Anyinit cĩ dõõlĩ cĩk ẽẽn abuuẽta
13
Uduwak Makayyioiti Mutha ennek ne, 2 “Anya aneeta dõõlĩ cĩk ẽẽn abuuẽt vẽlẽk cĩk arittiay cĩk maacĩk cĩk Ĩthraĩlĩ, kõdẽ et, kõdẽ kelegit, ẽẽn nẽẽgẽ vẽlẽk cĩganĩk.”3 Ĩthõng uduwak Mutha eet ennek ne, “Ahaddia kõr coo kõr wũ balna uungniccu niigia looc cĩ Ijibi, ngini wũ balna eeginnu niigia nyakapanak. Kõr wũ balna ayahanung agiitia Makayyioiti ngatĩvõrĩ tiirthẽta cĩ athiit cĩnnĩ. Uduit ahat cĩ kothii nyĩgĩt. 4 Ovvoyyu katĩ niigia ngatĩvõrĩ Ijiba kõr coo cĩ nyĩĩlok cĩ ẽẽn codoi nyĩĩlok cĩ athĩ Abib. 5 Ayahanung katĩ Makayyioiti agiitia looca ĩcĩ eet cĩk Kananĩ, Hiiti, Amõrĩ, Hiviti, kĩ Jebu. Looc wũ balna abũtaneei nẽ õõ baatĩ baatĩ baajigu cuguk cĩk anyung agiitia, looc cĩ arik irana kĩ lotec. Abũnna ma ngĩ alayyu niigia kõr cobbi coo, cĩ nyĩĩlok cĩ ẽẽn codoi cĩ erkito. 6 Iinyiay ĩcĩk ẽẽn tũrgẽrẽm abũnna mĩ adukcu ahat cĩ avaadiay cĩ kothii nyĩgĩt, ĩthõng katĩ mĩ ẽẽn lõõcĩ tũrgẽrẽm abũnna ma ngĩ eyekcu Kõr Cobbi cĩ Makayyiokto. 7 Iinyiay ĩcĩk ẽẽn tũrgẽrẽm athii niigia cĩ adukcu ahat cĩ avaadiay cĩ ayak nyĩgĩt, abũnna mĩ kothii nyĩgĩt cĩk ijiowuay ngatĩ attu niigia.
8 “Ma katĩ mĩ ikiyyia Kõr Cobbi, duwak dõõlĩ cuguk ethek ne, ‘Kĩdĩmana na kaal cĩkkõ vẽlẽk, nyatarka thõõth cĩ ĩdĩmanea aneeta Makayyioiti balna ngĩ kikiyyia na ngatĩvõrĩ looca ĩcĩ Ijibi.’ 9 Ẽẽn thõõth coo cĩ ahadanu niigia gii cĩ ẽẽn yelinit cĩ ecebothici athĩn kĩ nguum cunni, ahadacĩ katĩ nẽ aniitia, kĩĩ katĩ ĩdĩmanit niigia kũdũt kaal vẽlẽk cĩk ilimantu Ngirana cĩ Makayyiokto, nyatarka ayahawung balna agiitia Makayyioiti ngatĩvõrĩ looca ĩcĩ Ijibi tiirthẽta ĩcĩnnĩ. 10 Ĩdĩmanit thẽk niigia Kõr Cobbi coo itina ĩcĩ agawu erkinya vẽlẽk.
11 “Ayahanung katĩ agiitia Makayyioiti looca ĩcĩ eet cĩk Kananĩ, wũ balna ũbũtanewung nẽ agiitia, kĩ baatĩ baatĩ baajigu cuguk. Katĩ mĩ anyung nẽ, 12 abũnna ma anyiccu niigia logoo cĩ ẽẽn abuu Makayyioit. Kaala vẽlẽk cuguk cĩk ẽẽn abuuẽt cĩk maacĩk ẽẽn katĩ cĩk Makayyioktak. 13 Abũnna ma ngĩ anyi niia nyion Makayyioit tõõna cĩ thigirieco. Mĩ athii niia cĩ adiimi ẽẽla thigiriec, duul inyia cĩnnĩ. Abũnna naboo thẽk ngĩ ẽẽla niia ngẽrĩnĩ cĩ ẽẽn abuu vẽlẽk.
