Thõõth cĩ karĩcananĩ ijjio
22
Ĩthõng õthõõth Nyekuci ĩthĩ ne, “Ma ngĩ õgõrõth eeti ĩmma tõmõt, kõdẽ atheet, ĩthõng apak, kõdẽ ũtũwõĩ ĩnõõnõ, adũman koccia thẽk nẽ tĩĩn tur tõmõta codoi, ĩthõng adũman koccia thẽk nẽ atheet athaa wec atheeta codoi.2 “Ma ngĩ ijiowuay goryiaiti cĩ ẽẽkta ciitha, ĩthõng uuke nẽ kadaak, athii eeti cĩ aruk ĩnõõnõ ẽẽ, cĩ kanganyĩ, 3 ĩthõng thĩ, ma ngĩ aruk nẽ goryiait waath, agamnyi katĩ baatĩ ciitho, nyatarka daaĩth cĩnnĩ.
“Adũman koccia thẽk goryiaiti gii cĩ õgõrõth nẽ, ma ngĩ kothii gii cĩ adũmanĩ, ũũtẽnẽ koccia thẽk ĩnõõnõ eeta kĩĩ nyakapanait kũdũman gõr cĩnnĩ wo.
4 “Ma ngĩ ijiowuay tõmõt, kõdẽ thigiriecĩ, kõdẽ atheetĩ cĩ õgõrõth goryiaiti ẽẽ, ngĩ nga arũgĩ goryiakta, adũman koccia thẽk nẽ ngõnana ramma.
5 “Ma ngĩ anyĩk eeti ĩmma tĩĩn cĩgĩnĩk kegeco mana cĩnnĩ, ĩthõng anyĩk ĩnõõgõ kõõt mana ĩcĩ et ĩmma, adũman koccia thẽk nẽ kaal cĩk abũnna cĩk mana cĩnnĩ cĩk ẽgẽrẽthan nẽẽgẽ mana, kõdẽ kẽẽn cĩk vĩnõwak cĩk et ĩmma.
6 “Ma ngĩ ũtũũth eeti mana cĩnnĩ, ĩthõng ũũk gua manatõ ĩcĩ et ĩmma, ĩthõng ũtũũth mana cĩ et nĩcẽ, ĩthõng ũtũũth labĩ cĩk akula, kõdẽ cĩk eteddiay balna, ĩthõng nga cavure. Eeti wũ ẽtẽrẽhanĩ guo adũman koccia thẽk nẽ gẽrẽthaniniet coo.
7 “Ma ngĩ ẽlẽm eeti ĩmma ngĩ agam nyarobinya cĩk et ĩmma, kõdẽ kaal õõgĩ, ĩthõng õgõrõth goryiaiti ciitha ĩcĩnnĩ, ma ngĩ ijiowuay goryiakta, adũman koccia thẽk baatĩ kaalu ngõnana ramma. 8 Ĩthõng ma ngĩ athii goryiaiti cĩ ijiowuay, eeti wũ balna itiang ijjio õkkõ koccia thẽk nẽ lokika, ĩthõng natẽ abũnna eeti cĩ ẽtẽd thõõth ma ngĩ amũda gõõl cĩ ogorthini eeti, kõdẽ nga kõgõrõthõy. 9 Thõõtha ĩcĩ õthõõthõnẽ eeta thõõth cĩ ijjio cĩk õgõrthẽ, ma ngĩ ẽẽn tõmõt, kõdẽ thigirie, athaa, ceremua, kõdẽ kaal õõgĩ cĩk athii. Ma ngĩ ĩthĩ eeti ĩmma ne, ‘Ẽẽn ijjio cĩkkõ cĩganĩk,’ õvvõ koccia thẽk nẽẽgẽ vẽlẽk lokika. Eeti cĩ katĩ aduwa eeti cĩ lokikowo athĩ ne, õgõrthẽ nẽ, ĩnõõnõ cĩ õgõrthẽ adũman koccia thẽk baatĩ kaalu, ngõnana ramma.
10 “Ma ngĩ ẽlẽm eeti ĩmma cĩ abakanonu kũthũtĩ thigiriec, tõmõt, ẽẽth, kõdẽ gii ĩmma cĩ et cĩ abakanõy kũthũtĩ jurrung, ĩthõng adaak codoi cĩnĩng, kõdẽ uwurtothik gimma codoi cĩnĩng, kõdẽ ũũwĩ gimma codoi cĩnĩng gõõla, ĩthõng kothii balna et cĩ acĩn, 11 anyĩk niia et kũũk, ĩthõng ũbũtan Nyekuc Makayyioit ĩthĩ nẽ ne, ‘Nga na kõgõrõth gimma cĩ et ĩmma.’ Abũnna ma ngĩ ẽlẽmĩ baatĩnnẽ thõõth coo, ĩthõng athii eeti neccie cĩ adũman ĩnõõnõ. 12 Ĩthõng ma ngĩ õgõrthẽ thigiriecĩ, kõdẽ tõmõt, kõdẽ ẽẽth ĩcĩ et cĩ abakanõy kĩ ĩnõõnõ, adũman koccia thẽk nẽ baatĩnnĩ. 13 Ma balna da ma ngĩ aruk kelegiti thigiriec, kõdẽ tõmõt, kõdẽ ẽẽth, abũnna ma ngĩ ayaha eeti cĩ abakanonu ẽẽ, kiding cĩ anyigiay, kĩĩ katĩ kagawẽ, ĩthõng athii nẽ cĩ adũman baatĩ kaalu.
