Kõr cobbi cĩ Ngothio
12
Ĩthõng balna kõr ĩmma uduwak Makayyioiti Mutha kĩ Aarõn ennek ne, 2 “Anycĩk niigia nyĩĩlok coo kĩĩ cunung cĩ ẽẽn codoi, nyĩĩlok cĩ ẽẽn codoi cĩ erkit cunung. 3 Uduktiak eet cĩk Ĩthraĩlĩ entek ne, katĩ ma ngĩ ẽẽn nyĩĩloĩ coo kõr cĩ ẽẽn õmmõtõ, anycĩk baajigi korookjiok vẽlẽk codoi codoi kĩdĩmta nẽẽgẽ vẽlẽk nyio cĩk kĩdĩk kadait ciithẽnẽy ĩcĩgĩk. 4 Ĩthõng ma ngĩ dĩcẽ eeta ciitha ĩmmanĩ, ĩthõng obbua nyion kĩ ĩnõõgõ katĩ ngĩ adak, adiim thẽk nẽẽgẽ kotholit kĩ eet cĩk abakanõy kĩ ĩnõõgõ. Adiim thẽk ngĩ aga ẽẽn eeta kuu cĩk adak nyion codoi. 5 Adiim thẽk ma ngĩ ẽẽn mĩrkĩc, kõdẽ kõõny cĩ adĩmaanu niigia wo, ngĩ ayak erkit codoi cĩ arittianĩ, ĩthõng athii cĩ awuli. 6 Korookjiowa vẽlẽk abũnna ngĩ arĩcana ĩnõõgõ, ĩthõng kĩĩ lõõcĩ jiatĩn cĩ ẽnnẽ lõõcĩ õmmõtõ kĩ wec, katĩ ngĩ adiim thẽk eeta vẽlẽk cĩk Ĩthraĩlĩ apak ĩnõõgõ. 7 Ĩthõng abũnna ma ngĩ adĩma nẽẽgẽ biyyie õõgĩ, ĩthõng ellik nẽẽgẽ kabanyõy kĩ katũga tiddina lomolorowa ĩcĩ ciithenu ngatĩ adaĩ nẽẽgẽ nyio ẽẽ. 8 Baalin nĩcẽ kir abũnna ngĩ adak nẽẽgẽ kiding cĩ avaaddi guyyia, kĩ kẽgẽrõ cĩk aakaatĩ, ĩthõng kĩ ahat cĩ avaadiay cĩ kothii nyĩgĩt. 9 Nyĩ adakcu kiding cũlahak, kõdẽ akcu maamĩy. Avadit thoo kĩ õõwa, kĩ kaal cĩk keengtinu guyyia. 10 Nyĩ anyigianu ĩmma kaavu kĩĩ ngerethietĩn, ma ngĩ aavu ĩmma kĩĩ ngerethietĩn abũnna mĩ atuuththu ĩnõõnõ. 11 Gõõl cĩ katĩ adawu niigia coo, itihimit ceremua cuguk katĩ mĩ idiimtu otooththu, itihimit caava, ĩthõng eyeit kẽẽt cĩ towominto athĩnẽy. Adait taman, ẽẽn nẽ Kõr cobbi cĩ Ngothio cĩ Makayyiokto. 12 “Baalin nĩcẽ kõwõyyẽ katĩ na looc cĩ Ijibi vẽlẽk, karui dõõlĩ cĩk ẽẽn abuuẽt cĩk maacĩk cĩk ẽẽn eet kĩ kẽlẽgẽ, ĩthõng kuuka nyekucnya cĩk Ijibi. Keeni na Makayyioit. 13 Biyyieta cĩk aatĩ katũga ẽẽ, ẽẽn katĩ cĩk ẽyẽla ciithi cĩk attu niigia. Ma kĩcĩna biyyie kongoththung katĩ na agiitia, ĩthõng athii na cĩ keheccung agiitia, katĩ mĩ kuuki na eet cĩk Ijibi.
