Ĩdĩmantothĩk eeta kĩĩ kurumtõy kĩ Nyekuc Thiira ĩcĩ Thĩnaĩ
19
Ma balna ngĩ õwõ nẽẽgẽ nyĩĩlõwẽ ramma cĩk ũtũngtẽĩ nẽẽgẽ looc cĩ Ijibi, õdõlanit nẽẽgẽ baath cĩ Thĩnaĩ kõr cĩ ẽẽn codoi cĩ nyĩĩlok cĩ ẽẽn iyyio. 2 Ma balna ngĩ abaak nẽẽgẽ ngatĩ athĩ Revidim itiothõ balna nẽẽgẽ baath cĩ Thĩnaĩ, ĩthõng abaaitõ Ĩthraĩlĩ baatha natẽ joonui thiira. 3 Ĩthõng ũũk Mutha ĩcĩ Nyekuco, ĩthõng ũtũvvũ Makayyioiti ĩnõõnõ thiira, ĩthõng ennek ne, “Thõõth cĩ aduwaai kõrõõk cĩ Yokobĩ coo, ĩthõng kĩ cĩ aduwaai niia eet cĩk Ĩthraĩlĩ.a 4 ‘Icintu balna niigia eletinẽy cuguk kir nyia wũ balna kadĩmanei na eet cĩk Ijibi, ĩthõng kõdõnganung balna na agiitia kavutẽnẽy ĩcĩk thuutak ivitia ĩcannĩ. 5 Mĩ athĩknangũ niigia aneeta yoko jurrung, ĩthõng uthuuttu ngẽrẽmngẽrẽm cĩganĩk, ĩthõng loociowẽy vẽlẽk eeginnu katĩ niigia kir eet cĩganĩk cĩk abũnna, nyatarka ẽẽn lõõcĩ vẽlẽk cĩnanĩ, 6 ĩthõng eeginnu katĩ niigia kabicoc cĩ paadĩrnyawu, ĩthõng kĩ eet cĩk callĩk cĩk eeginnu cĩganĩk.’ Thoothonniok cĩk aduwaai niia eet cĩk Ĩthraĩlĩ ĩcĩkkõ.”
7 Ĩthõng imiirie balna Mutha ũũk ũtũvvũ eet cĩk obbitik cĩk eetu, ĩthõng uduwak ĩnõõgõ vẽlẽk thõõth cĩ aduwaai Makayyioiti ĩnõõnõ. 8 Edecit balna eeta vẽlẽk kõdõwẽ, “Kadĩmanna katĩ naaga kaal vẽlẽk cĩk aduwa balna Makayyioiti.” Ĩthõng ayahak balna Mutha thõõth cĩnĩng Makayyioit.
9 Ennek Makayyioiti Mutha ne, “Kõkkõ na kakuni ĩcunni diitha, kĩĩ katĩ kĩthĩkta eeta aneeta mĩ kõthõõthõy kĩ aniitia, ĩthõng athikni katĩ gõõ dõõkĩthĩ aniitia.” Ĩthõng uduwak Mutha Makayyioit thõõth wũ aduwa eeta.
10 Ĩthõng uduwak Makayyioiti Mutha ennek ne, “Miirie bĩt vurtia, ĩthõng uduwawu eet kõr coo kĩ lootha anyĩk ĩnõõgõ kĩdĩmantothĩk, kĩĩ katĩ kurumtowa kĩ aneeta. Anyĩk kũtũũnyĩtõ nẽẽgẽ ceremua cĩgĩk, 11 ĩthõng ereyyiõy loithiet, kakuni katĩ na Makayyioiti loota Thiira ĩcĩ Thĩnaĩ, ngatĩ katĩ acinia nẽẽgẽ vẽlẽk aneeta. 12 Anyĩk thẽk eet kaavutõ thiira rẽẽna, ĩthõng duwak ĩnõõgõ ennek ne, ‘Egeenyit nyĩ ovvoyyu thiira tiddina, kõdẽ nyĩ awumnyu vurut cĩnnĩ. Eeti ĩmma cĩ uwum vurut cĩ thiiro aruwue katĩ nẽ dĩdĩ. 13 Ovoccie koccia nẽ bĩĩyẽnĩy, kõdẽ iciayyi nyarangĩtẽy dĩdĩ, kothii athiit cĩ awum ĩnõõnõ, kõdẽ eeti, kõdẽ kelegiti athii cĩ kaanyi kũrũk.’ Ma ngĩ ũtũbũwẽ tulele cĩ ẽẽn otoon cĩ atheeto abũnna koccia ngĩ õvvõ nẽẽgẽ thiira tiddina.”
14 Ma balna ngĩ ikiyyia Mutha loota eetĩnẽy, ikiyyia ĩdĩmanek nẽ eet kĩĩ callẽ, ĩthõng ũtũũnyĩtõ nẽẽgẽ ceremua. 15 Ennek nẽ eet ne, ĩdĩmantek eleeti cuguk iinyiay ĩcĩk ẽẽn iyyio, ĩthõng nyĩ oginnu kĩ ngaay.
Ikiyyia Makayyioiti Thiira ĩcĩ Thĩnaĩ
16 Ma ngerethietĩn cĩ ẽnnẽ lõõcĩ iyyio abadĩ balna borowecĩ, ĩthõng iciayyi borowecĩ maka balna lorudo thiira tiddina, ĩthõng abadĩ õrrõt, ĩthõng õrõk tulele. Eeta vẽlẽk cĩk aatĩ õlõõ natẽ abarritita. 17 Ĩthõng ũũwĩ Mutha eet õlõõ õõt ngatĩvõrĩ kurumtõy kĩ Nyekuc, ĩthõng ĩbĩlĩt nẽẽgẽ joonui thiira vurtia. 18 Abbĩththĩ balna Thiir cĩ Thĩnaĩ burruti, nyatarka aluciay Makayyioiti guyyia. Abbĩththĩ burruti tiddina õgõõn kĩ burruti cĩ aburrut guyyia, ĩthõng õtõmmõ thiir vẽlẽk õrrõt, 19 ĩthõng õrõk tulele õrrõt gimmanoko. Ĩthõng õthõõth Mutha, ĩthõng ẽdẽc moloowĩ cĩ Nyekuco cobbi ĩnõõnõ.
20 Uluciay balna Makayyioiti Thiira tiddina cĩ Thĩnaĩ, ĩthõng ũtũvvũ Nyekuci Mutha kikiyyia thiira tiddina. Ĩthõng ũũk Mutha thiira tiddina. 21 Ĩthõng ennek Makayyioiti ĩnõõnõ ne, “Bĩt niia loota duwak ĩnõõgõ nyĩ anyi kabaaktiay nẽẽgẽ kivitia kĩcĩnta aneeta, nyatarka mĩ ĩdĩmanit nẽẽgẽ, adaaĩ katĩ eeta cĩk meelĩk. 22 Anyĩk niia paadĩrnya buu, wũk õvvõ Makayyiokta, abũnna mĩ adĩmaneei nẽẽgẽ eleeti cĩgĩk kĩĩ callẽ, ma ngĩ athii nẽẽgẽ cĩ adĩman, uuk katĩ Makayyioiti ĩnõõgõ.”
23 Atajanek balna Mutha Makayyioit ĩthĩ ne, “Athii katĩ eeta cĩ avvu Thiira tiddina cĩ Thĩnaĩ. Uduwaet balna niia ageeta athĩ ne, ‘Aavut rẽẽna, nyatarka ngĩtĩ callĩ neccio.’ ”