Ruth kĩ Boath kilongona
3
Ennei balna kõr ĩmma Naomi kalawan cĩnnĩ Ruth ne,
“Doolec cannĩ,
kadiimi na ngĩ keelli aniitia kidiimiai et cĩ agamnyi aniitia cĩ katĩ arumenu jurrung.
2 Arumenu balna niia kĩ ticcianniok cĩk ngayyik cĩk Boathĩ,
ĩthõng aga niia buu ngatĩ ẽẽn Boathĩ tionnioit cĩnac kir.
Aany katĩ nẽ labĩ jiatĩn coo kilongona.
3 Bĩt raanẽ,
ĩthõng uvuudie ngooroca cĩ õngõlĩ ẽmmẽdẽ,
ĩthõng itihimu ceremua cugunik cĩk dĩhĩmĩk.
Ĩthõng uuwu kilongona cĩnnĩ ẽẽ.
Ĩthõng thĩ,
nyĩ anyi Boath kicini aniitia,
gii ngĩ ẽdẽcak dainit kĩ wũdẽnĩt.
4 Ma ngĩ ũũk kĩnyaaĩy,
bẽk ngĩtĩ õkkõ õõngẽ jurrung.
Mĩ agamtaĩ kĩnyaha,
bĩt dõng cẽrẽm cĩnnĩ cĩ bungentõ,
ĩthõng atangu ĩcĩ thoonu,
kĩĩ yelinit cĩ ajinie niia ĩnõõnõ kebeei aniitia.
Mĩ ĩcĩnẽ,
aduwacci katĩ nẽ aniitia thõõth cĩ woccia adĩmani niia.”
5 Ẽdẽcĩ Ruthi athĩ ne,
“Kõkkõ thẽk katĩ kadĩmani na thoothonniok vẽlẽk kĩcĩ aduwa niia wo.”
6 Ma natẽ,
ũlũũcẽ Ruthi baalin nĩcẽ ũũk ĩcĩ kilongonio,
ngaatĩ õkkõ adĩmanĩ thoothonniok vẽlẽk wũk balna aduwaai kinyik cĩnnẽ.
7 Ma balna ngĩ ẽdẽcak Boathĩ dainit kĩ wũdẽnĩt,
ĩthõng ẽbẽlbẽl,
ũũk atangu nẽ ngatĩ balna awũthĩ labĩna ĩcĩ gõlla.
Ma natẽ,
ĩnĩha Ruthi ikiyyia õdõng cẽrẽm cĩ abungẽnĩ Boathĩ ĩcĩ thoonu,
ngaatĩ õõngẽ natẽ.
8 Ma balna ngĩĩ baalin tobbi,
ĩtĩnga Boathĩ tamanoko,
ĩthõng ukulek jien.
Ma balna ngĩ ũũkcĩ wo,
acĩn kẽnnẽ ngaa ĩmma cĩ õõngĩ ĩcĩ thoo cĩgĩnĩk!
9 Ngaatĩ ajini Boathĩ ngaa nĩcẽ ẽthẽcĩ ne,
“Aniitia ngẽnẽ?”
Ẽdẽcĩ ngaa neccie Boath ethei ne,
“Makayyioit cannĩ,
aneeta ticciannioit cunni Ruth,
bunga baai thẽk cẽrẽma cunni wo,a
nyatarka eeni niia et cĩ agami eet cĩk kõrõõk cannĩ.”
10 Ma natẽ,
ẽdẽc Boathĩ ĩĩ ne,
“Anyĩk Makayyioit kagatanina doolec cannĩ.
Athimatĩca niia aneeta,
õrrõt kijiar thimatĩth wũ balna wowu.
Ĩthõng naboo athii cĩ alnai ngatĩ woccia atihi ngĩthorowocĩ,
kõdẽ woyyia cĩ aballie,
kõdẽ cĩ ẽẽn ngĩjũrrait.
11 Ĩthõng yoko,
nyĩ ongollie thõõth ĩmma doolec cannĩ.
Kadĩmaneci thẽk katĩ na aniitia gii vẽlẽk cĩ adiimi niia aneeta kĩdĩmanũ,
nyatarka agayyi eeta vẽlẽk cĩganniek cĩk kõrõõk cĩ gaalawu aniitia ngatĩ ẽnnẽ ngaa cĩ abũnna õrrõt.
12 Ĩthõng dĩdĩ,
keeni na tionnioit cĩ maac cunni cĩ woccia kagamnyi aniitia,
ĩthõng thĩ,
aavĩ tionnioiti ĩmma cĩ tatũk cĩ maac cunni kir cĩ õjõõn.
13 Tangũ ngato baalin coo,
ma katĩ ngerenniet,
kõkkõ katĩ na kothoothona kĩ tionnioit cĩ maac cunni kir cĩ õjõõn.
Ĩthõng mĩ ẽlẽmĩ ngatĩ agami aniitia,
abũnna katĩ õrrõt.
Anyĩk ĩnõõnõ kagaminia.
Ĩthõng thĩ,
mĩ athii cĩ ẽlẽmĩ,
bũũtĩ kĩ Makayyioiti,
kagamnyi katĩ na kir!
Tangũ ngato gii ngĩ aal lõõcĩ.”
14 Ngaatĩ õõngẽ Ruthi loota naboo,
ĩthõng thĩ,
ĩtĩnga nẽ baa ngĩ ĩthĩ lõõcĩ wataak, nyatarka athii balna cĩ adiim Boathĩ et ĩmma kagga ma ngĩ aavĩ ngaa ĩmma natẽ.
15 Ma natẽ,
ethek naboo Boathĩ ĩnõõnõ ne,
“Jaaĩ cẽrẽm cĩ abunge õõ cunni wo,
ĩthõng etevetewu ngato.”
Ngaatĩ adamutacĩ Boathĩ ĩnõõnõ labĩ ngõnana tõrkõnõm,
ĩthõng ĩcĩĩdĩhĩ cẽrẽma,
ĩthõng õdõngẽẽĩ inyiawa ĩcĩnnĩ.
Ngaatĩ amiirẽnẽ Boathĩ õkõyyĩ õlõõ cĩ gaalawu.
16 Ma balna ngĩ imiirie Ruthi ũrũbothĩk kinyik cĩnnĩ,
ijin Naomi ĩnõõnõ ethek ne,
“Utugu thĩnõ da thõõth kuu doolec cannĩ?”
Ngaatĩ ẽtẽbanacĩ Ruthi ĩnõõnõ thoothonniok vẽlẽk wũk balna adĩmanẽcĩ Boathĩ ĩnõõnõ.
17 Ĩthõng naboo ethek nẽ kinyik cĩnnĩ ne,
“Adamutaca Boathĩ aneeta labĩ cĩkkõ ngõnana tõrkõnõm,
ĩthõng ennea ne,
‘Athii cĩ amiirie õkkõ kinyiga cunni athĩnẽy kaganoko.’ ”
18 Ma natẽ,
ethek Naomi ĩnõõnõ ne,
“Rẽẽwõy kalawan cannĩ,
ĩthõng gii mĩ kĩthĩhĩt thõõth cĩ katĩ aduwuay.
Athii katĩ Boathĩ cĩ ayuwuth ĩĩthõng gii ngĩ ĩdĩmanothĩk thõõth coo kõr coo.”