Tĩrĩthẽntiok cĩk ẽẽn Õmmõtõ
20
Ĩthõng õthõõth balna Nyekuci thoothonniok cĩkkõ, 2 “Keeni na Makayyioit Nyekuc cunung, wũ balna kẽyẽhanung agiitia looca cĩ Ijibi ngatĩvõrĩ, looca ĩcĩ nyakapanthẽtĩnõ.3 “Athii koccia niia cĩ ayahi nyekucnya õõgĩ cĩk kĩ rẽẽng, lawa aneeta dõ.
4 “Athii koccia niia cĩ adĩmani kaal õõgĩ cĩk aatĩ kĩ nyekucnya cĩk aduwõy kĩ kaal õõgĩ tammuatiddina, kõdẽ loota, kõdẽ maamĩy loota. 5 Athii koccia niia cĩ akaneei kuthungti ĩnõõgõ, kõdẽ ala ĩnõõgõ, ĩthõng keeni na Makayyioit Nyekuc cunni, ĩthõng kadiimi na mĩnan cunni vẽlẽk. Ma ngĩ abũrnangũ aneeta, kuuki katĩ na dõõlĩ cuguk erkinyiay ĩcĩk katĩ avvunni, doolia cĩk dõõlĩ cĩk dõõlĩ cuguk cĩk doolenu, 6 ĩthõng thĩ, ma ngĩ amĩnannangũ niigia aneeta, ĩthõng ithiktu thoothonniok cĩganĩk, kamĩnani katĩ na dõõlĩ cĩk dõõlĩ cuguk erkinya vucciaknya kĩ vucciaknya cĩk meelĩk.
7 “Nyĩ amĩnyẽ niia thar cĩk Makayyioit Nyekuc cunni, nyatarka eteedi katĩ Makayyioiti thõõth et cĩ amĩnyĩ thar cĩgĩnĩk kaganoko.
8 “Hada niia ngatĩ athũnnẽ Kõr cĩ Yuwuthono cĩ callĩ. 9 Ticcanõy niia iinyiay ĩcĩk ẽẽn tõrkõnõm vẽlẽk, 10 ĩthõng thĩ, lõõcĩ tũrgẽrẽm ẽẽn Kõr cĩ Yuwuthono cĩ Makayyioit Nyekuc cunni. Nyĩ aticannie, kõdẽ logoo cunnie, kõdẽ doo cunni, kõdẽ nyakapanait cunni, kõdẽ kelegit cunni, kõdẽ eet cĩk rẽẽng cĩk abaak õlõõ cunni. 11 Iinyiay ĩcĩk ẽẽn tõrkõnõm ẽngẽnyca balna Makayyioiti tammutiddin, looc kĩ bulucua, kĩ kaal vẽlẽk cĩk aatĩ ĩcĩnĩng, ĩthõng lõõcĩ tũrgẽrẽm uyuwuth Makayyioiti. Ĩnõõnõ thĩ cĩ anyĩcẽ Makayyioiti lõõcĩ tũrgẽrẽm kĩĩ Kõr cĩ Yuwuthono, ĩthõng agatan ĩnõõnõ aanyĩk ĩnõõnõ kĩĩ calla wo.
12 “Tõngõlẽ niia baaba cunni kĩ yaaya, kĩĩ katĩ avvu niia kuumuc looca ĩcĩ katĩ anyi aniitia Makayyioiti Nyekuci cunnie.
13 “Nyĩ arui niia et.
14 “Nyĩ õkõyyẽ niia ngaa cĩ et ĩmma.
15 “Nyĩ õgõrthẽ niia.
16 “Nyĩ õvõlõngẽ niia et cĩ abakanonu lokika.
17 “Nyĩ niia abarriteei ciith cĩ et cĩ abakanonu. Nyĩ abarriteei ngaa cĩ et cĩ abakanonu, kõdẽ nyakapanait cĩnnĩ, tõmõt, thigiriec, kõdẽ gimma cĩ ẽẽn cĩ et cĩ abakanonu kĩ aniitia.”
18 Ma balna mĩ athĩrar eeta borowec ngĩ iciayyi kĩĩ kabad, ĩthõng ĩthĩhĩt tulele, ĩthõng ĩcĩnĩt burrut thiira, abarritit balna nẽẽgẽ, ĩthõng otongollie. Ĩthõng aavuttia nẽẽgẽ rẽẽna, 19 ĩthõng entek Mutha ne, “Thoothiet niia ageeta, ĩthõng kathĩknẽna katĩ naaga. Nyĩ anyi Nyekuc kothoothĩhet ageeta, kõdẽ kadaakna katĩ naaga!”
20 Uduwak Mutha eet ennek ne, “Nyĩ ongolinu. Aku Nyekuci atĩmannung agiitia dõ, kĩĩ katĩ ma ongolinu niigia ĩnõõnõ athii katĩ cĩ adĩmannu thoothonniok cĩk gerthek.” 21 Ĩthõng abĩlĩ balna eeta rẽẽna, balna mĩ õkkõ Mutha joonui diitha ĩcĩ obbi wũ balna aavẽ Nyekuci.
Kaal cĩk aar eeta kĩĩ nyekucnya kĩ vatĩk cĩk todongintiak
22 Ĩthõng uduwak balna Makayyioiti Mutha ethek ne, “Duwak niia eet cĩk Ĩthraĩlĩ ethek ne, ‘Icintu niigia ngatĩ kõthõõthõnẽ na kĩ agiitia tammuatiddina, 23 nyĩ adĩmananu nyekucnya õõgĩ kũrũmtea kĩ aneeta, nyĩ adĩmananu nyekucnya thĩĩhĩy ĩcĩk athĩ kathalkathal, kõdẽ daaba.
24 “ ‘Etengenycehangũ niigia aneeta ngĩtĩ todongintio, ĩthõng otodongtehangũ kaal cĩk cavawu cĩk avaaddi, ĩthõng anyciwu anyintiok cuguk cĩk ẽẽn athaa kĩ ẽẽtha kĩ tĩĩna. Ngĩtĩ kẽbẽra na, kĩĩ katĩ ahadiahangũ niigia aneeta, ĩthõng alayyiowu natẽ, kakuni katĩ na ĩcunung kagatanung agiitia. 25 Ma ngĩ etengenycu niigia ngĩtĩ todongintio bĩĩyẽnĩy, nyĩ aticaninu maacad, kõdẽ thẽrẽthẽrẽ cĩ etedu bĩĩyẽn ma ngĩ adĩmannu, ẽgẽrẽthannu katĩna niigia ngĩtĩ anyintio. 26 Ĩthõng nyĩ engenyettu ngĩtĩ todongintio cĩ õkkõ tiddina, kĩĩ katĩ ngĩ otodi niia õkkõ tiddina edenyiay katĩ ẽlẽ cunnie.’ ”