Agam Boathĩ Ruth
4
Ma kõr nĩcẽ noko,
ũũk Boathĩ ĩcĩ katũk cobbi cĩ kõrõõk cĩ gaalawu,
ngatĩ gõõ arumone eeta,
ĩthõng ũũk aavu loota natẽ.
Ma natẽ,
iliba tionnioiti wũ balna aduwa Boathĩ,
ngaatĩ avvẽ Boathĩ ĩnõõnõ ẽthẽcĩ ne,
“Ijjia da avvu loota ngato gõõna,
kadiimi ngĩ kõthõõthõy.” Ngaatĩ õkõyyĩ nẽ ĩcĩ Boathĩ, ĩthõng aavu loota.
2 Ma natẽ,
ũtũvvũwa Boathĩ makayyiok cĩk kõrõõk cĩ gaalawu õmmõtõ,
ĩthõng uduwak ĩnõõgõ ethek ne,
“Aavut loota ngato,
ĩĩtõ kẽbẽrẽ cĩk thõõth coo.”
Ngaatĩ aatẽ loota.
3 Ma natẽ,
ethek Boathĩ tionnioit nĩcẽ ne,
“Ũũtẽnẽ Naomi wũ balna õbõda Mõaba looc cĩ Elimẽlẽĩ wũ ẽẽn tionnioit cĩnac.
4 Kahadi balna kathĩ ne,
abũnna ma kaanyi na aniitia gaa,
ĩthõng kathĩ na ne,
tũũwa niia looc coo.
Mĩ adiimi ũũta,
tũũwa kẽbẽrẽnĩy ĩcĩ eet cĩk aatĩ ngato wo,
kĩ ĩcĩ makayyiok cĩk eet cĩganĩk koo.
Ĩthõng thĩ,
mĩ athii cĩ adiimi,
duwaha aneeta kagga,
nyatarka eeni niia tionnioit cĩnnĩ kir cĩ õjõõn ngatĩ ũũtanẽ, ĩthõng kowobeci na aniitia.” Ngaatĩ ẽdẽcĩ eeti neccie athĩnnĩ ne, “Kũũta katĩna.”
5 Ma natẽ,
uduwak Boathĩ ĩnõõnõ ethek ne,
“Dĩdĩ,
kõr cĩ katĩ ũũtanẽ niia looc ĩcĩ Naomi kĩ ĩcĩ Ruthi,
adiim ngĩ agami niia Ruth cĩ looc cĩ Mõabĩ buu.
Ẽẽn nẽ ngaa cĩ bõyyĩ,
gõõla nĩĩcẽ,
ayak katĩ nẽ ngẽrĩnĩ cĩ katĩ avadaa maac cĩnnĩ wũ balna adaaha,
ĩthõng ũthũũtĩ ngẽrĩnẽ looc cĩ kõrõõk cĩnĩng.”
6 Ĩthõng ẽdẽc tionnioiti coo Boath ethei ne,
“Athii na cĩ kũũta looc nĩcẽ,
nyatarka athii katĩ woccia doolia cĩganniek cĩ aragĩth kaal cĩganĩk.
Tũũwa nẽnnẽ niia,
athii na cĩ kũũta.”
7 Wathinniok nĩĩkẽ,
ayak baa gõõ eeta cĩk Ĩthraĩlĩ vowoth cĩ athĩ ne,
mĩ adiim eeta ramma ngĩ ẽlẽmõnĩ ngatĩ ũũtẽnẽ looc,
apũrũca eeti ĩmma caavĩt cĩnnĩ,
ĩthõng anyĩk et nĩcẽ,
kĩĩ katĩ kagaacõ eeta cĩk Ĩthraĩlĩ ngatĩ,
ĩdĩmanothĩk thõõth ũbũna.
8 Ngaatĩ apũrũcanĩ tionnioiti caavĩt cĩnnĩ,
ĩthõng ethek Boath ne,
“Tũũ looc.”
9 Ma natẽ,
uduwak Boathĩ makayyiok kĩ eet vẽlẽk cĩk balna aatĩ natẽ ethek ne,
“Eeginnu yoko niigia vẽlẽk kẽbẽrẽ kõr coo cĩk acĩnnu ngatĩ kũtanẽ na ĩcĩ Naomi kaal vẽlẽk wũk balna Elimẽlẽĩ,
kĩ cĩ Kilionĩ kĩ cĩ Mahalõnĩ.
10 Ĩthõng naboo kagama Ruth cĩ looc cĩ Mõabĩ,
ngaa wũ bõyyĩ wũ balna ẽẽn ngaa cĩ Mahalõnĩ.
