Ruth 2

Urumtõy Ruthi kĩ Boath

Aavĩ balna eeti ĩmma cĩ aballie õrrõt, ĩthõng abulie Bẽtẽlẽhẽma cĩ athĩ thar cĩgĩnĩk Boath, ẽẽn balna nẽ et cĩ tatũk cĩ Elimẽlẽĩ cĩ ẽẽn maac cĩ Naomi.

2 Ma baa kõr ĩmma, ethek Ruthi cĩ ẽẽn bũwẽnyĩ et cĩ Mõabĩ Naomi ne, “Nyẽ da kũũk kuvurana labĩ cĩk ẽẽn baabaa cĩk uungni teddiowa manẽẽnĩy ĩcĩ et cĩ võõrĩ thĩnĩn cĩ ẽlẽmacianĩ.”

Ẽdẽcĩ Naomi ethei ne, “Bĩtõ kalawan cannĩ.” 3 Ma balna ngĩ õkkõ avuranni Ruthi ĩcĩ vurut cĩ eet cĩk ẽtẽda labĩ manẽẽnĩy, monogo kẽnnẽ amũda ngĩ ẽẽn mana cĩ Boathĩ kir, et cĩ aku kabicoca cĩ Elimẽlẽĩ.

4 Ma balna ngĩ ũtũngek Boathĩ Bẽtẽlẽhẽm, ĩthõng ũũk mana cĩnnĩ, ũũk ĩthaa nẽ eet cĩk ẽtẽda labĩ, ĩthõng ethek ne, “Anycĩk Makayyioit kaavu ĩcunung!”

Ẽdẽcĩ eeta cĩk ẽtẽda labĩ ẽẽ, athĩ ne, “Anyĩk Makayyioit kagatani aniitia!”

5 Ma natẽ, ijin Boathĩ makayyioit cĩ eet cĩk ẽtẽda labĩ ẽẽ, ethek ne, “Ẽẽn bũwẽẽcĩ neccie cĩ ngẽnẽ?”

6 Ẽdẽcĩ makayyioiti athĩ ne, “Ẽẽn neccie kalawan cĩ Naomi cĩ balna iriowa kĩ ĩnõõnõ looca cĩ Mõabĩ. 7 Aku nẽ ajinna etheca ne, ‘Anya kõwõb eet cĩk ẽtẽda labĩ, kĩĩ katĩ kuvurana labĩ cĩk ẽẽn baabaa manatõ, ĩthõng anya kẽbẽra labĩ cĩk atdukai looc cĩk aluccie.’ Aticanni nẽ volotin vẽlẽk, ngaatĩ yoko abĩlnĩ nẽ tiic kĩdĩĩc, ĩthõng uyuwuth tuggwa.”

8 Ma natẽ, ũũk Boathĩ ĩcĩ Ruthi, ĩthõng ethek ne, “Thĩrar thõõth cĩ kaduwaci na doo cannĩ, nyĩ õkkõ avurannie mana ĩmmanĩ. Avvu ngato ũrũmtẽ kĩ ticcianniok cĩganĩk cĩk ngayyik wo. 9 Tahamĩk mana ngĩtĩ etedinie kõdõõtĩ, ĩthõng icinu ngĩtĩ etedinie ngaay, ĩthõng owobu ngaay. Kuduwaha viyyio na kõdõõt cĩkkõ vẽlẽk, kithii cĩ awumnyi aniitia. Ĩthõng mĩ arukci kõr, bĩt wũd maam cĩk itillik ticcianniowa ijjionya ẽẽ.”

10 Ma balna ngĩ athĩrar Ruthi thoothonniok cĩkkõ wo, akat kuthungti, ĩthõng ulul nguum cĩnnĩ, kĩĩ kijin Boath kennek ne, “Nyia woccia gõõ dĩmana jurrung thuutia aneeta doo cĩ looc cĩ rẽẽng kaganoko õrrõt noko wo?”

11 Ẽdẽcĩ kẽnnẽ Boathĩ athĩ ne, “Kĩthĩrara na gii vẽlẽk wũ balna adĩmaneei niia kinyik cunni, ngaatĩ balna thẽk adaaknĩ maac cunnie. Ĩthõng naboo kĩthĩrara gõõl cĩ ũũngnĩcẽ niia baaba kĩ yaaya kĩ looc cunni, ĩthõng ikiyyia ũrũmtewu kĩ eet cĩk ngaanĩ ũrũmtẽ balna ĩcowu. 12 Anyĩk woccia Makayyioit Nyekuc cĩ Ĩthraĩlĩ cĩ balna akuunie niia behintia cĩnnĩ ẽẽ, kũdũmani aniitia jurrung, nyatarka thõõth cĩ adĩmani wo.”

