Nyakapanak cĩk Heburu
21
Ĩthõng ĩthĩ Makayyioiti Nyekuci ne, “Thoothonniok cĩk ngiranak cĩk katĩ aduwaai niia ĩnõõgõ cĩkkõ. 2 “Ma ngĩ ũtũũwa niia nyakapanait cĩ ẽẽn Heburenit, abũnna ma ngĩ aticanothici aniitia erkinya tõrkõnõm. Ma katĩ erkita ĩcĩ ẽẽn tũrgẽrẽm anyĩk thẽk niia ĩnõõnõ kaavu kaganoko, ĩthõng athii nẽ cĩ adũmanni aniitia gimma. 3 Ma da balna nga nẽ kitiwõy balna ngĩĩ nẽ nyakapanait cunni, abũnna ma ngĩ anyi ĩnõõnõ dõ kũũk, ĩthõng thĩ, ma da balna ngĩ itiwõõy nẽ itin nĩcẽ, anyĩk niia ĩnõõgõ vẽlẽk kĩ ngaa cĩnnĩ kõõt. 4 Mĩ anyĩk makayyioiti cĩnnẽ ĩnõõnõ ngaa, ĩthõng itirria nẽ lõgõõ cĩk maacĩk kĩ dõõ cĩk ngayyik, ẽẽn katĩ ngaa kĩ dõõlĩ cĩk makayyioktak, ĩthõng õkkõ koccia eeti nẽdõ, uungni dõõlĩ cĩgĩnĩk kĩ ngaa cĩnnĩ.5 “Ĩthõng ma ngĩ uduwa nyakapanaiti ĩthĩ ne, ‘Kamĩnani na makayyioit cannĩ, kĩ ngaa cannĩ kĩ dõõlĩ cĩganĩk, ĩthõng kadiimi na keeni nyakapanait kaganoko,’ 6 ĩthõng anyĩk thẽk koccia kũũwĩ makayyioiti cĩnnẽ ĩnõõnõ eetĩnẽy ĩcĩk ẽtẽd thoothonniok. Ĩthõng anyĩk nẽ ĩnõõnõ kĩbĩl natẽ katũga, kõdẽ kitiira, ĩthõng ĩbõõr kĩĩn cĩgĩnĩk. Ĩthõng ĩthĩ nẽ nyakapanait cĩnnĩ kũdũt.
7 “Ma ngĩ ũtũwõĩ eeti doo cĩnnĩ kĩĩ nyakapanait, athii nẽ cĩ uungnothi kaganoko kaavu mĩn kutugu kĩ nyakapanaiti cĩ maacĩ. 8 Ma ngĩ athii makayyioiti wũ baa ẽbẽra ĩnõõnõ cĩ atalneei ĩnõõnõ kĩĩ ngaa cĩnnĩ, ũũta koccia thẽk baatĩnnẽ ĩnõõnõ. Athii makayyioiti cĩnnẽ cĩ ũũtẽnẽ ĩnõõnõ kĩ eet cĩk rẽẽng, nyatarka athii balna nẽ cĩ athũnnĩ thõõth wũ baa aduwaai nẽ ĩnõõnõ. 9 Ma ngĩ ẽbẽra makayyioiti nyakapanait cĩ ngayyi kĩĩ kaanyĩk ngẽrĩnĩ cĩnnĩ, agam koccia thẽk nẽ ĩnõõnõ kaavu kĩ bũwẽnyĩnẽ cĩnnẽ. 10 Ma ngĩ itik makayyioiti ngaa ĩmma, anyi koccia thẽk nẽ ngaa cobbi ahat kĩ ceremua kuduktõy kutugu kĩ gõõ dõõkĩthĩ, ĩthõng agam makayyioiti ĩnõõnõ kaavu kĩĩ ngaa cĩnnĩ. 11 Ma ngĩ athii makayyioiti cĩ adĩmaneei thoothonniok cĩk ẽẽn iyyio wo ĩnõõnõ, anyĩk kaanyĩk thẽk nẽ ĩnõõnõ kũũk kaganoko, ĩthõng athii cĩ adũmaneei nyarobinya makayyioit cĩnnĩ.
