Ẽhẽrõn Jethũrũ õkkõ ĩcĩ Mutha
18
Ĩthõng yoko ĩthĩk balna Jethũrũ thõõth vẽlẽk wũ balna ĩdĩmanek Nyekuci Mutha kĩ eet cĩgĩnĩk Ĩthraĩl, ĩthõng kĩ gõõl wũ balna ẽyẽhanĩ Makayyioiti eet cĩk Ĩthraĩlĩ ngatĩvõrĩ looca ĩcĩ Ijibi. Ẽẽn balna Jethũrũ paadĩr cĩ Midianĩ, ĩthõng atik Mutha bũwẽnyĩnĩ cĩnnĩ.2 Ma balna ma ngĩ itioni Mutha ngaa cĩnnĩ Thipporaa baatĩnnĩ cĩ atihẽnĩ, ĩthõng agam Jethũrũ ĩnõõnõ, 3 kĩ dõõlĩ cĩgĩnĩk ramma. Akaneei balna Mutha ngẽrĩnĩ cĩnnĩ cĩ ẽẽn abuu thar cĩk athĩ, Gẽrthõm, nyatarka athĩ Mutha ne, “Kĩĩthĩ na et cĩ rẽẽng looca ĩcĩ rẽẽng.” 4 Akaneei balna Mutha ngẽrĩnĩ cĩnnĩ ĩmma thar cĩk athĩ Eliẽthẽrĩ, nyatarka thara cĩkkõ athĩ ne, “Nyekuc cĩ baang cannĩ cĩ ẽẽn balna ellioit cannĩ, ẽẽlana nẽ aneeta dĩlawa ĩcĩ alaan cĩ Ijibi.”
5 Akunei balna Jethũrũ Mutha kõdõwẽ kĩ dõõlĩ cĩk Mutha kĩ ngaa cĩnnĩ. Avvuneei ĩnõõnõ baatha, ngatĩ balna aavẽ nẽ abaaĩ õjõõn thiira ĩcĩ Nyekuco. 6 Itionĩk Jethũrũ ĩnõõnõ thõõth ennek ne, “Aneeta baaba wũ balna atihẽnẽ niia Jethũrũ, kakuneci na aniitia kirowana kĩ ngaa cunni kĩ dõõlĩ cugunik ramma.”
7 Ĩthõng ũũk Mutha urumtõy kĩ baatĩnnĩ cĩ atihẽnĩ nẽ, ĩthõng ululie kĩĩ kĩthayyiõy kĩ ĩnõõnõ. Ĩthayyiõy nẽẽgẽ, ĩthõng õõt tuggwa. 8 Uduwak Mutha baatĩnnĩ cĩ atihẽnĩ thõõth vẽlẽk cĩ balna adĩmaneei Nyekuci alaan cĩ Ijibi kĩ eet cĩk Ijibi, kĩĩ katĩ kẽẽl nẽ eet cĩk Ĩthraĩlĩ. Ĩthõng uduwak naboo nẽ ĩnõõnõ thõõth wũ balna ẽẽlĩ Makayyioiti ĩnõõgõ pĩrnanta vẽlẽk.
9 Atalĩ balna Jethũrũ ngĩ athĩrar thõõth cĩ kaal vẽlẽk cĩk abũnna cĩk ĩdĩmanek Makayyioiti eet cĩk Ĩthraĩlĩ ngatĩ ẽẽlanẽ ĩnõõgõ athĩnẽy ĩcĩk eet cĩk Ijibi. 10 Athĩ nẽ ne, “Kadihithi na Makayyioit, wũ balna ẽẽlanung agiitia athĩnẽy ĩcĩk eet cĩk Ijibi kĩ alaan. 11 Ĩthõng yoko kagawa na maka Makayyioiti ijiar nyekucnya vẽlẽk, nyatarka ẽẽla balna nẽ eet cĩk Ĩthraĩlĩ mĩrõwẽy ĩcĩgĩk cĩk adĩman ĩnõõgõ buth.” 12 Ĩthõng aanyĩk Jethũrũ baatĩ Mutha cĩ atihẽnĩ gii cĩ cavĩto cĩ avaaddi kĩ kaal cĩk cavawu Nyekuc. Ĩthõng ivitia Aarõnĩ kĩ eet cĩk obbitik cĩk Ĩthraĩlĩ uduktõy kĩ Jethũrũ natẽ ngatĩ aavẽ Nyekuci.
13 Ma balna ngerenniet ĩdĩma Mutha taaba cĩnnĩ kĩĩ kaavu loota kẽngẽr thoothonniok cĩk eetu, ĩthõng mẽẽlĩ balna eeta cĩk abĩlĩ ĩcĩnnĩ kĩĩ jiatĩn. 14 Ma balna baatĩnnẽ cĩ atihẽnĩ nẽ wo, mĩ acĩn thõõth vẽlẽk cĩ adĩmaneei balna Mutha eet wo, ĩthĩ nẽ ne, “Nyia cĩ adĩmaneei niia eet wo? Nyia nidio avvu ĩthĩ et cĩ engeri thoothonniok wo, ĩthõng eeta cĩkkõ vẽlẽk abĩlĩ ĩcunni kĩĩ jiatĩn wo?”