Gõõla ĩcoo,
ayak katĩ nẽ ngẽrĩnĩ cĩ avadaa maac cĩ Ruthi wũ balna adaaha,
ĩthõng abarĩc kaal cĩk kõrõõk cĩnnĩ,
kĩĩ katĩ kallia thara cĩk Mahalõnĩ meelitina cĩ eet cĩgĩnĩk kĩ cĩk kõrõõk cĩ gaalawu cĩ Bẽtẽlẽhẽmĩ.
Eeginnu niigia vẽlẽk kõr coo kẽbẽrẽ.”
11 Ngaatĩ ẽdẽcĩ makayyiowa kĩ eet vẽlẽk cĩk balna aatĩ katũga cobbi athĩnnĩ ne,
“Keeginna naaga kẽbẽrẽ cĩk thõõth coo!
Anyĩk Makayyioit kaanyĩk ngaa,
cĩ aku kõrõõk cunni wo,
kĩĩ ngaa cunni,
kittiria dõõlĩ cĩk meelĩk kaavu kĩ balna Racẽlĩ kĩ Lẽha,a
wũk balna aritianĩ eeta cĩk Ĩthraĩlĩ!
Anyĩk kaanyi Makayyioiti balinit tatũga cĩ Evrathĩ, ĩthõng ubulie Bẽtẽlẽhẽma.
12 Anyĩk Makayyioit kaanyi dõõlĩ cĩk katĩ arittia ngaa coo,
kĩĩtõ mẽẽlĩ kaavutõ kĩ doolia cĩk baangiet cĩnac Pẽrẽth,
ngẽrtĩ Tamarĩ kĩ Yudaa.”b
Eet cĩk vurut cĩ Boathĩ
13 Ngaatĩ õkõyyĩ Boathĩ Ruth õlõõtõtõ cĩnnĩ,
ĩthõng õõt ũrũmtẽ kĩ ĩnõõnõ.
Ma balna ngĩ ataguuthõ nẽ kĩ Ruth ẽẽ,
ikiyyia ẽẽl Makayyioiti ĩnõõnõ kanyawõy,
ĩthõng itirria ngẽrĩnĩ.
14 Ngaatĩ ẽthẽcĩ ngaay cĩk kõrõõk cĩ gaalawu Naomi ne,
“Kĩdĩhĩthĩt Makayyioit cĩ yoko anyi aniitia doolec cĩ agam kõrõõk cunni wo!
Anyĩk doolec coo kubulie Ĩthraĩla.
15 Anyi katĩ nẽ aniitia rũgẽt cĩ jõr,
ĩthõng uthuuti katĩ ngĩ atanganyu,
nyatarka ẽẽn nẽ doolec cĩ kalawan cunni.
Ĩthõng amĩnanni Ruthi aniitia,
nyatarka mayya nẽ ijiar dõõlĩ cugunik cĩk maacĩk cĩk ẽẽn tũrgẽrẽm cĩk woyyia baalia ayahi niia,
nyatarka itirriai nẽ aniitia ngeruni.”
16 Ngaatĩ õdõngĩ Naomi doolec,
ĩthõng anyaak kõnyõtõy,
ĩthõng ũthũũtĩ ĩnõõnõ.
17 Õthõõth balna ngaay cĩk aatĩ natẽ athĩ ne,
“Ayak Naomi ngẽrĩnĩ cĩnnĩ.”
Ngaatĩ akanẽcĩ nẽẽgẽ ĩnõõnõ thar cĩk athĩ Obed.
Ẽẽn balna Obedĩ baatĩ Jethe,
ĩthõng ĩthĩ Jethe baatĩ alaan Davide.c
Tatũk cĩ kõrõõk cĩ alaan Davide
18 Tatũk cĩ kõrõõk cĩ Pẽrẽthĩd coo.
Ẽẽn balna Pẽrẽthĩ baatĩ Hethronĩ.
19 Ĩthõng ĩthĩ Hethronĩ baatĩ Ramĩ.
Ẽẽn Ramĩ baatĩ Amminadabĩ.
20 Ẽẽn balna Amminadabĩ baatĩ Nathõnĩ.
Ĩthõng ĩthĩ Nathõnĩ baatĩ Thalmõnĩ.
21 Ẽẽn Thalmõnĩ baatĩ Boathĩ.
Ĩthõng ĩthĩ Boathĩ baatĩ Obedĩ.
22 Ẽẽn balna Obedĩ baatĩ Jethe.
Ĩthõng ĩthĩ Jethe baatĩ alaan Davide.