Maam cĩk ariha Naaraba
17
Ĩtĩngathõ balna eeta vẽlẽk cĩk Ĩthraĩlĩ baatha cĩ athĩ Thĩn, õvvõ nẽẽgẽ vatĩkẽy wũk balna aduwaai Makayyioiti ĩnõõgõ. Ĩthõng õõt nẽẽgẽ abaaitõ ngatĩ athĩ Revidim, ĩthõng kothii balna maam cĩk awũd eeta. 2 Ĩthõng acalcalliek nẽẽgẽ Mutha, entek ne, “Anyet ageeta maam.”Atajan Mutha ĩĩ ne, “Nyia niigia acalcalliehangũ aneeta wo? Atĩmannu niigia Makayyioit nyia?”
3 Ĩthõng balna aruk eet kõr natẽ, ĩthõng ongongoyyiek nẽẽgẽ Mutha. Athĩ nẽẽgẽ ne, “Nyia thẽk yahaet niia ageeta ngatĩvõrĩ looca ĩcĩ Ijibi, kĩĩ katĩ kuruwet kõr kadaakta kĩ dõõlĩ cĩgaak kĩ kaal wo?”
4 Ĩthõng utuluwik Mutha Makayyioit ennek ne, “Kogooni tooko thẽk na eet cĩkkõ kuu? Õbõktẽ yoko idiimitõ ngĩ ovocianĩ.”
5 Atajanek Makayyioiti Mutha ennek ne, “Tuwuanẽẽĩ niia eet bĩt ĩcĩ owu. Yak niia eet cĩk obbitik õõgĩ cĩk Ĩthraĩlĩ, ĩthõng yak niia attia cunni kẽẽt cĩ towominto wũ balna uukwe niia Lĩĩl cĩ Naaĩlĩ, ĩthõng uuwu. 6 Kabili katĩ na natẽ ĩcunni naaraba ngatĩ athĩ Horeb. Uuk niia naarab, ĩthõng avvu katĩ maama natẽ kĩĩ kũwũdĩt eeta.” Ĩthõng ĩdĩman Mutha thõõth coo, kĩcĩnĩt eeta cĩk obbitik cĩk Ĩthraĩlĩ. 7 Ĩthõng ũtũvvũ nẽ nginicẽ ĩthĩ ne, Maatha kĩ Meriba,a nyatarka balna amumteei eeta cĩk Ĩthraĩlĩ Makayyioit atĩman nẽẽgẽ ĩnõõnõ athĩ ne, “Aavĩ thẽk Makayyioiti kõrgẽna ĩcĩnac?”
Umuryie eeta cĩk Amaleki
8 Ivitia balna eeta cĩk Amaleki uuktõy kĩ eet cĩk Ĩthraĩlĩ ngatĩ athĩ Revidim. 9 Uduwak balna Mutha Jothua ennek ne, “Bẽra eet cĩk maacĩk cĩgaac õõgĩ, ĩthõng oottu ngatĩvõrĩ õõt uuktõy kĩ eet cĩk looc cĩ Amaleki. Kabili katĩ na lootha thiira tiddina, ĩthõng kayai na kẽẽt cĩ Nyekuco athĩnẽy ĩcĩganĩk.”
10 Ĩthõng uuktõy Jothua kĩ eet cĩk Amaleki kĩ balna mĩ aduwa Mutha, ĩthõng õõt Mutha kĩ Aarõn kĩ Hur thiira tiddina. 11 Ma ngĩ õdõng Mutha kẽẽt cĩnnĩ tiddina, umur kẽnnẽ gõõ eeta cĩk Ĩthraĩlĩ ĩnõõgõ, ĩthõng ma ngĩ aluucianẽ nẽ athiit cĩnnĩ, umur eeta cĩk Amaleki ĩnõõgõ. 12 Ma balna ma ngĩ ipiryia athĩna cĩk Mutha, ĩdĩmta nẽẽgẽ bĩĩ, ĩthõng aryihi ĩnõõnõ kaavue loota. Agam Aarõnĩ kĩ Hur athĩn cĩgĩnĩk, agam ĩmma athiit ĩmma, ĩthõng agam naboo ĩmma athiit ĩmma, kĩĩ katĩ kaavutõ athĩna cĩgĩnnẽk jurrung, ĩĩthõng kokolothĩk kõrra. 13 Ĩthõng balna umur Jothua nyĩcẽkẽr cĩk Amaleki nyetubata.
14 Ĩthõng uduwak Makayyioiti Mutha ennek ne, “Tẽhẽẽd kaal cĩkkõ nyaragawa cĩ adĩmaniay rucenta, kĩĩ katĩ kĩĩ gimma cĩ ahada eeta, ĩthõng anyĩk Jothua kĩthĩk ĩnõõnõ, nyatarka kagĩĩra katĩ na eet cĩk Amaleki ĩnõõgõ vẽlẽk.”