Hecinit cĩ kaalu
9
Ĩthõng uduwak Makayyioiti Mutha ennek ne, “Bĩt ĩcĩ alaano, ĩthõng duwak ĩnõõnõ ennek ne, thõõth cĩ aduwa Makayyioiti coo, ‘Athĩ Nyekuci cĩ õõ Heburu ne, “Anyĩk niia eet cĩganĩk kõõt, kĩĩ katĩ kalayyia nẽẽgẽ aneeta.” 2 Mĩ ajuranẽ niia athii cĩ anyi ĩnõõgõ kõõt, ĩthõng agami ĩnõõgõ, 3 ĩthõng thĩ, ayahai katĩ athiiti cĩ Makayyiokto mõõrĩth cĩ gerthe kaal cugunik nyangõlẽnya, thigirie, athaa, ẽẽtha kĩ nyaakalnya. 4 Ĩthõng ẽngẽr katĩ Makayyioiti kaal cĩk Ĩthraĩlĩ kaalĩy cĩk Ijibi, kĩĩ katĩ athii cĩ adaaĩ kaala cĩk Ĩthraĩlĩ.’ ”5 Arĩk Makayyioiti itin, ĩthõng ĩthĩ ne, “Adĩman katĩ Makayyioiti thõõth coo lootha looca ĩcoo.” 6 Ĩthõng ĩdĩman Makayyioiti balna ngerethietĩn cĩnnĩ. Adaaitõ kaala cĩk eet cĩk Ijibi vẽlẽk, ĩthõng athii kaala cĩk Ĩthraĩlĩ cĩ adaaĩ. 7 Ition alaanĩ eet kõõt kĩcĩnĩt, ĩthõng ijiokta mĩ kothii kaal cĩk eet cĩk Ĩthraĩlĩ cĩk adaaĩ. Ĩthõng thĩ, õkõmĩ thĩnĩn cĩnnẽ noko athii cĩ anyi eet kõõt.
Hecinit cĩ duletu
8 Ĩthõng uduwak Makayyioiti Mutha kĩ Aarõn ennek ne, “Ĩdĩmta tithet cĩ dĩcĩ kithingaĩ, ĩthõng anyĩk niia Mutha keelĩk tuu kẽbẽrẽnĩy ĩcĩk alaano. 9 Aku katĩ abuei ngõõtĩ tithet looc cĩ Ijibi vẽlẽk, ĩthõng ivitia dũlẽta eetĩnẽy kĩ kaalĩy looca cĩ Ijibi vẽlẽk.”
10 Ĩdĩmta balna nẽẽgẽ tithet guyyia kithingaĩ, ĩthõng õõt ngatĩ aavẽ alaanĩ, ĩthõng eelĩk Mutha tithet tuu, ĩthõng adait dũlẽta eet cĩk Ijibi kĩ kaal cĩgĩk. 11 Athii ngarẽta cĩ avvuneei Mutha, nyatarka dũlẽt cĩk ayak nẽẽgẽ kĩ eetĩnẽy cĩk Ijibi vẽlẽk. 12 Ĩthõng thĩ, aanyĩk Makayyioiti thĩnĩn cĩ alaano kõkõm kĩĩ gẽrtha, ĩthõng athii nẽ cĩ athĩrar Mutha kĩ Aarõn, kĩ balna mĩ aduwaai Makayyioiti Mutha.
Hecinit cĩ tammu cĩ mũllenu
13 Ĩthõng uduwak Makayyioiti Mutha ennek ne, “Tĩnga ngerenniet ngaanĩ, ĩthõng othoothiowu kĩ alaan, ĩthõng duwak ĩnõõnõ ennek ne, ‘Thõõth cĩ aduwa Makayyioiti coo, athĩ Nyekuci cĩ Heburu ne, Anyĩk eet cĩganĩk kõõt, kĩĩ katĩ kalayyia nẽẽgẽ aneeta. 14 Mĩ athii niia cĩ adĩmani, kitiona katĩ na moorithiok cĩganĩk vẽlẽk cĩk gerthek kuukti aniitia, kĩ gaala cugunik, kĩ eet vẽlẽk looca cunni, kĩĩ katĩ gaa niia ĩthĩ ne, kothii et ĩmma cĩ õgõõn kĩ na looca coo. 15 Ĩthõng yoko koccia ma ngĩ kõdõnga na athiit cannĩ, ĩthõng kuuki na aniitia kĩ eet cugunik mõõrĩtha cĩ koccia avillung agiitia vẽlẽk looca. 16 Ĩthõng thĩ, kodongnyi balna na aniitia, nyatarka thõõth coo, kĩĩ katĩ keyeleei na aniitia tiirthẽt cannĩ, kĩĩ katĩ woccia kagayyie thara cĩganniek eetĩnẽy ĩcĩk loociok vẽlẽk. 17 Nga niia athii cĩ adiimi anyi eet cĩganĩk kõõt noko. 18 Nyatarka thõõtha ĩcoo lootha itin coo, kayahai katĩ na Ijib mũllẽn cĩk obbitik, cĩk tammuak cĩk balna nga kuukitõ Ijib, wathinniowẽy thẽk wũk balna ijiowanĩ kĩĩ itin coo. 19 Abũnna koccia ngĩ aduwaai niia eet vẽlẽk cĩk Ijibi kĩ kaal kaavutõ ciithẽnẽy. Ma ngĩ athii nẽẽgẽ cĩ aatẽ ciithẽnẽy, adaaĩ katĩ nẽẽgẽ.’ ”
20 Abarrit balna gaala gwuak cĩk alaanak, thõõtha cĩ aduwa Makayyioiti wo, ĩthõng õõt nẽẽgẽ tamanoko kaanycĩk nyakapanak cĩgĩk kĩ kaal kaavutõ ĩcĩtõ, 21 ĩthõng thĩ, gaala gwuak cĩk athii cĩ ongollie thõõth cĩ Makayyiokto õrrõt wo, ũtũngtek nẽẽgẽ nyakapanak kĩ kaal cĩgĩk kaavutõ ngatĩvõrĩ.
