Hecinit cĩ girrocu
10
Ĩthõng ennek Makayyioiti Mutha ne, “Bĩt ĩcĩ alaano, kaanyĩha na thĩnĩn cĩnnĩ kĩ thinneti cĩk gaala cĩgĩnĩk kokomit kĩĩ gẽrthẽ, kĩĩ katĩ kitican na tiiciok cĩk eyeliay cĩganĩk ĩcĩnĩng, 2 kĩĩ katĩ duwak niia dõõlĩ cugunik cĩk doolenu nyia wũ balna kadĩmanei na eet cĩk Ijibi buth, ĩthõng kĩ nyia wũ kadĩmanei na ĩnõõgõ yelintiok, ĩthõng kĩĩ koccia katĩ agaac niigia ĩĩtõ ne, keeni na Makayyioit.”3 Ĩthõng õõt Mutha kĩ Aarõn ĩcĩ alaano, ĩthõng entek ĩnõõnõ ne, “Thõõth cĩ balna aduwa Makayyioiti coo, athĩ Nyekuci cĩ Heburu ne, ‘Aburi niia ngĩ athĩkna aneeta kĩĩ tĩngan? Anyĩk eet cĩganĩk kõõt, kĩĩ katĩ kalayyia nẽẽgẽ aneeta. 4 Ĩthõng thĩ, ma ngĩ ajuranẽ niia ĩnõõgõ athii cĩ anyi ĩnõõgõ kõõt, kayahai katĩ na girroc looc cunni lootha. 5 Abbĩththĩ katĩ nẽẽgẽ looc, kĩĩ katĩ athii lõõcĩ cĩ edenyiay. Ẽgẽrẽthantẽ katĩ labĩna cuguk wũk ngaanĩ kẽgẽrẽthan tammu cĩ mũllenu, ĩthõng ẽgẽrẽthan katĩ girroca cĩkkõ gii vẽlẽk cĩ anyigiay kĩ kẽẽn buu. 6 Abbĩththĩ katĩ girroca ciithi cugunik kĩ cĩk gaala cugunik kĩ eet cĩk Ijibi vẽlẽk. Gii ĩmma cĩ nga baajigu cugunniek kĩ baatĩ baajigu cuguk ngaanĩ thẽk balna kĩcĩnĩt, ngaatĩ kõr wũ balna aatẽ nẽẽgẽ looca ĩcoo kĩĩ kõr coo.’ ” Ĩthõng ũtũwẽ Mutha, ĩthõng ũtũngek alaan.
7 Uduktiak gaala alaan, entek ne, “Eheccet thẽk katĩ eeti coo kĩĩ tĩngan? Anyĩk eet cĩkkõ kõõt, kĩĩ katĩ kalaacõ nẽẽgẽ Makayyioit Nyekuc cĩnĩng. Nga niia gaa ngĩ ẽgẽrẽthanẽ Ijibi?”
8 Ĩthõng balna eyektak eeta Mutha kĩ Aarõn alaan. Ĩthõng ĩthĩ, nẽ ne, “Õõt, alaac Makayyioit Nyekuc cunung. Ĩthõng thĩ, õõ ngẽnẽ katĩ cĩk õvvõ?”
9 Atajan Mutha, ĩthĩ ne, “Kovvoyyia katĩ naaga kĩ dõõlĩ cĩk kĩdĩk kĩ eet cĩk nyaatĩk, kĩ dõõlĩ cĩgaak cĩk maacĩk kĩ cĩk ngayyik, ĩthõng kĩ kaal kĩ tĩĩn cĩgaak, nyatarka kadiimnya kalaweca naaga kõr cobbi Makayyioit.”
10 Ĩthĩ alaanĩ ne, “Aavĩ Makayyioiti kĩ agiitia, mĩ kaanyung na agiitia õõt, kõdõwẽ kĩ dõõlĩ kĩ ngaay cuguk. Kagga na adiimnyu niigia adĩmanecangũ aneeta thõõth cĩ gerthe. 11 Athiitõ, anycĩk niigia eet cĩk maacĩk dõ kõõt kalaacõ Makayyioit, kĩ balna thẽk ngĩ ajinnu niigia ẽẽ,” Ĩthõng umurit balna eeta Mutha kĩ Aarõn ngatĩ aavẽ alaanĩ.
12 Ĩthõng uduwak Makayyioiti Mutha ennek ne, “Dongek athiit cunni looc cĩ Ijibi, kĩĩ katĩ kivitia kĩbbĩtĩt girroca looc, ĩthõng ẽgẽrẽthanit labĩ vẽlẽk cĩk akula manẽẽnĩy, gii vẽlẽk cĩ uungni tammu cĩ mũllenu.”