14 “Abũnna katĩ mĩ ahadanu kõr coo, ĩthõng nyia wũ kĩdĩmanewung balna na. Anycĩk kõr coo kĩĩ peyian cĩ Makayyiokto dõõkĩthĩ erkinyiay vẽlẽk ĩcĩk katĩ avvunni doolia cĩk doolenu kĩĩ kayahak bulẽnĩt Makayyioit Nyekuc. 15 Uduit ahat cĩ avaadiay cĩ kothii nyĩgĩt, iinyiay ĩcĩk ẽẽn tũrgẽrẽm. Kõr cĩ ẽẽn codoi abũnna mĩ enyewu nyĩgĩt vẽlẽk ciithẽnẽy ĩcuguk, ĩthõng ma ngĩ uduk eeti ĩmma ahat cĩ avaadiay cĩ ayak nyĩgĩt wathinniowẽy ĩcĩk ẽẽn tũrgẽrẽm wo, athii katĩ nẽ cĩ ekebothi eet cĩganĩk Ĩthraĩl. 16 Kõr cĩ ẽẽn codoi, ĩthõng naboo waathĩna ĩcĩ ẽẽn tũrgẽrẽm, urumtõy, ĩthõng alayyiowu. Kothii tiic cĩ adĩmanni wathinniowẽy nĩĩkẽ, utukurit ahat dõ cĩ aduk eeta vẽlẽk, tiic cĩ adĩmannu dõ coo.
17 “Ebelbelliek Peyian cĩ Ahat cĩ Avaadiay cĩ Kothii Nyĩgĩt,a nyatarka balna kõr nĩcẽ kẽyẽha na eet cuguk ngatĩvõrĩ looca ĩcĩ Ijibi. Katĩ gõõ dõõkĩthĩ wathinniowẽy ĩcĩk avvu abũnna ma ngĩ atalnu kõr cobbi coo. 18 Uduit niigia ahat cĩ avaadiay cĩ athii cĩ ayak nyĩgĩt, ẽtẽrẽktaĩ jiatĩn cĩ kõr cĩ ẽẽn õmmõtõ kĩ wec cĩ nyĩĩlok cĩ ẽẽn codoi kĩ jiatĩn cĩ ẽẽn etĩmma kĩ codoi. 19 Iinyiay ĩcĩk ẽẽn tũrgẽrẽm kothii nyĩgĩt cĩk ijiowuay ciithẽnẽy ĩcuguk, ĩthõng mĩ uduk eeti ĩmma cĩ Ĩthraĩlĩ, kõdẽ cĩ rẽẽng ahat cĩ avaadiay cĩ ayak nyĩgĩt, athii naboo nẽ cĩ ekebothi eet cĩganĩk. 20 Nyĩ adukcu gimma cĩ adĩmaniay cĩ ayak nyĩgĩt. Ngatĩ attu niigia vẽlẽk uduit ahat cĩ avaadiay cĩ kothii nyĩgĩt.”
21 Ũtũvvũ Mutha eet cĩk obbitik vẽlẽk cĩk Ĩthraĩlĩ, ĩthõng ennek ĩnõõgõ ne, “Abũnna niigia vẽlẽk dodoyyie mĩ adĩmaanu nyion cĩ dĩcĩ, ĩthõng apaktu kĩĩ cĩ Kõr cobbi cĩ Ngothio. 22 Ĩdĩmta ballõk cĩk kẽẽtak, aryik ĩnõõgõ biyyietĩy dũũca, ĩthõng elliwu biyyie õõgĩ katũga tiddina, ĩthõng elliwu õõgĩ cellietẽy lomolorẽtẽy. Kothii et ĩmma codoi ĩcunung cĩ ẽẽkta ngĩtĩvõrĩ ciitha ĩcĩnnĩ kĩĩ lõõcĩ ngerethietĩn. 23 Katĩ mĩ õkkõ uuk Makayyioiti eet cĩk Ijibi, acĩn katĩ nẽ biyyie katũga tiddina kĩ kabanyõy ciithẽnẽy ĩcĩk Ĩthraĩlĩ, ĩthõng katĩ õkkõ nẽ, uungni katũgẽt nĩĩkẽ, ĩthõng athii katĩ Makayyioiti cĩ anyi et cĩ ẽgẽrẽthan eet wo, kitio ciithi cuguk, ĩthõng uruk nẽ abuuẽt cuguk.
