varacĩthĩ cĩnnẽ kĩ gua.
Ĩthõng thĩ, agatantẽ eeta vẽlẽk cĩk avirothi ĩnõõnõ.