Tẽgẽl cĩ Mutha
15
Ĩthõng ebelliek balna Mutha kĩ eet cĩk Ĩthraĩlĩ tẽgẽl Makayyioit,“Kebelei katĩ na Makayyioit tẽgẽl,
nyatarka ijiar balna nẽ mĩrõk cĩgaac
nyangõlẽ kĩ macuccioit cĩnnĩ
utdukeek nẽ ĩnõõgõ bũlũc ĩcĩtõ.
2 Ẽẽn Makayyioiti tiirthẽt cannĩ kĩ tẽgẽl cannĩ,
ĩnõõnõ cĩ ẽlla aneeta,
ẽẽn nẽ Nyekuc cannĩ, ĩthõng kadihithi katĩ na ĩnõõnõ,
Nyekuc cĩ baang cannĩ, ĩthõng kadihithi katĩ na ĩnõõnõ.
3 Ẽẽn Makayyioiti et cĩ joro,
ẽẽn Makayyioiti thar cĩgĩnĩk.
4 Utdukeek nẽ kaal cĩk õgõõn
kĩ toromilẽta cĩk alaan cĩ Ijibi
kĩ nyĩcẽkẽr cĩgĩnĩk bũlũc.
Ĩthõng ukku Bũlũc cĩ Merihi ẽẽ,
gaala cĩk obbitik cĩk alaanak.
5 Ĩthõng ukku bũlũc ĩnõõgõ,
ukuyyie nẽẽgẽ õõt ĩcĩtõ kĩ gõõ ngĩ akuui bĩĩ.
6 “Makayyioit, athiiti cunnie cĩ athio,
ẽẽn bulẽnĩt cĩ tiirthẽto.
Makayyioit, athiiti cunnie cĩ athio
aduul mĩrõk.
7 Thõõtha ĩcunni ĩcĩ tiiri
itingkawu niia eet wũk aburni aniitia,
alanyĩt varacĩ cunnie,
ĩthõng ũtũũth ĩnõõgõ õgõõn kĩ tabbarra.
8 Nyatarka balna ĩtĩvongu niia ũngueca ĩcunni,
ĩthõng uluttie maama
abĩlĩ õgõõn kĩ titimma,
bũlũc cĩ wuuni kõkõm kutugu kĩ bĩĩ.
9 “Ẽngẽrẽn balna miroiti ĩthĩ ne, ‘Kumuri katĩ na ĩnõõgõ,
ĩthõng kagamaa katĩ na ĩnõõgõ gõõla.
Ĩthõng kagama na kaal cĩgĩk,
ĩthõng kuduwa na ĩnõõgõ, ĩthõng kĩccawa,
ĩthõng kadĩma katĩ na dĩla cannĩ,
ĩthõng kẽdẽca ĩnõõgõ.’
10 Ĩthõng ũtũbũwewu niia ngõõt cunni,
ĩthõng ukku bũlũc ĩnõõgõ.
Ukuyyie nẽẽgẽ kĩ gõõ bĩĩ cĩ adĩngdĩngĩ
maamĩytõ ĩcĩk meelĩk.
11 “Makayyioit, nyekucnya cĩgang cĩk aduwonu kĩ aniitia?
Ngẽnẽ cĩ õgõõn kĩ niia, cĩ calla õrrõt, cĩ abulie õrrõt,
cĩ adĩman thoothonniok cĩk anaat eeta?
12 Dõng niia athiit cunni cĩ athio,
ĩthõng ukku lõõcĩ ĩnõõgõ.
13 “Mĩnana cunni cĩ athii cĩ edeciay
ũũwa katĩ niia eet wũk ẽẽla niia,
tiirthẽta ĩcunni ebei katĩ niia ĩnõõgõ,
ĩthõng kõõt looca ĩcunni cĩ callĩ.
14 Athĩhĩ katĩ eeta cĩk loociowu thõõth, ĩthõng abarritita,
ĩthõng agam katĩ tongolinti eet cĩk Vilithini.
15 Ĩthõng otongolliei katĩ alaanẽta cĩk Ẽdõmĩ aniitia,
ĩthõng abarrit katĩ alaanẽta cĩk Mõabĩ,
ĩthõng eeta cĩk looc cĩ Kananĩ ivirit katĩna,
16 alanglangit, ĩthõng abarritita.