Ruwẽẽnĩt kĩ thoothonniok cĩk gerthek
12 “Eeti ĩmma cĩ uuk et ĩmma, ĩthõng uruk ĩnõõnõ, aruwue koccia thẽk nẽ buu. 13 Ĩthõng ma ngĩ ẽẽn wurtõnĩt, ĩthõng athii balna cĩ adiim nẽ ngĩ aruk ĩnõõnõ, ĩthõng anyĩk Nyekuci ĩnõõnõ kadaak, abũnna ngĩ avir nẽ kũũk, ngatĩ katĩ kaduwa na Nyekuci.a 14 Ĩthõng thĩ, mĩ atuk eeti ĩmma et, ĩthõng uruk ĩnõõnõ, aruwue koccia thẽk nẽ buu, ma ngĩ ivir nẽ ũũk ngatĩ todongintio kũũk kulugunyie, eyekcie katĩ nẽ, ĩthõng uruwue.
15 “Eeti ĩmma cĩ uuk baatĩnnĩ, kõdẽ yaatĩnnĩ aruwue koccia thẽk nẽ buu.
16 “Eeti ĩmma cĩ õgõrõth et ĩmma, ĩthõng kĩĩ kũtũwõĩ ĩnõõnõ, kõdẽ aar ĩnõõnõ kĩĩ nyakapanait cĩnnĩ, katĩ mĩ agamẽ nẽ, aruwue koccia thẽk nẽ.
17 “Eeti ĩmma cĩ acĩĩn baatĩnnĩ kĩ yaatĩnnĩ aruwue koccia thẽk nẽ.
18 “Ma ngĩ õyõwõy eeta, ĩthõng õvõc eeti ĩmma gõõnĩ bĩĩya, kõdẽ uuk attia, ĩthõng athii cĩ aruk ĩnõõnõ, ĩthõng thĩ, ma ngĩ apĩrna goonia õõngĩ lobela, 19 ĩthõng eeti wũ uuk gõõnĩ athii nẽ cĩ uuki katĩ ma ngĩ ĩtĩnga goonia, ĩthõng õtõ õtõwõmẽ kẽẽta, adũman koccia thẽk eeti wũ uuk et nĩcẽ wathinniok cĩk tiic cĩnnĩ, kĩ itin cĩ aavẽ nẽ loota ẽẽ, gii ngĩ ũbũna kaakuacĩ cĩnnẽ.
20 “Ma ngĩ uuk makayyioiti nyakapanait cĩnnĩ, cĩ maacĩ, kõdẽ cĩ ngayyi kẽẽta, ĩthõng adaak nyakapanaiti nato noko, uuki koccia thẽk makayyioiti, 21 ĩthõng athii nẽ cĩ edeethinie katĩ mĩ ũbũna nyakapanaiti, ĩthõng ĩtĩnga waathĩna ĩcĩ ẽẽn codoi, kõdẽ ĩcĩ ẽẽn ramma, nyatarka ẽẽn nyakapanaiti coo cĩnnĩ.
22 “Ma ngĩ uukõy eeta ramma, ĩthõng uwurtothik ĩmma uuk ngaa cĩ anyakcie, ĩthõng itirria nẽ doolec nga kũtũbanẽ itini cĩ nga kitirraĩ nẽ doolec cĩnnĩ, ĩthõng ngaanie kuwurtothĩk eeti ĩnõõnõ, kõdẽ doolec õrrõt, adũman koccia thẽk nẽ ijjio cĩk aduwa maac cĩ ngaa coo, kĩ thõõth cĩ aduwa eeti cĩ ẽtẽd thõõth. 23 Ĩthõng thĩ, ma ngĩ odowuay yaatĩnnẽ, kõdẽ doolec õrrõt, eeti cĩ awurutothi ĩnõõgõ ẽẽ, dethineti cĩnnẽ ẽẽn daaĩth kĩ daaĩth, 24 keberec kĩ keberec, nyĩgĩtat kĩ nyĩgĩtat, athiit kĩ athiit, thooc kĩ thooc, 25 tũthẽnẽt kĩ tũthẽnẽt, kaakuac kĩ kaakuac, ngĩtĩ aparaciay kĩ ngĩtĩ aparaciay.