24 “Uthuutti thoothonniok cĩkkõ kũdũt kĩĩtõ cuguk kĩ dõõlĩ cĩk dõõlĩ cuguk. 25 Katĩ mĩ itioththu niigia looc cĩ katĩ anyung agiitia Makayyioiti kĩ balna mĩ aduwa, ĩdĩmanit peyian coo. 26 Ĩthõng ma ngĩ ajinnung agiitia doolia cuguk a ne, ‘Nyia cĩ katalnĩ naaga kõrra cobbi wo?’ 27 Uduktiak ĩnõõgõ entek ne, ‘Ẽẽn coo Kõr cĩ Ngothio cĩ balna õngõthĩ Makayyioiti ciithi cĩk eet cĩk Ĩthraĩlĩ balna looca ĩcĩ Ijibi. Ĩthõng ũtũngek korookjiok cĩgaak balna ngĩ aruk nẽ eet cĩk Ijibi.’ ” Ĩthõng akatit eeta kuthungti alayyiõy. 28 Ĩdĩmanit eeta cĩk Ĩthraĩlĩ kĩ balna ngĩ aduwaai Makayyioiti Mutha kĩ Aarõn.
29 Ma balna baalina tobbi uruk Makayyioiti lõgõõ cĩk ẽẽn abuuẽt vẽlẽk looca ĩcĩ Ijibi, logoo cĩ alaan wũ aavĩ taabawa, kĩ abuuẽt cĩk eet cĩk ecebjie kĩjana, kĩ abuuẽt cĩk kẽlẽgẽ vẽlẽk cĩk eet cĩk Ijibi. 30 Ĩtĩngathõ alaanĩ baal kĩ gaala kĩ eet cĩk Ijibi vẽlẽk, aavĩ balna ulua Ijiba cobbi, kothii balna ciith cĩ athii cĩ adaaknĩ eeti.
Lugith
31 Ũtũvvũ alaanĩ Mutha kĩ Aarõn baal, ĩthõng ennek ne, “Ĩtĩngathõ, ũtũngtek eet cĩganĩk agiitia kĩ eet cĩk Ĩthraĩlĩ! Õõt alaac Makayyioit kĩ balna ngĩ ajinnu ẽẽ. 32 Ayait tĩĩn cuguk kĩ ẽẽtha kĩ athaa kĩ balna ngĩ athinnu ẽẽ, ĩthõng oottu, ĩthõng agatana aneeta buu.”
33 Entek eeta cĩk Ijibi eet cĩk Ĩthraĩlĩ ne, “Ũthũũktek taman ũtũngtek looc cĩnang wo. Ma ngĩ athii niigia cĩ ovvoyyu, kõdẽ ngĩ kadaakna naaga.” 34 Ĩthõng ayait eeta tũkan cĩnĩng cĩ ongonyie wũ balna nga karyiwothĩk nyĩgĩta, ĩthõng, aryik giiwa cĩ ongonyini, ĩthõng ubungit nẽẽgẽ tũkan cĩ ongonyie ceremuanĩy, ĩthõng odongit gaavũanĩy. 35 Ĩdĩmanit eeta cĩk Ĩthraĩlĩ kĩ balna ngĩ aduwaai Mutha, ĩthõng ijinit nẽẽgẽ eet cĩk Ijibi thĩĩk cĩk athĩ kathalkathal kĩ daab kĩ ceremua. 36 Aanyĩk Makayyioiti eet cĩk Ijibi kagantõy kĩ eet cĩk Ĩthraĩlĩ, ĩthõng aanycĩk nẽẽgẽ ĩnõõgõ kaal cĩk ajin nẽẽgẽ, ĩthõng ootti eeta cĩk Ĩthraĩlĩ eetĩnẽy ĩcĩk Ijibi balinit cĩnĩng.