Makayyioit cĩnang, athiiti cunnie cĩ tiiri
agam ĩnõõgõ noko kutugu kĩ bĩĩ,
gii katĩ eeta wugunniek wũk ẽẽla niia
õvvõ katĩ nẽẽgẽ ẽdẽẽm loociok cĩgĩk.
17 Makayyioit, ayaha katĩ niia eet cugunik
kabaaitõ thiira ĩcunni ĩcĩ aragĩth eeta wugunniek,
ngatĩ balna ẽngẽnycẽ niia kõrõõk cunni
kĩ ciith cunni cĩ lawintio.
18 Agamnyet katĩ Makayyioiti kũdũt.”
19 Ma balna ayahak Makayyioiti nyangõlẽnya cĩk alaan cĩ Ijibi kĩ kaal cĩgĩnĩk cĩk õgõõn kĩ toromilẽta kĩ eet cĩk amacuc nyangõlẽnya, kõõt nẽẽgẽ vẽlẽk bũlũca, ĩthõng ukkuẽcõ maama cĩk bũlũcak ĩnõõgõ, ĩthõng thĩ, eeta cĩk Ĩthraĩlĩ õtõõthõ nẽẽgẽ bũlũca ngatĩ õdõõĩ.
20 Ĩthõng Miriami wũ ẽẽn ngaa cĩ õthõõth molook cĩ Nyekuco, ngõõnĩ Aarõnĩ, ĩdĩma nẽ cõõrĩn attia ĩcĩnnĩ, ĩthõng owobit ngaay vẽlẽk ĩnõõnõ, ayak cõõrĩn arũgũmĩ. 21 Ebelothĩk Miriami ĩnõõgõ:
“Ebelliothĩk niigia Makayyioit,
nyatarka maka nẽ õrrõt.
Ĩthõng nyangõlẽ kĩ macuccioit cĩnnĩ,
utdukeek nẽ ĩnõõgõ bũlũca.”
Maam cĩk Maara kĩ Elim
22 Ĩthõng ma baa ngĩ abaaktiay ũũwĩ Mutha eet cĩk Ĩthraĩlĩ Bũlũca ĩcĩ Merihi, ĩthõng õõt nẽẽgẽ baatha ĩcĩ Thuri. Iinyiay ĩcĩk ẽẽn iyyio õwõ nẽẽgẽ baatha athii cĩ ijiowa maam. 23 Ma balna ngĩ avvu nẽẽgẽ ngĩtĩ athĩ Maara, athii nẽẽgẽ cĩ awũd maam cĩk Maara, nyatarka aakaatĩ balna maama. Ĩnõõnõ cĩ kathĩ nginicẽ ne, Maara wo. 24 Ĩthõng othoothitõ eeta Mutha ĩĩtõ ne, “Kawũd tooko naaga nyia?”
25 Ĩthõng utuluwik Mutha Makayyioit, ĩthõng eyelek Makayyioiti ĩnõõnõ ngĩtĩ aavẽ kẽẽt. Ĩthõng utdukeek nẽ ĩnõõnõ maamĩy, ĩthõng ivitia maama ũbũnta.
Ma balna natẽ aanyĩk Makayyioiti ĩnõõgõ ngiran kĩĩ kĩtĩman nẽ ĩnõõgõ. 26 Ĩthĩ nẽ ne, “Ma ngĩ athĩknu niigia jurrung molook cĩ Makayyiokto Nyekuc cunung, ĩthõng ĩdĩmantu gii cĩ abũnna kẽbẽrẽnĩy ĩcĩgĩnĩk, ma ngĩ arĩcananu niigia thõõth cĩ aduwa nẽ, ĩthõng uthuuttu thoothonniok cĩgĩnĩk cĩk õkõmĩ, athii katĩ na cĩ kayahacung moorithiok wũk obbitik wũk balna kayahai na eet cĩk Ijibi, ĩthõng keeni na Makayyioit cĩ kadĩmannung agiitia ũbũnta.”
27 Ĩthõng ivitia balna nẽẽgẽ ngĩtĩ athĩ Elim ngĩtĩ balna, aatẽ duwwẽna cĩk ẽrẽnnanĩ cĩk ẽẽn õmmõtõ kĩ ramma kĩ kẽẽn cĩk kũtdenu eet iyyio kõmmõtõ, ĩthõng abaaitõ nẽẽgẽ natẽ joonui maamĩy.