14 “Ma ngĩ alawa eeti ĩmma tõmõt eta cĩ abakanõy, ĩthõng uwurtothik tõmõt, kõdẽ adaak, ma kothii baatĩnnĩ natẽ, adũman koccia thẽk katĩ nẽ baatĩ tomoto. 15 Ĩthõng thĩ, ma ngĩ aavĩ tõmõt ĩcĩ baatĩnnĩ, ĩthõng ma ngĩ adak gimma tõmõt, athii eeti cĩ alawa tõmõt ẽẽ, cĩ adũmanĩ. Ma da ngĩ evyi tõmõt, ĩthõng ũdũman nẽ baatĩ tomoto, adũman dũmaninietĩ baatĩ tomoto.
Gõõl cĩ kaatẽ kĩ eet jurrung
16 “Ma ngĩ othoothĩk eeti bũweec cĩ nga kũrũcẽ, cĩ nga kataguthõ kĩ et. Ĩthõng ataguuthõ kĩ ĩnõõnõ, aruk koccia thẽk nẽ ẽthẽn cĩ bũweec nĩcẽ, ĩthõng itik ĩnõõnõ. 17 Ĩthõng ma ngĩ abũrĩ baatĩnnẽ ĩnõõnõ kitik bũweec, adũman koccia thẽk nẽ baatĩnnĩ nyarobinya cĩk aduwõy kĩ bũweec cĩ nga kataguthõ kĩ et.
18 “Nyĩ anyiccu ngaa cĩ ẽẽn ngarĩ kĩ cĩ atĩman kagũraa kũrũk.
19 “Eeti ĩmma cĩ aar tang, ẽẽth, atheet kĩĩ ngaa cĩnnĩ, aruwue koccia thẽk nẽ.
20 “Eeti ĩmma cĩ otodongothi nyekucnya cĩk athii cĩ ẽẽn dĩdĩ, cĩ athii cĩ ẽẽn Makayyioit Nyekuc, aruwue koccia thẽk nẽ.
21 “Nyĩ ĩtdanynyu niigia et ĩmma cĩ rẽẽng, kõdẽ aratannu, agaac ĩĩtõ ne, eeginnu balna niigia eet cĩk rẽẽng looca ĩcĩ Ijibi.
22 “Nyĩ ĩtdanynyu niigia ngaa cĩ bõyyĩ, kõdẽ boyyioit. 23 Ma ngĩ ĩdĩmantu niigia, ĩthõng utuluthia nẽẽgẽ aneeta, kathĩrari katĩ na ulua cĩnĩng. 24 Ĩthõng katĩ kavaraca na, ĩthõng kuruwung agiitia jora. Ẽẽn katĩ ngaay cuguk ngaay cĩk bõyyĩk, ĩthõng ẽẽn katĩ doolia cuguk boyyiok kothii baajigi.
25 “Ma ngĩ anyi niia nyarobinya et codoi cĩ ẽẽn ngĩjũrrait kagam, kõrgẽna ĩcĩ eet cĩganĩk nyĩ aavẽ kĩ eeti cĩ anyi et nyarobinya, ĩthõng idiim nyarobinya cĩk meelĩk naboo. 26 Ma ngĩ eyewu niia cẽrẽm cĩ et cĩ abakanonu cĩ ẽẽn ngĩjũrrait cĩ agam nyarobinya cugunik kĩ baa ma ngĩ abũtan nẽ, a ne, adũmanni katĩ nẽ aniitia, bõdẽẽĩ ĩnõõnõ cẽrẽm nga kokolothĩk kõrra, 27 nyatarka cẽrẽm cĩ abungi nẽ ẽlẽ cĩnnĩ dõ neccie. Nyia naboo ĩmma cĩ õõngẽ nẽnẽ? Ma ngĩ utuluiha nẽ aneeta keeli katĩ na ĩnõõnõ, kedeci katĩ na ĩnõõnõ, nyatarka keeni na tamatioit.
28 “Nyĩ othoothi niia thõõth cĩ gerthe ĩcĩ Nyekuco, kõdẽ, aciini et cĩ ẽẽn gaalinit cĩ eet cuguk.
29 “Nyĩ ajuracu Nyekuc anyinit deheruanĩy ĩcuguk, kõdẽ ngooroc kĩ mẽrtẽ.
“Nya niia aneeta Nyekuc ngeruni cunni cĩ ẽẽn abuu. 30 Ĩthõng naboo buu noko abuuẽta cĩk tĩĩn cugunik kĩ athaa, anyĩk ĩnõõgõ kaavutõ kĩ ngaagĩ iinyia tũrgẽrẽm, ĩthõng anya aneeta ĩnõõgõ kõrra cĩ ẽẽn turgi.
31 “Abũnna thẽk ngĩ eeginnu niigia eet cĩganĩk cĩk callĩk. Ĩthõng nyĩ adakcu kiding cĩ tango, kõdẽ ẽẽth, kõdẽ atheet cĩ adak kelegiti, utdukteei kũrthĩĩ.”