Ngirantiok cĩk thõõth cĩ edeemothi kĩ tamati
23
Ĩthõng õthõõth Nyekuci noko athĩ ne, “Nyĩ athaani niia thoothonniok cĩk ẽẽn võlõng eeta. Nyĩ aduwa niia thõõth cĩ ẽẽn võlõng lokika cĩ ẽẽlẽ et cĩ gerthe. 2 Nyĩ owobi niia meelitin katĩ mĩ adĩman nẽẽgẽ thõõth cĩ gerthe. Nyĩ aduwa niia thõõth cĩ ẽẽn võlõng lokika cĩ ẽẽlanẽ meelitin thõõtha ĩcĩ gerthe. 3 Ĩthõng nyĩ ẽẽla niia et cĩ ẽẽn ngĩjũrrait ngĩ aduwa thõõth cĩ ẽẽn võlõng, kĩĩ katĩ kẽẽl ĩnõõnõ katĩ ma ngĩ aavĩ nẽ lokika.4 “Ma ngĩ icinu niia tõmõt, kõdẽ, thigiriec cĩ miroit cunni ngĩ õgõrgõr, bĩtĩ miirõĩ ĩnõõnõ yawothĩk miroit cunni. 5 Ma ngĩ icinu niia thigiriec cĩ et ĩmma wũ aaburnecci aniitia, ittia loota, nyatarka adĩngdĩngĩ ijjio, nyĩ uungni ĩnõõnõ natẽ, abũnna ma ngĩ ẽẽla niia thigiriec kĩ baatĩnnĩ.
6 “Nyĩ ẽpẽkaneei niia eet cugunik cĩk ẽẽn ngĩjũrra thõõth katĩ ngĩ eteedi thõõth. 7 Nyĩ õvõlõngẽ niia et ĩmma thõõtha ĩcĩ ẽẽn võlõng lokika, ĩthõng nyĩ arui et cĩ amĩrĩ kadaak, nyatarka kuukci katĩ na Nyekuci aniitia.
8 “Nyĩ elemi niia taabiniet, nyatarka anyi taabinieti et cĩ acĩnẽ, kĩĩ ruben thõõtha ĩcĩ abũnna õrrõt, ĩthõng ũtũwũ thõõth cĩ ẽẽn dĩdĩ kĩ võlõng.
9 “Nyĩ adĩmannu eet cĩk rẽẽng buth, nyatarka balna eeginnu niigia eet cĩk rẽẽng looca ĩcĩ Ijibi.
Ngirantiok cĩk ayuwuthi lõõcĩ kĩ Kõr cĩ Yuwuthono
10 “Tẽẽda labĩ cugunik erkinya tõrkõnõm manẽẽnĩy cugunik, ĩthõng ẽtẽda kaal vẽlẽk cĩk akula, 11 ĩthõng thĩ, erkita ĩcĩ ẽẽn tũrgẽrẽm anyĩk manẽẽn kuyuwuthit. Abũnna ma ngĩ ẽtẽda eeti cĩ apĩrna kaal õõgĩ natẽ, ĩthõng kẽlẽgẽ cĩk bõõnak buu abũnna ngĩ ẽggẽ natẽ. Dĩman manẽẽn cugunik kĩ kẽẽn cĩk vĩnõwak kĩ cĩk olivi buu kĩyokowo.
12 “Ticcanõy wathinniok tõrkõnõm, ĩthõng nyĩ aticannie niia lõõcĩ tũrgẽrẽm, kĩĩ katĩ kuyuwuth tõmõt kĩ thigiriec kĩ nyakapanait cĩ arittiay kĩ et cĩ rẽẽng ciitha ĩcunni.
13 “Ĩthĩhĩt thoothonniok vẽlẽk cĩk kaduwacung balna na Makayyioiti, nyĩ alayyu nyekucnya õõgĩ, nyĩ thẽk naboo abuungnyu thaaryiok cĩgĩk.
Peyianĩn cĩk obbitik cĩk ẽẽn iyyio cĩk erkitak
14 “Abũnna ma ngĩ avvunnu niigia vẽlẽk ngatĩ odoi erkita alaac peyianĩn ngõnana iyyio.
15 “Adait niigia Peyian cĩ Ahat cĩ Avaadiay cĩ Kothii Nyĩgĩt,a uduit ahat cĩ avaadiay cĩ adĩmaniay kothii nyĩgĩt iinyia tũrgẽrẽm, kĩ balna ma ngĩ kuduwawung na agiitia. Ĩdĩmanit gii coo itina ĩcĩ nyĩĩlok cĩ Abibi, nyatarka ẽẽn nyĩĩlok wũ balna avvunnu niigia ngatĩvõrĩ looca ĩcĩ Ijibi neccie.
“Nyĩ avvunnu alayyiangũ aneeta katĩ mĩ athii cĩ ayahanu niigia anyinit.
16 “Adait Peyian cĩ Teedinet cĩ owu katĩ mĩ nga ẽtẽdanu labĩ cuguk cĩk ootinu manatõ.
“Adait Peyian cĩ Teedinet cĩ aturna katĩ mĩ edeciay erkita, katĩ mĩ ẽtẽdanu niigia labĩ kĩ lõthĩhẽ kĩ nyĩmẽ kĩ culumaddi cuguk manẽẽnĩy ĩcuguk.