13 Ma natẽ, ethek Ruthi ĩnõõnõ ne, “Makayyioit cannĩ, kamui woccia na ngĩ kaavẽ thẽk alna acĩnna niia aneeta thĩnĩna cĩ alalĩ dõõkĩthĩ. Amanymanyana niia aneeta, nyatarka othoothĩca thĩnĩna cĩ alalĩ, kõdẽ woyyia thẽk ngĩ athii cĩ keeni ticciannioit cunni buu.”

14 Ma balna daintia, ũtũvvũ Boathĩ Ruth ethek ne, “Ijjia kuduktõy. Irie ahat cĩ avaadiay coo, ĩthõng nyũlanek diati cĩ ẽmmẽdẽ wo.”

Ngaatĩ aku aavẽ Ruthi loota arũmẽẽnĩ kĩ eet cĩk ẽtẽda labĩ ẽẽ, ĩthõng aanyĩk Boathĩ ĩnõõnõ labĩ cĩk avaaddi kadak. Ma natẽ, adak Ruthi labĩ kĩcca kinyigia õõgĩ. 15 Ma balna imiirie Ruthi ũũk iticanõy naboo, ikiyyia uduwak Boathĩ ticcianniok cĩk maacĩk cĩgĩnĩk ethek ne, “Anycĩk Ruth kẽbẽra labĩ cĩk atdukai looc mũũracĩy, nyĩ egerenyecu ĩnõõnõ. 16 Ĩthõng thĩ, ĩdĩmta labĩ õõgĩ mũũracĩy, ĩthõng ũtũngtẽĩ ĩnõõnõ loota. Anycĩk ĩnõõnõ kẽbẽra, ĩthõng nyĩ egerenyecu!”

17 Ĩthõng thĩ, iticanõy Ruthi natẽ tub, ma balna ngĩ athũwana nẽ labĩ jiatĩn nĩcẽ, abbĩththĩ kẽnnẽ vẽlẽk locibiro. 18 Ma natẽ, õdõng nẽ labĩ ũũwĩ õlõõ cĩ gaalawu, ngaatĩ õkkõ acĩnĩ kinyik cĩnnẽ labĩ cĩk balna avurana nẽ. Ma natẽ, ũũk naboo aanyĩk Ruthi kinyik cĩnnĩ dainit cĩ balna anyigia nẽ balna ngĩ ĩcaa nẽ.

19 Ma natẽ, ijin kinyik cĩnnẽ ĩnõõnõ ethek ne, “Avurrani kette niia kõr coo looc ngatdang? Ĩthõng aticannie kette niia kõr coo ngatdang? Anyĩk Nyekuc kagatan et cĩ elli aniitia wo!”

Ngaatĩ aduwacĩ Ruthi kinyik cĩnnĩ et cĩ anyi ĩnõõnõ kuvuranõy wo. Ethei balna nẽ Naomi ne, “Kavurrannie viyyio mana cĩ et cĩ athĩ thar Boath.”

20 Ngaatĩ ẽthẽcĩ Naomi kalawan cĩnnĩ ne, “Anyĩk Makayyioit kagatan ĩnõõnõ! Atamatĩhet Makayyioiti ageeta cĩk ngaanĩ karũgĩ wo, kĩ eet wũgac wũk balna adaaitõ buu.” Ĩthõng naboo ĩĩ ne, “Ẽẽn Boathĩ tionnioit cĩnac kir, ẽẽn nẽ woccia et cĩ agamnyet, ĩthõng itirria dõõlĩ cĩk kõrõõk cĩnac.”

21 Ma natẽ, ĩthĩ Ruthi cĩ balna aku looca cĩ Mõabĩ ne, “Etheca viyyio nẽ aneeta buu ne, ‘Ũrũmtẽ kĩ ticcianniok cĩganĩk gii ngĩ edeciay teedinetĩ.’ ”

22 Ma natẽ, ethek Naomi kalawan cĩnnĩ ne, “Doolec cannĩ, mayya woccia niia ngatĩ iriowu kĩ ticcianniok cĩgĩnĩk cĩk ngayyik, nyatarka mĩ õkkõ mana cĩ et cĩ rẽẽng, kõdẽ katĩ ngĩ õkkõ awumnyi eeti ĩmma.”

23 Ĩthõng thĩna, aavu Ruthi uvuranõy ĩthĩ õjõõn ĩcĩ ticcianniok cĩk ngayyik cĩk Boathĩ manatõ, gii balna ngĩ edecciay teedinetĩ vẽlẽk. Ĩthõng thĩ, wathinniowẽy nĩĩkẽ, arũmẽ balna Ruthi kĩ kinyik cĩnnĩ.