Abaaktẽ eeta Bũlũc cĩ Merihi
14
Ĩthõng uduwak Makayyioiti Mutha ennek ne, 2 “Duwak eet cĩk Ĩthraĩlĩ kutuwuyyie vurtia, ĩthõng abaaitõ looca ĩcĩ Pi Hahirothi, kabakantõy kĩ looc cĩ Migdoli kĩ Bũlũc cĩ Merihi, ĩthõng õjõõn kĩ looc cĩ Bal Theponi. 3 Ahad katĩ alaanĩ athĩ ne, ‘Nga ajalili eeta cĩk Ĩthraĩlĩ natẽ, ĩthõng nga õjõõntĩ nẽẽgẽ, nyatarka atalmanyantẽ nẽẽgẽ, ĩthõng otongollie ngatĩ õvõyyĩ baatha ĩcĩ õdõõĩ kak.’ 4 Kaanyi katĩ na alaan kõkõm thĩnĩn cĩnnẽ, ĩthõng umur katĩ nẽ ĩnõõgõ. Ĩthõng katĩ kẽdẽca na alaan kĩ nyĩcẽkẽr cĩgĩnĩk, ĩthõng ayahaca katĩ aneeta bulẽnĩt. Ĩthõng katĩ agayyia aneeta eeta cĩk Ijibi athĩ ne, Keeni na Makayyioit.” Ĩthõng ĩdĩmanit eeta cĩk Ĩthraĩlĩ kĩ balna mĩ aduwaai Makayyioiti ĩnõõgõ.5 Ĩthõng balna mĩ athĩrar alaanĩ cĩ Ijibi a ne, õõt eeta, ũtũwẽcõ nẽ kĩ gaala cĩgĩnĩk ooti ĩĩtõ ne, “Nyia cĩ kĩdĩmanit naaga wo? Kaanycĩk naaga eet cĩk Ĩthraĩlĩ kõõt, ĩthõng ithiicõ nẽẽgẽ ĩnĩnga ẽẽn nyakapanak cĩgaac.” 6 Ĩthõng ĩdĩma alaanĩ gii cĩnnĩ cĩ õgõõn kĩ toromilie cĩ agurut nyangõlẽnya cĩk jorak kaavutõ, kĩĩ katĩ kũũk nẽ jora kiirioit kĩ nyĩcẽkẽr wũgĩnĩk. 7 Ĩthõng ẽbẽra nẽ kaal cĩk õgõõn kĩ toromilẽta wũk gõõ agurut nyangõlẽnya cĩk abũnna õrrõt, cĩk ẽẽn eet etĩmma kĩ eet õmmõtõ (600), ĩthõng kĩ toromilẽt vẽlẽk cĩk agurut nyangõlẽnya õõgĩ, ĩthõng arĩk nẽ gaala cĩk ũũwa kaal nĩĩkẽ. 8 Ĩthõng aanyĩk balna Makayyioiti thĩnĩn cĩ alaano kõkõm kĩĩ gẽrtha, ĩthõng umur nẽ eet cĩk Ĩthraĩlĩ, wũk balna õvvõ muothĩta. 9 Nyĩcẽkẽrĩ cĩk Ijibi vẽlẽk kĩ nyangõlẽnya cĩgĩk, kĩ kaal cĩk õgõõn kĩ toromilẽta cĩk agurut nẽẽgẽ, umurit ĩnõõgõ, ĩthõng ĩĩtõ õjõõntĩ kĩ ĩnõõgõ ngatĩ balna aatẽ nẽẽgẽ Bũlũca ĩcĩ Merihi cĩ õjõõn kĩ looc cĩ athĩ Pi Hahiroth kĩ Bal Theponi.
