Hecinit cĩ nyarudetu
8
Ĩthõng thĩ, uduwak Makayyioiti Mutha ennek ne, “Bĩt ĩcĩ alaan cĩ Ijibi, ĩthõng ennek ĩnõõnõ ne, ‘Thõõth cĩ aduwa Makayyioiti coo, anyĩk niia eet cĩganĩk kõõt, kĩĩ kõõt kalayyia nẽẽgẽ aneeta. 2 Ma ngĩ ajuranẽ niia ngatĩ anyĩcẽ ĩnõõgõ kõõt, kayahai katĩ na looc cunni nyarũdẽta. 3 Abbĩththĩ katĩ Lĩĩlĩ cĩ Naaĩlĩ nyarũdẽta. Avvu katĩ nẽẽgẽ kõrõõk cunni kĩ lobela cunni, ĩthõng kĩ ciithẽnẽy ĩcĩk gaala cugunik kĩ eet cugunik. Õvvõ katĩ ngatĩ õngõnyĩ nẽẽgẽ aheenin cĩk avaadiay kĩ ngĩtĩ avaadinie aheenina. 4 Õvvõ katĩ nyarũdẽta otoddi aniitia kĩ eet cugunik kĩ gaala cugunik vẽlẽk.’ ”5 Ĩthõng ennek Makayyioiti Mutha ne, “Bĩt duwak Aarõn ennek ne, ‘Dõng kẽẽt attia cunni lilliowẽy, mõrẽẽtẽy, duwwuẽnĩy, ĩthõng anyĩk nyarũdẽt kivitia looc cĩ Ijibi.’ ”
6 Ĩthõng odongek balna Aarõnĩ athiit cĩnnĩ maam cĩk looc cĩ Ijibi, ĩthõng ẽtẽẽkta nyarũdẽta ngatĩvõrĩ, ĩthõng ĩbĩtĩt looc cĩ Ijibi. 7 Ĩthõng thĩ, atdanganta naboo ngarẽta buu kĩyokowo ngatĩnĩng labak, aanycĩk nẽẽgẽ buu nyarũdẽt kẽtẽkta kivitia looc cĩ Ijibi.
8 Ũtũvvũ alaanĩ Mutha kĩ Aarõn, ĩthõng ennek ne, “Alaac Makayyioit kĩdĩm nyarũdẽt cĩkkõ ngatĩvõrĩ ĩcĩnanĩ kĩ eetĩnẽy cĩganĩk, ĩthõng kaanyi katĩ na eet cugunik kõõt kotodongtek Makayyioit kaal cĩk cavawu.”
9 Uduwak Mutha alaan cĩ Ijibi ennek ne, “Kuungnici katĩ na aniitia thõõth coo, duwa nyiangũ itin cĩ kalawini na aniitia kĩ gaala, kĩ eet cugunik, kĩ ciithi cugunik, kĩĩ katĩ, koccia kũtũngtek nyarũdẽta ciithi cuguk, kõõt Lĩĩla ĩcĩ Naaĩlĩ ẽẽ, doo.”
10 Uduwak alaanĩ Mutha, ennek ne, “Dĩman lootha.”
Ĩthõng atajan Mutha ĩthĩ ne, “Õgõõn thẽk katĩ kĩ yoko mĩ aduwa niia wo, kĩĩ katĩ gaa koccia niia ĩthĩ ne, kothii et codoi cĩ õgõõn kĩ Makayyioiti Nyekuci cĩnang. 11 Uungnici katĩ nyarũdẽta aniitia kĩ ciithi cugunik, kĩ gaala cugunik, kĩ eet cugunik, ĩthõng aatĩ katĩ nẽẽgẽ Lĩĩla ĩcĩ Naaĩlĩ dõ.”
12 Ma balna mĩ ũtũngtek Mutha kĩ Aarõn alaan cĩ Ijibi, utuluwik Mutha Makayyioit thõõtha cĩ nyarũdẽt cĩk ayahai nẽ alaan cĩ Ijibi wo. 13 Ĩthõng ĩdĩman Makayyioiti gii cĩ ajin Mutha. Adaaitõ nyarũdẽta ciithẽnẽy, kĩ reerungẽtẽy kĩ varẽtẽy. 14 Alũtothi balna nyarũdẽta looc kĩĩ mẽẽlĩ kaavutõ kĩ kortonuana, ĩthõng ummu lõõcĩ ĩnõõgõ. 15 Ma thĩ balna alaanĩ mĩ acĩn ithiicõ nyarũdẽta wo, aanyĩk nẽ thĩnĩn cĩnnĩ kõkõm kĩĩ gẽrtha, ĩthĩnga athĩrar Mutha kĩ Aarõn kĩ balna mĩ aduwa Makayyioiti.