26 “Ma ngĩ uuk eeti ĩmma nyakapanait cĩnnĩ cĩ maacĩ, kõdẽ cĩ ngayyi keberec, ĩthõng õtõkõca ngatĩvõrĩ, anyĩk kũtũngek koccia thẽk nẽ nyakapanait kũũk kĩĩ kũdũman keberec cĩnnĩ. 27 Ma ngĩ iliba nẽ nyĩgĩtat anyĩk kũtũngek koccia thẽk nẽ nyakapanait kũũk kaganoko kĩĩ kũdũman nyĩgĩtat.
28 “Ma ngĩ ikiv olia et ĩmma kadaak, ovoccie koccia thẽk nẽ, ĩthõng athii koccia thẽk kidingi cĩnnẽ cĩ adakcie, ĩthõng athii baatĩnnẽ cĩ adũman gimma. 29 Ĩthõng thẽk ma gõõ akiv olia eet, ĩthõng uduktiak eeta baatĩnnĩ, ĩthõng athii nẽ cĩ arĩcana ole ũwwa jurrung, ĩthõng ma ngĩ ikiv olia et, kõdẽ ngaa kadaak, ovoccie koccia thẽk olia bĩĩyẽnĩy kadaak, ĩthõng baatĩnnẽ buu ovoccie koccia thẽk kadaak. 30 Ĩthõng thĩ, ma ngĩ adiim eeta baatĩnnĩ kũdũmanõy, kĩĩ katĩ kũrũk nẽ, abũnna ma ngĩ aruk nẽ oolo cĩ adiim nẽẽgẽ, kĩĩ katĩ athii nẽ cĩ adaaĩ. 31 Ma ngĩ uruk olia logoo cĩ maacĩ, kõdẽ doo cĩ ngayyi, adĩmanothi koccia dethineti cĩ aduwõy kĩ baatĩ olewo kĩ ole. 32 Ma ngĩ uruk olia nyakapanait cĩ ngayyi, kõdẽ cĩ maacĩ, adũman koccia thẽk baatĩnnẽ makayyioit cĩ nyakapanakto nyarobinya cĩk ẽẽn etĩmma kõmmõtõ, ĩthõng õvõcẽ koccia thẽk olia neccie kadaak.
33 “Ma ngĩ ada eeti ĩmma look, ĩthõng ĩnĩnga adĩĩt ĩnõõnõ, ĩthõng okolothĩk tõmõt, kõdẽ thigiriecĩ ĩcĩtõ, 34 adũman koccia thẽk katĩ nẽ ĩnõõnõ, ĩthõng ĩthĩ tõmõt, kõdẽ thigiriecĩ cĩ adaaĩ ẽẽ, cĩnnĩ.
35 “Ma ngĩ ikiv olia ĩmma ole cĩ et ĩmma, ĩthõng adaak, ũũtẽnẽ nẽẽgẽ vẽlẽk ole cĩ arũgĩ ẽẽ, ĩthõng engerit nyarobinya, ĩthõng engerit nẽẽgẽ kiding cĩ ole cĩ adaaĩ ẽẽ. 36 Ma da thẽk ngĩ agayyi balna a ne, muot olia neccie, ĩthõng athii baatĩnnẽ cĩ arĩcana ĩnõõnõ, adũman koccia thẽk nẽ ole cĩ adaaĩ ẽẽ, ĩthõng ũũwĩ nẽ ole cĩ adaak ẽẽ.”