10 Ma balna mĩ acĩn eeta cĩk Ĩthraĩlĩ alaan kĩ nyĩcẽkẽr cĩk Ijibi õwõb ĩnõõgõ wo, otongollie balna nẽẽgẽ õrrõt, ĩthõng utuluththik Makayyioit kẽẽl ĩnõõgõ. 11 Uduktiak nẽẽgẽ Mutha entek ne, “Kothii da thẽk loowua looca ĩcĩ Ijibi? Ayahanet da thẽk niia ageeta ngatĩvõrĩ ngato baatha kivitiaha kadaakta? Cĩn da nyia cĩ adĩmani niia cĩ ayahanet ageeta ngatĩvõrĩ looca ĩcĩ Ijibi wo? 12 Nga balna kentei naaga aniitia Ijiba ne, ‘Tũngehet ageet dõ, ĩthõng anyet ageeta kaavuttia kiittia nyakapanak cĩk eet cĩk Ijibi?’ Abũnna ma ngĩ keeginna nyakapanak natẽ kĩ woyyia ma ngĩ kadaakna baatha ĩcĩ õdõõĩ kak ĩcoo.”
13 Atajan Mutha ĩnõõgõ ĩĩ ne, “Nyĩ ongolinu, anycĩk thinneti kokomit, ĩthõng acĩnnu katĩ niigia gii cĩ adĩmanecung Makayyioiti agiitia kõr coo, athii katĩ niigia cĩ acĩnnu naboo eet cĩk Ijibi. 14 Uukõy katĩ Makayyioiti kĩ mĩrõk cuguk, ĩthõng athii niigia cĩ adiim adĩmannu gii ĩmma.”
15 Ĩthõng ennek Makayyioiti Mutha ne, “Alueca niia aneeta nyia? Duwak eet cĩk Ĩthraĩlĩ kõõt ĩcĩ owu. 16 Dõng kẽẽt cunni tiddina, ĩthõng odongewu ĩnõõnõ bũlũc, engeryie katĩ maama, ĩthõng katĩ õtõõthõ eeta cĩk Ĩthraĩlĩ bũlũca ngatĩ õdõõĩ. 17 Kaanyi katĩ na eet cĩk Ijibi kokomit thinneti cĩgĩk, kĩĩ katĩ kõõt nẽẽgẽ kowobit ĩnõõgõ, ĩthõng katĩ anyca nẽẽgẽ aneeta bulẽnĩt, nyatarka thõõtha cĩ katĩ kadĩmanei na alaan, kĩ nyĩcẽkẽr cĩgĩnĩk kĩ kaal cĩgĩnĩk cĩk õgõõn kĩ toromilẽta kĩ eet cĩk amacuc nyangõlẽnya. 18 Aga katĩ eeta cĩk Ijibi mĩ keeni na Makayyioit katĩ mĩ kũmũda na bulẽnĩt ĩcĩ alaan cĩ Ijibi kĩ kaal cĩgĩnĩk cĩk õgõõn kĩ toromilẽta kĩ eet cĩgĩnĩk cĩk amacuc nyangõlẽnya.”
19 Anjĩlõ cĩ Nyekuco, cĩ balna aavĩ ĩcĩ owu nyĩcẽkẽrĩy ĩcĩk Ĩthraĩlĩ ũũk, ĩthõng õbõda vurtia ĩcĩnĩng. Õwõ naboo diith cobbi buu balna thẽk ĩcowu kĩ ĩcĩ vurtio. 20 Ĩthõng ũũk kõrgẽna ĩcĩnĩng eetĩnẽy ĩcĩk Ijibi kĩ eet cĩk Ĩthraĩlĩ, ollia diith ĩcĩ eet cĩk Ijibi, ĩthõng ũtũkũlõy ĩcĩ eet cĩk Ĩthraĩlĩ, ĩthõng athii thĩ nyĩcẽkẽrĩ cĩk Ĩthraĩlĩ, kĩ cĩk Ijibi cĩ avvu joonui ĩcĩnĩng baal.