15 Ĩthõng atajanek Mutha ĩnõõnõ, ennek ne, “Nyatarka avvu eeta ĩcannĩ adiim ngĩ aga thõõth cĩ adiim Nyekuci ĩnõõgõ kĩdĩmanit. 16 Ma ngĩ ayak nẽẽgẽ thõõth cĩ ẽgẽrẽnyõnĩ, ayahaca aneeta, ĩthõng kuduwaha na ĩnõõgõ thoothonniok cĩk ngirantiok cĩk Nyekucak.”
17 Atajan baatĩ Mutha cĩ atihẽnĩ nẽ wo, ĩthĩ ne, “Thõõth cĩ adĩmani niia wo athii cĩ abũnna. 18 Niinia kĩ eet cĩk avvu kĩ aniitia wo, apĩrna katĩ agiitia eleeti. Maka aniitia tiici õrrõt, nyĩ aticannie nidio. 19 Thĩha aneeta yoko, ĩthõng kaduwaci katĩ na aniitia thõõth, ĩthõng anyĩk Nyekuc kaavu ĩcunni. Adiim thẽk eeni niia makayyioit cĩ eetu ĩcĩ Nyekuco, ĩthõng ayahawu thõõth cĩ ẽgẽrẽnyõnĩ nẽẽgẽ ĩnõõnõ. 20 Liman thẽk niia ĩnõõgõ thoothonniok cĩk ngiranak, kĩ thoothonniok cĩk tiirtik cĩk kõwõbĩ, ĩthõng yelek ĩnõõgõ gõõl cĩ abaaĩ, ĩthõng kĩ tiiciok cĩk adĩman thẽk nẽẽgẽ. 21 Ĩthõng ẽbẽra niia eet cĩk abũnna eetĩnẽy vẽlẽk ĩcĩk ongollie Nyekuc, ĩthõng aaburneei thõõth cĩ ĩtaabĩ eeta ĩnõõgõ kĩdĩmanit thoothonniok cĩk gerthek, ĩthõng bẽra ĩnõõgõ kĩĩtõ gaala cĩk agam eet cĩk ẽẽn vucciak codoi (1,000), kĩ eet cĩk ẽẽn eet tur, ĩthõng kĩ eet cĩk ẽẽn eet ramma kõmmõtõ, ĩthõng kĩ eet cĩk ẽẽn õmmõtõ. 22 Anyĩk ĩnõõgõ kiticantõy kĩĩtõ eet cĩk ẽtẽd thõõth cĩ eetu dõõkĩthĩ, ĩthõng anyĩk ĩnõõgõ kẽyẽktai aniitia thoothonniok cĩk addi, anyĩk ĩnõõgõ keteditõ thõõth cĩ dĩcĩ. Anyi katĩ tiic cunni kõvõlvõl. 23 Ma ngĩ adĩmani niia thõõth coo, kĩcĩ ẽlẽmĩ Nyekuci wo, ayahi katĩ niia tiirthẽt cĩ adĩmanẽ thõõth cĩ abũnna kũdũt cĩ ẽlẽ eet vẽlẽk, ĩthõng õõt katĩ eeta cĩkkõ vẽlẽk õlõõ ganõna.”
24 Ĩthĩk Mutha thõõth cĩ baatĩnnĩ cĩ atihẽnĩ nẽ, ĩthõng ĩdĩman thõõth vẽlẽk cĩ aduwa nẽ. 25 Ẽbẽra nẽ eet cĩk abũnna cĩk tiirtik cĩk Ĩthraĩlĩ vẽlẽk, ĩthõng anyĩk ĩnõõgõ kĩĩ gaala cĩk agam eet cĩk ẽẽn vucciak codoi (1,000), kĩ eet cĩk ẽẽn eet tur, ĩthõng kĩ eet cĩk ẽẽn eet ramma kõmmõtõ, ĩthõng kĩ eet cĩk ẽẽn õmmõtõ. 26 Agam balna nẽẽgẽ eet, ĩthõng ẽẽn makayyiok cĩk ẽtẽd thõõth cĩ eetu itin vẽlẽk. Ayahai nẽẽgẽ thoothonniok cĩk õkõmĩ Mutha, ĩthõng ẽtẽd nẽẽgẽ thoothonniok cĩk kĩdĩk cĩk eetu nẽẽgẽ dõ. 27 Ĩthõng ition Mutha baatĩnnĩ cĩ atihẽnĩ nẽ ẽẽ, ĩthõng ennek nẽ ne, abũnna nõõnõ aa, ĩthõng imiirie Jethũrũ ũũk looca cĩnnĩ.