17 “Erkita ngõnana iyyio abũnna thẽk ma ngĩ avvu eeta vẽlẽk cuguk cĩk maacĩk ngatĩ odoi kivitia kalayyia aneeta, Makayyioit cĩ keeni Tiiryioit.
18 “Nyĩ anya biyyie cĩk anyintiak aneeta kĩ ahat cĩ avaadiay cĩ ayak nyĩgĩt.
“Mũrecĩ cĩ kelegit cĩ anyĩwothĩca aneeta kõrra ĩcobbi athii cĩ uungnothi, ĩĩthõng kĩĩ ngerenniet.
19 “Yahak niia labĩ cĩk dĩhĩmĩk cĩk ootinu cĩk ẽẽva niia tõdõway Ciith cĩ Makayyioit Nyekuc cunni. Nyĩ aai nyion cĩ dĩcĩ iranei ĩcĩk yaatĩnnĩ.
Adĩmaneei katĩ anjĩlõ cĩ Makayyiokto gõõla
20 “Kitioni na anjĩlõ kũũk ĩcĩ owu, kĩĩ katĩ kebewung agiitia ma ngĩ owoyyu niigia, ĩthõng kĩĩ kayahawung nẽ agiitia ngatĩ kadĩmaneccung na agiitia. 21 Ĩthĩhĩt niigia ĩnõõnõ, ĩthõng ithiktu jurrung ĩnõõnõ, nyĩ uukonu kĩ ĩnõõnõ, nyatarka kitiona na ĩnõõnõ athii katĩ nẽ cĩ uungnicung agiitia katĩ ma ngĩ uukonu niigia kĩ ĩnõõnõ. 22 Ĩthõng ma ngĩ ithiktu niigia ĩnõõnõ, ĩthõng ĩdĩmantu gii vẽlẽk cĩ kaduwacung na, kuukona katĩ na kĩ mĩrõk cuguk. 23 Õkkõ katĩ anjĩlõ cannie ĩcĩ owu, ĩthõng ayawung agiitia uuwung looca ĩcĩ eet cĩk Amõrĩ, Hiiti, Perithiti, Kananĩ, eet cĩk Hiviti, kĩ Jebu, ĩthõng kagĩĩra katĩ na ĩnõõgõ. 24 Nyĩ ululenu alayyu nyekucnya cĩgĩk, ĩthõng nyĩ eyeheththu lawinit cĩnĩng kĩ tiiciok cĩgĩk. Ẽgẽrẽthanit nyekucnya cĩgĩk, ĩthõng ilibtu bĩĩyẽn cĩk nyekucnya cĩgĩk. 25 Ma ngĩ alayangũ niigia aneeta, Makayyioit Nyekuc cunung, kagatanung katĩ na agiitia kaanyung ahat kĩ maam, ĩthõng kẽnyẽhẽ katĩ na ngatĩvõrĩ mõõrĩth ĩcunung vẽlẽk. 26 Looca ĩcunung kothii ngaa cĩ katĩ ẽthẽcana gõõnĩ, kõdẽ aavĩ kothii doolec. Kaanyung katĩna agiitia rũgẽt cĩ wuuni.
27 “Kaanyi katĩ na eet wũk aburnung agiitia kiviryiea aneeta ĩcĩ owu ĩcunung, kẽyẽha katĩ na thoothonniok cĩk atdirlangan eet wũk uukonu kĩ agiitia, ĩthõng kaanyi katĩ na mĩrõk cuguk vẽlẽk kuuktie, ĩthõng ivirit ĩcunung. 28 Kaanyi katĩ na mĩrõk cuguk kabarritit, kingka katĩ na eet cĩk Hiviti, Kananĩ, kĩ Hiiti katĩ mĩ ovvoyyu niigia gõõla cunung. 29 Athii katĩ na cĩ kumuri ĩnõõgõ erkita ĩcodoi, nyatarka aavĩ woccia lõõcĩ kaganoko, ĩthõng mẽẽlĩ katĩ kẽlẽgẽ cĩk bõõnak ĩcunung õrrõt. 30 Kingka katĩ na ĩnõõgõ kĩdĩĩc kĩdĩĩc ĩcunung, ĩthõng anyciwu niigia eet cuguk kitilithia kĩĩ tiirti, ĩthõng agamit looc.
31 “Kadĩmani katĩ na lõkõrẽnya cĩk looc cunung Bũlũca ĩcĩ Merihi, kõõt kõdõlanit tõõn cĩ Bũlũc cĩ Mediterenia cĩ looc cĩ Vilithini, ĩthõng ẽtẽrẽhanĩ baatha kõdõlan Lĩĩl cobbi cĩ Yuvarẽthĩ. Kaanyung katĩ na agiitia eet cĩk abaak looca nĩcẽ, ĩthõng umuryu niigia ĩnõõgõ ngatĩvõrĩ. 32 Nyĩ adakcu ngẽrẽmngẽrẽm kĩ ĩnõõgõ, kõdẽ kĩ nyekucnya cĩgĩk. 33 Nyĩ anyiccu eet nĩĩko kabaaitõ looca ĩcunung, kõdẽ katĩ anyung nẽẽgẽ agiitia ẽgẽrẽthanit thõõth cannĩ, nyatarka ngĩ alayyu niigia katĩ nyekucnya cĩgĩk ẽgẽrẽthannung katĩ nẽẽgẽ agiitia.”