Ruth 1

Nyaraga cĩ

Ruthi

Uluugi Elimẽlẽĩ eet cĩk kõrõõk cĩnnĩ ũũwĩ Mõaba

Wathinniowẽy wũk balna agamĩ eeta cĩk ẽtẽd thoothonniok looc cĩ Ĩthraĩlĩ, utdukwuak balna butuny looc, nyatarka ẽẽn lõõcĩ kõr õrrõt, ngaatĩ ĩngannĩ eeti ĩmma õlõõ ĩcĩ gaalawu cĩ Bẽtẽlẽhẽmĩ looca cĩ Yudaa, ũũngnĩcẽ looc cĩnnĩ, ĩthõng ũũk ĩcĩ looc cĩ athĩ Mõab, ĩthõng abaak nõ natẽ kĩdĩĩc, iriok balna nẽ kĩ ngaa cĩnnĩ kĩ lõgõõ cĩgĩnĩk ramma. 2 Athĩ balna thar cĩk et nĩcẽ Elimẽlẽk, ĩthõng athĩ ngaa cĩnnĩ Naomi. Athĩ thaaryiok cĩk lõgõõ cĩgĩk cĩk ẽẽn ramma wo, Mahalõn kĩ Kilion. Ẽẽn balna nẽẽgẽ eet cĩk tatũk cĩ Evrathĩ cĩk avvu Bẽtẽlẽhẽma looca cĩ Yudaa. Ma balna ngĩ arawaai nẽẽgẽ Mõab wo, õõt abaaitõ natẽ.

3 Ngaatĩ aku adaaknĩ Elimẽlẽĩ maac cĩ Naomi, ĩthõng ĩthĩ Naomi bõyya, ĩthõng ũtũngẽẽĩ Naomi lõgõõ cĩk ẽẽn ramma ẽẽ. 4 Ma natẽ, ivitia itihit lõgõõ cĩk ẽẽn ramma ẽẽ, ngaay cĩk Mõabĩ. Atik balna ĩmma bũweec cĩ athĩ Õrpa, ĩthõng itik ĩmma cĩ athĩ Ruth. Ma balna vurtia cĩ abaaktĩ nẽẽgẽ natẽ erkinyiay ĩcĩk ẽẽn õmmõtõ, 5 ivitia adaaitõ Mahalõnĩ kĩ Kilion buu, ngaatĩ ũũngnothĩcẽ Naomi nẽdõ kothii dõõlĩ, kõdẽ maaca.

Imiiryie Naomi kĩ Ruth õõt looca cĩ Yudaa

6 Ngaatĩ athĩknĩ Naomi looca cĩ Mõabĩ ngĩ athĩ ne, ikiyyia ẽẽl Makayyioiti eet cĩgĩnĩk looca cĩ Yudaa ngatĩ anyĩcẽ kibiritõ manẽẽna naboo. Ma natẽ, ivitia ĩdĩmantothĩk Naomi kĩ kalawanẽt cĩgĩnĩk wo, rammatuguan, nyatarka adiim Naomi ngĩ amiiri õkkõ looca cĩnnĩ. 7 Ma balna ngĩ ũtũngtek nẽẽgẽ ngĩtĩ aatẽ ẽẽ, ĩtĩngathõ nẽ kĩ kalawanẽt cĩgĩnĩk õõt itihit gõõl cĩ looc cĩ Yudaa.

8 Ma gõõla, ũũk ethek Naomi kalawanẽt cĩgĩnĩk ẽẽ, ne, “Imiiryi õõt korookjiowẽy ĩcĩk ngaaginu. Anycĩk Makayyioit kithimatiwung agiitia kĩ balna ngĩ eeginnu niigia thimattiak maacuanĩy wuguk wũk balna adaaitõ kĩ aneeta buu. 9 Anycĩk Makayyioit keelung agiit codoi codoi, umuddia maacua õõgĩ, kĩĩ katĩ aavut jurrung korookjiowẽy cuguk.”

Ma balna ngĩ ĩthaawĩk Naomi ĩnõõgõ gõõl wo, alu kẽggẽ Õrpa kĩ Ruth õrrõt. 10 Ma natẽ, entek kẽnnẽ nẽẽgẽ ĩnõõnõ ne, “Athii tõ! Kiirioit thẽk kõõt eetĩnẽy cugunik.”