Hecinit cĩ vĩĩnyu
16 Ĩthõng uduwak Makayyioiti Mutha ennek ne, “Duwak Aarõn ennek ne, ‘Dõng kẽẽt cunni, ĩthõng uuku tõdõwa,’ ĩthõng katĩ utuyyie tõdõwa ĩthĩ vĩĩny looca ĩcĩ Ijibi vẽlẽk.” 17 Ĩdĩmanit nẽẽgẽ kĩyokowẽ, ma balna thĩna õdõng Aarõnĩ kẽẽt cĩnnĩ attia cĩnnĩ kĩĩ kuuk tõdõwa, ivitia vĩĩnya eetĩnẽy kĩ kẽlẽgẽnẽy, ĩthõng utuwuyyie tõdõwa vẽlẽk looca ĩcĩ Ijibi ĩĩtõ vĩĩny. 18 Ĩthõng ma balna mĩ adiim ngarẽta atdangana gõõla ĩcĩnĩng dõ labak, ẽrẽk ĩnõõgõ ma ngĩ atdangana. Ĩthõng balna aatĩ vĩĩnya eetĩnẽy kĩ kẽlẽgẽnẽy.
19 Uduktiak ngarẽta alaan cĩ Ijibi entek ne, “Ĩdĩman Nyekuci thõõth coo” Ĩthõng thĩ, balna õkõm thĩnĩn cĩ alaano athii cĩ athĩrar Nyekuc, kĩ balna mĩ aduwa Makayyioiti.
Hecinit cĩ kĩrongowu
20 Ĩthõng uduwak Makayyioiti Mutha ennek ne, “Tĩnga ngerenniet ngaanĩ, ĩthõng uuwu ĩcĩ alaan cĩ Ijibi katĩ mĩ õkkõ nẽ duwwua, ĩthõng ennewu thẽk ne, ‘Thõõth cĩ aduwaci Makayyioiti aniitia coo, anyĩk niia eet cĩganĩk kõõt, kĩĩ katĩ kalayyia nẽẽgẽ aneeta. 21 Ngĩ athii niia cĩ anyi eet cĩganĩk kõõt, kitiona katĩ na kĩrõng cĩk meelĩk kivitia ĩcunni kĩ gaala cuguk, kĩ eet cugunik, kĩ ciithẽnẽy cuguk. Abbĩththĩ katĩ kĩrõnga ciithi cĩk eet cĩk Ijibi, ĩthõng kĩ naboo ngĩtĩ aatẽ nẽẽgẽ.
22 “ ‘Kengeri katĩ na kõr nĩcẽ eet mĩn mĩn looca cĩ Gõthẽnĩ, ngatĩ aatẽ eeta cĩganniek. Kothii katĩ kĩrõng cĩk meelĩk natẽ, kĩĩ katĩ gaa niia ĩthĩ ne, aneeta Makayyioit, kaavẽ na looca coo. 23 Kadĩmanei katĩ na ngerinit cĩ eet cĩganĩk ĩcĩ eet cuguk. Eyeliay katĩ thõõth coo, adĩmanni katĩ lootha.’ ”
24 Ĩthõng ĩdĩman Makayyioiti thõõth coo. Utduuttiothĩk kĩrõnga cĩk meelĩk ciith cĩ alaan cĩ Ijibi kĩ ciithi cĩk gaala cĩgĩnĩk, ĩthõng ẽgẽrẽthanit kĩrõnga looc vẽlẽk cĩ Ijibi.
25 Ĩthõng ũtũvvũ alaanĩ Mutha kĩ Aarõn, ĩthõng ĩthĩ ne, “Õõt, otodongtek Nyekuc cunung gii cĩ cavĩto ngato looca coo.”
26 Ĩthõng thĩ, ĩthĩ Mutha ne, “Athii woccia cĩ abũnna. Anyinti cĩ katĩ kaanyi naaga Makayyioit Nyekuc cĩnac wo, gẽrtha katĩ ĩcĩ eet cĩk Ijibi. Ĩthõng mĩ kaanyi naaga anyinit cĩ gerthe kẽbẽrẽnĩy ĩcĩgĩk, athii koccia katĩ nẽẽgẽ cĩ ovocet ageeta? 27 Kadiim thẽk naaga kõwõ iinyia iyyio baatha kĩĩ kotodongtek kaal cĩk cavawu Makayyioit Nyekuc cĩnac, kĩ balna mĩ aduwacet nẽ ageeta.”
28 Ĩthĩ alaanĩ ne, “Kaanyung katĩ na agiitia õõt anycĩk kaal cĩk cavawu Makayyioit Nyekuc cunung baatha, ĩthõng thĩ, nyĩ ovvoyyu rẽẽna õrrõt. Lawowua aneeta buu.”
29 Atajan Mutha ĩthĩ ne, “Mĩ kũwa na tamanoko, kala katĩ na Makayyioit, ĩthõng lootha utungti katĩ kĩrõnga aniitia alaan cĩ Ijibi kĩ gaala cugunik kĩ eet cugunik. Nyĩ ovolongi naboo ngatĩ athii cĩ anyĩcẽ eet cĩgaak kõõt kotodongtek Makayyioit kaal cĩk cavawu.”