14 “Ma katĩ thĩ wathinniowẽy ũgwantĩk ĩcĩk avvu, ma ngĩ ajinni ngerunie cunnie a ne, ‘Nyia cĩ adĩmani wo?’ Atajanei katĩ niia ĩnõõnõ ennei ne, ‘Ayahanet balna ageeta Makayyioiti ngatĩvõrĩ looca ĩcĩ Ijibi tiirthẽta ĩcĩnnĩ, looca ĩcĩ balna keeginna naaga nyakapanak. 15 Gẽrtha alaanĩ cĩ Ijibi, ĩthõng balna ujuraet nẽ ageeta ma ngĩ kovvoyyia looca ĩcĩnang, aruk balna Makayyioiti abuuẽt vẽlẽk cĩk maacĩk cĩk eetu kĩ cĩk kelegenu looca ĩcĩ Ijibi. Ĩnõõnõ cĩ kaanyĩcẽ na kẽlẽgẽ cĩk ẽẽn abuuẽt Makayyioit, ĩthõng kẽẽla na lõgõõ cĩganĩk cĩk ẽẽn abuuẽta.’ 16 Õgõõn thõõth cĩ ahadanu niigia wo, kĩ gii ĩmma cĩ ecebothi athĩnẽy, kõdẽ õõwa ĩcunung, kĩĩ katĩ ahaddia niigia ngatĩ ayahanet ageeta Makayyioiti ngĩtĩvõrĩ looca ĩcĩ Ijibi tiirthẽta ĩcĩnnĩ.”
Abaaktẽ eeta bũlũc
17 Ĩthõng anyĩk alaanĩ cĩ Ijibi eet kõõt, athii balna Nyekuci cĩ anyi ĩnõõgõ kõõt gõõla ĩcĩ õkkõ tõõna ĩcĩ looc cĩ Vilithia, nyatarka balna ẽẽn gõõl cĩ turi. Ahad Nyekuci a ne, “Katĩ ngĩ umuddia eeta jore ũũwũ woccia nẽẽgẽ muwẽẽnĩt cĩnĩng, ĩthõng imiiryie õõt looca cĩ Ijibi.” 18 Ĩthõng ayak nẽ ĩnõõgõ õyõkõnĩ baath ĩcĩ Bũlũc cĩ Merihi. Agam balna eeta cĩk Ĩthraĩlĩ ijjio cĩk jorak õvvõ jora balna ngĩ ẽẽkta nẽẽgẽ Ijiba.
19 Ayak balna Mutha ammẽ cĩk Yothẽbõ, kĩ balna ngĩ anyi Yothẽbõ lõgõõ cĩk Ĩthraĩlĩ kũbũtanit. Aduwa balna nẽ a ne, “Katĩ mĩ ẽẽlawung agiitia Nyekuci, abũnna ma ngĩ eyekcu niigia ammẽ cĩganĩk ngato.”
20 Ũtũngtek eeta looc cĩ Thukothĩ, ĩthõng abaaitõ looca ĩcĩ Ethami thiananta ĩcĩ baathõ. 21 Ma ngĩ ẽẽn waathĩn õwõ Makayyioiti ĩcĩ owu diitha cobbi keyelek ĩnõõgõ gõõla, ĩthõng baal õkkõ nẽ, ĩcĩ owu ĩcĩnĩng guyyia ĩcobbi kĩĩ kaanyĩk ĩnõõgõ lanyĩt, kĩĩ katĩ kõtõõthõ nẽẽgẽ baal, kõdẽ waath. 22 Obbua diith dõõkĩthĩ ĩcĩnĩng ĩcĩ owu waath, ĩthõng obbua lanyĩtĩ baal eetĩnẽy ĩcĩk owu.