11 Ẽdẽcĩ kẽnnẽ Naomi ĩnõõgõ ethei ne, “Kalawanẽt cĩganĩk, imiiryi õõt korookjiowẽy cuguk! Ngaanĩ yoko thẽk õwõbjangũ niigia aneeta nyia? Ngaanĩ woccia thẽk karita na dõõlĩ cĩk maacĩk õõgĩ cĩk woccia alĩnna kivitia kagamtung agiitia? 12 Kalawanẽt cĩganĩk, imiiryi õõt korookjiowẽy cuguk. Ithii katĩ eeti cĩ ngaanĩ agamnya aneeta cĩ katanganya õrrõt kaganoko wo tõ. Kõdẽ woyyia kagama eeti ĩmma aneeta katĩ baal, ĩthõng kitiryiaha dõõlĩ cĩk maacĩk, 13 erewinu woccia kuumuc kitilithia nẽẽgẽ, kĩĩ katĩ kivitia kagamtunga? Athii tõ, kalawanẽt cĩganĩk! Awuci thoothiowa cĩganniek ijiar cuguk, nyatarka ĩdĩmana aneeta Makayyioiti buth.”

14 Ĩthõng utuluthõ naboo õrrõt. Ngaatĩ ĩthaawĩcẽ Õrpa kinyik cĩnnĩ gõõla, ĩthõng thĩ, kẽnnẽ balna odongnothi Ruthi Naomi.

15 Ma natẽ, ikiyyia ethek Naomi Ruth ne, “Cĩn da nõõnõ, imiirie nyigarnu cunnie ũũk ĩcĩ eet cĩgĩnĩk kĩ ĩcĩ nyekucnya cĩgĩnĩk! Athii niia cĩ iriokcu kĩ ĩnõõnõ nyia?”

16 Ẽdẽcĩ kẽnnẽ Ruthi athĩ ne, “Nyĩ adangeca aneeta kutungeei aniitia, ĩthõng kũwa õlõõ cĩnang! Kõkkõ katĩ na ngatĩ õkõyyẽ niia, kaavẽ katĩ na ngatĩ aavẽ niia, ẽẽn katĩ eeta cugunniek eet cĩganĩk, ẽẽn katĩ Nyekuci cunnie Nyekuc cannĩ. 17 Kadaai katĩ na looca cĩ adaaknẽ niia, ĩthõng kadawẽ natẽ. Anyĩk Makayyioit kuuka aneeta õrrõt katĩ ngĩ kuungnici aniitia, anyĩk daaĩth dõ kengeret ageeta!” 18 Ma balna ngĩ acĩn Naomi Ruth ngatĩ ĩĩdĩ adiim ngĩ iriok kĩ ĩnõõnõ ẽẽ, ĩthõng ĩthĩnga aduwaai nẽ ĩnõõnõ kimiirie.

19 Ma balna thĩ ngĩ õwõ nẽẽgẽ, ĩthõng õdõlanit Bẽtẽlẽhẽm, ẽbẽlbẽl kẽnnẽ eeta vẽlẽk ngatĩ acĩnĩ ĩnõõgõ. Ngaatĩ ajinõõnĩ ngaay nyaguana athĩnnĩ ne, “Ẽẽn woccia thẽk coo Naomi dĩdĩ?”

20 Ngaatĩ aduwacĩ Naomi ĩnõõgõ ẽthẽcĩ ne, “Nyĩ ngaanĩ naboo avvũyyangũ athĩnangũ ne, Naomi! Utuvvuyyiangũ enteangũ ne, Maara, nyatarka anyĩk Nyekuci cĩ Tiiri cĩ Ijiar vẽlẽk rũgẽt cannĩ kĩ gẽrtha. 21 Kayai balna kaal vẽlẽk baa ngĩ kĩngathi ngato, ĩthõng yoko õbõdahia Makayyioiti kõrõõk athĩnẽy kaganoko. Ĩthõng ngaanĩ avvũyyangũ athinnu ne, Naomi noko nyia? Anya balna aneeta Makayyioiti canan, ĩthõng itionaca aneeta Nyekuci cĩ Tiiri cĩ Ijiar vẽlẽk thoothonniok cĩk gerthek wak wo.”

22 Ĩthõng thĩna, õbõda balna Naomi looca cĩ Mõabĩ, iriowa kĩ kalawan cĩnnĩ Ruth, bũwẽnyĩ et cĩ looc cĩ Mõabĩ. Arayyiak balna nẽẽgẽ Bẽtẽlẽhẽm balna ngaanĩ ẽtẽrẽhanĩ eeta teedinet cĩ labĩ cĩk athĩ barli thõng.