22 Ĩthõng uduwak Makayyioiti Mutha, ennek ne, “Dõng athiit cunni tammuatiddina, kĩĩ katĩ kutduktiak mũllẽna Ijib vẽlẽk kĩ kaal kĩ eet kĩ gii vẽlẽk cĩ akula manẽẽnĩy ĩcĩk Ijibi.” 23 Ma balna ma ngĩ odongek Mutha kẽẽt cĩnnĩ tammutiddin, itiona Makayyioiti mũllẽn, ĩthõng abadek tammu looc. Ĩthõng itiona Makayyioiti tammu cĩ atĩĩlĩ mũllẽn looc cĩ Ijibi vẽlẽk, 24 Ĩtĩĩl tammu cĩ aku mũllẽnĩy, ĩthõng abadek looc vẽlẽk ĩcĩ diinu kĩ ĩcĩ lootu. Tammu cĩ mũllenu cĩ gerthe cĩ balna atĩĩlĩ ẽẽ, kothii balna tammu cĩ mũllenu cĩ õgõõn ketee balna Ijiba. 25 Uuk tammu cĩ mũllenu looc cĩ Ijibi vẽlẽk kĩ gii vẽlẽk cĩ aavĩ manatõ, kaal kĩ eeta, ĩthõng uuk labĩ vẽlẽk cĩk alĩnna manatõ, ĩthõng abacũ kẽẽn vẽlẽk. 26 Athii balna tammu cĩ mũllenu cĩ uuk looc cĩ Gõthẽnĩ, ngatĩ balna aatẽ eeta cĩk Ĩthraĩlĩ.
27 Ĩthõng ũtũvvũ alaanĩ Mutha kĩ Aarõn, ennek nẽ ĩnõõgõ ne, “Kẽgẽrẽthana na itin coo, ẽdẽẽm Makayyioiti, ĩthõng kẽgẽrẽthanta naaga kĩ eet cĩganĩk. 28 Alayyioetu ageeta ĩcĩ Makayyiokto, ũwũpantẽt mũllẽna kĩ badi. Kaanyung katĩ na agiitia õõtõ, athii katĩ niigia cĩ attiyyu Ijiba naboo.”
29 Atajan Mutha ĩthĩ ne, “Ma katĩ mĩ kũwa na ngatĩvõrĩ õlõõ cĩ gaalawu, kodongeei katĩ na athĩn cĩganĩk Makayyioit kalayyie. Abĩlĩ katĩ badia, ĩthõng kothii katĩ tammu cĩ mũllenu, kĩĩ gaa woccia niia ĩthĩ ne, ẽẽn lõõcĩ cĩ Makayyiokto. 30 Ĩthõng thĩ, kagayyi na aniitia kĩ gaala cugunik nga athii niigia cĩ ongolinu Makayyioit Nyekuc.” 31 Ẽgẽrẽthantẽ balna loceerina kĩ labĩ, nyatarka ibbiritõ balna nẽẽgẽ. 32 Athii balna cĩ ẽgẽrẽthanni kinyomona cĩk ẽẽn gẽẽmẽ, nyatarka ibbiritõ balna nẽẽgẽ vurtia.
33 Ĩthõng ũtũngek Mutha alaan kĩĩ kũũk ngatĩvõrĩ õlõõ cĩ gaalawu, ĩthõng odongek nẽ athĩn cĩgĩnĩk Makayyioit, ĩthõng ĩbĩl badia kĩ mũllẽn, ĩthõng ĩnĩnga tammu atĩĩlĩ looca. 34 Ma balna mĩ acĩn alaanĩ ĩbĩl tammu cĩ mũllenu kĩ badi wo, ẽgẽrẽthanõy nẽ naboo, ĩnõõnõ kĩ gaala cĩgĩnĩk aanycĩk nẽẽgẽ thinneti cĩgĩk kokomit kĩĩ gẽrthẽ. 35 Ĩthõng õkõm alaan thĩnĩn, ĩthõng ujuraĩ nẽ eet cĩk Ĩthraĩlĩ ngĩ õvvõ. Thõõth thẽk kir wũ balna aduwa Makayyioiti a ne, adĩman katĩ alaanĩ coo.