37 Õõt eeta cĩk Ĩthraĩlĩ ĩcĩ Ramẽthẽthĩ atik gõõl cĩ õkkõ ĩcĩ Thukothĩ. Ẽẽn balna eeta vucciaknya eet etĩmma kĩ vucciaknya eet õmmõtõ (600,000) cĩk õwõ thoonĩy athii cĩ kẽkẽb dõõlĩ kĩ ngaay. 38 Irioit nẽẽgẽ kĩ eet õõgĩ cĩk athii cĩ ẽẽn Ĩthraĩl, kĩ naboo tĩĩn cĩk meelĩk, mẽẽlĩ ẽnna kĩ athaa buu. 39 Ogoryia balna nẽẽgẽ ahat cĩ kothii nyĩgĩt tũkana wũ ongonyie wũ balna ayaha nẽẽgẽ looca ĩcĩ Ijibi. Kothii balna nyĩgĩt tũkana ĩcĩ ongonyie, nyatarka balna umuryie nẽẽgẽ looca ĩcĩ Ijibi, ĩthõng kothii balna itin cĩ adĩmanĩ nẽẽgẽ ahat cĩnĩng.
40 Abaak balna eeta cĩk Ĩthraĩlĩ looca ĩcĩ Ijibi erkinya eet etĩmma kĩ etĩmma kõmmõtõ (430). 41 Ma balna ma ngĩ edeciay erkinya neekie, ũtũngtek tatũgẽta cĩk eet cĩk Makayyioktak vẽlẽk looc cĩ Ijibi. 42 Nyatarka balna acĩnẽ Makayyioiti baalin nĩcẽ kĩĩ kẽyẽha ĩnõõgõ ngatĩvõrĩ looca ĩcĩ Ijibi, abũnna eeta vẽlẽk cĩk Ĩthraĩlĩ baalin coo ngĩ acĩnẽ kĩĩ kotongollie Makayyioit, ĩthõng otongollie doolia cĩk doolenu cĩk katĩ avvu.
Thoothonniok cĩk Ngothiak cĩk kõwõbĩ
43 Uduwak Makayyioiti Mutha kĩ Aarõn ennek ne, “Thoothonniok cĩkkõ cĩk thẽk owobju Kõrra cobbi cĩ Ngothio. Kothii et cĩ rẽẽng cĩ adak dainit Kõrra cobbi cĩ Ngothio. 44 Eeta gwuak cĩk ẽẽn nyakapanak wũk utuyyiawu niigia, abũnna ngĩ adakcie nẽẽgẽ katĩ mĩ eteddu niigia ĩnõõgõ eleeti cĩgĩk. 45 Ĩthõng thĩ, athii eeti ĩmma cĩ arumenu kĩ aniitia cĩ aticanothici aniitia cĩ adak ĩnõõnõ.
46 “Abũnna thẽk ngĩ adakcie ciitha ĩcĩ odoi, nyĩ õkõyyẽ kiding ĩmma ngatĩvõrĩ ciitha. Nyĩ aduuli ammẽ õõgĩ. 47 Abũnna thẽk ma ngĩ alayyie eeta vẽlẽk cĩk Ĩthraĩlĩ.
48 “Eeti cĩ rẽẽng cĩ abaak arumenu kĩ agiitia cĩ adiim ala Kõr cobbi cĩ Ngothio cĩ Makayyiokto, anycĩk kẽtẽd eeti dõõlĩ vẽlẽk cĩk maacĩk ciitha ĩcĩnnĩ, ĩthõng thĩ, aavu kĩ eeti cĩ arittiay looca cunung. Athii eeti cĩ maacĩ cĩ nga kẽtẽdẽ cĩ adak ĩnõõnõ. 49 Adĩmanothi Ngiranĩ coo eet cĩk abaak ngato kĩ eet cĩk rẽẽng cĩk abaak ĩcunung.”