21 Ĩthõng õdõng Mutha athiit cĩnnĩ odongei bũlũc, ĩthõng ĩngĩd Makayyioiti bũlũc ngõõta ĩcĩ obbi cĩ avungan tõõna ĩcĩ alibanĩ kõrra baalin vẽlẽk, ĩthõng aanyĩk bũlũc kõdõõk. Ĩthõng engeryie balna maama, 22 ĩthõng õõt eeta cĩk Ĩthraĩlĩ abaaktẽ bũlũc ngatĩ õdõõĩ, cĩ ayak titimmua tonniok vẽlẽk cĩk maamu.
23 Umurit balna eeta cĩk Ijibi ĩnõõgõ, ĩthõng owobit ĩnõõgõ kõdõlanit bũlũc nyangõlẽnyay kĩ kaal cĩk õgõõn kĩ toromilẽta kĩ eet cĩk amacuc nyangõlẽnya. 24 Ĩthõng thĩ, balna ngĩ õbõwẽ ngerethietĩnĩ, ĩcĩn Makayyioiti looc diitha kĩ guyyia ĩcĩ obbi nyĩcẽkẽr cĩk Ijibi, ĩthõng aanyĩk ĩnõõgõ katalmanyantẽ. 25 Aanyĩk nẽ thoo cĩk kaal cĩk õgõõn kĩ toromilẽta cĩk agurut nyangõlẽnya cĩgĩk kagamtẽ, kĩĩ katĩ kõtõõthõ nẽẽgẽ pĩrnanta. Athĩ nyĩcẽkẽr cĩk Ijibi ne, “Kẽnyẽktĩ naaga ngato eetĩnẽy ĩcĩk Ĩthraĩlĩ. Ẽẽla Makayyioiti ĩnõõgõ jora kumuryet ageeta.”
26 Uduwak Makayyioiti Mutha ennek ne, “Dõng athiit cunni dongek bũlũc, ĩthõng avvu katĩ maama õbõda atik nyĩcẽkẽr cĩk Ijibi kĩ nyĩcẽkẽr cĩk amacuc kaal cĩk õgõõn kĩ toromilẽta kĩ nyĩcẽkẽr cĩk amacuc nyangõlẽnya.” 27 Ĩthõng õdõng Mutha athiit cĩnnĩ odongek bũlũc, ĩthõng ma ngĩ ẽẽn waathĩn õbõda maama, ĩthõng ĩtĩmanit nyĩcẽkẽrĩ cĩk Ijibi ngatĩ aviri maamĩy, ĩthõng utdukeek Makayyioiti ĩnõõgõ bũlũca. 28 Ĩthõng oboddia maama itihit nyangõlẽnya, kĩ nyĩcẽkẽr cĩk amacuc kaal cĩk õgõõn kĩ toromilẽta cĩk agurut nyangõlẽnya, ĩthõng nyĩcẽkẽrĩ vẽlẽk cĩk Ijibi wũk balna õwõb eet cĩk Ĩthraĩlĩ õvvõ bũlũca, kothii codoi cĩnĩng cĩ arũgĩ.
29 Ĩthõng õtõõthõ eeta cĩk Ĩthraĩlĩ bũlũca ngatĩ õdõõĩ, kĩ titimmua cĩk maamu kabanyõy. 30 Kõr nĩcẽ ẽẽla Makayyioiti ĩnõõgõ eetĩnẽy ĩcĩk Ijibi, ĩthõng ĩcĩnĩt eeta cĩk Ĩthraĩlĩ eet cĩk Ijibi loota adaaĩ loroboca. 31 Ma balna eeta cĩk Ĩthraĩlĩ mĩ acĩn tiirthẽt cĩ ijiari Makayyioiti eet cĩk Ijibi, ivitia ongollie nẽẽgẽ Makayyioit, ĩthõng ayait nẽẽgẽ leminit ĩcĩ Makayyiokto, ĩthõng kĩ ĩcĩ Mutha ticciannioit cĩnnĩ.