13 Ĩthõng odongek balna Mutha kẽẽt cĩnnĩ looc cĩ Ijibi, ĩthõng aanyĩk Makayyioiti ngõõt cĩ aku tõõna ĩcĩ alibanĩ kõr kuvungan baalin vẽlẽk. Ma balna ngerenniet ayaha ngõõtĩ girroc, 14 agamit nẽẽgẽ Ijib vẽlẽk, ĩthõng aavutõ tonniok vẽlẽk looca, ĩthõng mẽẽlĩ nẽẽgẽ õrrõt. Ngaanie thẽk balna nõõnõ kaavu hecinti cĩ girrocu ketee, ĩthõng athii katĩ naboo cĩ aku. 15 Ĩbĩtĩt nẽẽgẽ looc kĩĩ ollia lõõcĩ cuc. Ẽgẽrẽthanit nẽẽgẽ labĩ wũk balna uungnothi manatõ vẽlẽk balna ngĩ atĩĩlĩ tammu cĩ mũllenu, kaal vẽlẽk cĩk alĩnna kĩ nyegerua cĩk keenu. Kothii gii cĩ cũlaĩ kẽẽta, kõdẽ kartẽ vẽlẽk cĩk uungnothi looca ĩcĩ Ijibi.
16 Ũtũvvũ alaanĩ Mutha kĩ Aarõn tamanoko, ĩthõng ennek ne, “Kẽgẽrẽthana balna na thõõth cĩ Makayyioit Nyekuc cunung, ĩthõng kĩ agiitia. 17 Ũtũngtek yoko thoothonniok cĩk gerthek cĩganĩk naboo, ĩthõng alayyiowangũ kĩ Makayyioit Nyekuc cunung kẽnyẽhẽ hecinti cĩ gerthe cĩ girrocu wo ĩcĩnanĩ.”
18 Ĩthõng ũtũngek Mutha alaan, ĩthõng ũũk ala Makayyioit. 19 Ĩthõng itiona Makayyioiti ngõõt cĩ tiiri cĩ tõõn cĩ okolothĩcẽ kõrra atik girroc õkõyyĩ Bũlũca ĩcĩ Merihi ĩcĩtõ. Kothii balna girrococ codoi cĩ uungnothi looc vẽlẽk Ijiba. 20 Ĩthõng thĩ, balna aanyĩk Makayyioiti thĩnĩn cĩ alaano kõkõm kĩĩ gẽrtha, ĩthõng athii nẽ, cĩ anyi eet cĩk Ĩthraĩlĩ kõõt.
Hecinit cĩ muwuro
21 Ĩthõng ennek Makayyioiti Mutha ne, “Dongek athiit cunni tammutiddin, kĩĩ katĩ kĩĩ muwur lõõcĩ Ijiba vẽlẽk, kĩĩ katĩ kagaacõ eeta a ne, ĩthĩ muwur lõõcĩ õrrõt.” 22 Ĩthõng odongek Mutha athiit cĩnnĩ tammutiddin, ĩthõng ubung muwuri cobbi Ijib iinyia iyyio. 23 Kothii et ĩmma cĩ acĩn gõõnĩ, kõdẽ uungni kõrõõk cĩnnĩ iinyia iyyio. Ĩthõng alanyĩt thẽk balna kõr vatĩkẽy ĩcĩk aatẽ eeta cĩk Ĩthraĩlĩ.
24 Ĩthõng ũtũvvũ alaanĩ Mutha, ĩthõng ennek ĩnõõnõ ne, “Õõt, alaac Makayyioit! Ĩthõng eyektu dõõlĩ kĩ ngaay buu irioktu kĩ agiitia, ũtũngtek thẽk athaa kĩ tĩĩn kĩ ẽẽtha.”
25 Ĩthõng thĩ, ĩthĩ Mutha ne, “Athii tõ, adiim thẽk niia ngĩ anyet ageeta kotodongteha Makayyioit Nyekuc cĩnang kaal cĩk cavawu cĩk avaaddi. 26 Ĩthõng athii katĩ naaga cĩ kagayya tang, kõdẽ ẽẽth, kõdẽ atheet jang cĩ katĩ kadiimnya, ĩthõng kõdõlanta naaga natẽ. Ĩnõõnõ thĩ cĩ athii cĩ kuungnicia naaga ĩnõõgõ codoi ngato wo. Nyatarka kadiimnya katicaninia õõgĩ kalawua Makayyioit Nyekuc cĩnang.”
27 Ĩthõng thĩ, aanyĩk Makayyioiti thĩnĩn cĩ alaano kõkõm kĩĩ gẽrtha, ĩthõng balna athii nẽ cĩ adiim ngĩ anyi eet kõõt. 28 Ennek alaanĩ Mutha ne, “Nyẽhẽ ĩcĩnanĩ! Nyĩ akuni ĩcĩnanĩ naboo! Mĩ icinu niia nguum cannĩ naboo adaai katĩ niia!”
29 Atajan Mutha ĩthĩ ne, “Athii katĩ naboo na cĩ kedenyiay nguuma cunni kĩ yoko ngĩ aduwa niia wo.”