7
Ĩthõng ennek Makayyioiti Mutha ne, “Cĩnũ, kaanyi na aniitia avvu kĩ Nyekuci ĩcĩ alaan cĩ Ijibi, ĩthõng gotonu cunnie Aarõnĩ aavu katĩ nẽ kĩ eeti cĩ õthõõth molook cannĩ. 2 Duwak niia thõõth vẽlẽk cĩ kaduwaci na aniitia, ĩthõng uduwak gotonu cunnie Aarõnĩ alaan cĩ Ijibi kaanyĩk nẽ eet cĩk Ĩthraĩlĩ kõõt ngatĩvõrĩ looca cĩnnĩ. 3 Ma naboo kaanyi katĩ na thĩnĩn cĩ alaano kõkõm, kõdẽ woyyia ngĩ kadĩmani na thoothonniok cĩganĩk cĩk eyeliay kĩ tiiciok cĩk anatti Ijiba cĩk meelĩk, 4 athii katĩ nẽ cĩ athĩknung agiitia. Ĩthõng katĩ katadĩha na athĩn cĩganĩk eetĩnẽy cĩk Ijibi kĩ tiirthẽt cĩ tiic cĩ kuuke na ĩnõõgõ, ĩthõng kẽyẽha katĩ na eet cĩganĩk vẽlẽk cĩk Ĩthraĩlĩ ngatĩvõrĩ Ijiba tatũgẽtẽy cĩgĩk vẽlẽk. 5 Ĩthõng aga katĩ eeta cĩk Ijibi athĩ ne, keeni na Makayyioit mĩ katĩ kutdukeha na athĩn cĩganĩk eet cĩk Ijibi, ĩthõng kẽyẽha eet cĩk Ĩthraĩlĩ ngatĩvõrĩ.”6 Ĩdĩmanit Mutha kĩ Aarõn kĩ balna ngĩ aduwaai Makayyioiti ĩnõõgõ. 7 Ayak balna Mutha erkinya eet wec, ĩthõng ayak Aarõnĩ erkinya eet wec kĩ iyyio balna ngĩ õthõõthõy nẽẽgẽ kĩ alaan cĩ Ijibi.
Ũtũwẽ kẽẽt cĩ Aarõnĩ ĩthĩ kũwaat
8 Ennek Makayyioiti Mutha kĩ Aarõn ne, 9 “Ma ngĩ ennewung alaanĩ agiitia ne, ‘Ĩdĩmanit thõõth cĩ anaat eeta,’ duwak Aarõn, ennek ne, ‘Dĩma kẽẽt cunni cĩ towominto wo, ĩthõng utdukeewu loota ngatĩ aavẽ alaanĩ,’ ĩthõng katĩ ũũkcĩ kẽẽt kĩĩ kũwaat.”
10 Ĩthõng õõt Mutha kĩ Aarõn ĩcĩ alaano, ĩthõng ĩdĩmanit kĩ balna mĩ aduwaai Makayyioiti ĩnõõgõ. Utdukeek Aarõnĩ kẽẽt cĩnnĩ loota ngatĩ aavẽ alaanĩ kĩ gaala cĩgĩnĩk, ĩthõng ũtũwẽ ĩĩthĩ kũwaat. 11 Ũtũvvũ alaanĩ eet cĩk ẽgẽẽnyĩ kĩ ngarẽt cĩk ongonoththi, ĩthõng atdanganta naboo ngarẽta nẽẽgẽ buu cĩgĩk labak. 12 Utdukteek eeta vẽlẽk kẽẽn cĩgĩk loota, ĩthõng utuwuyyie ĩĩtõ kũwaanya. Ĩthõng ukku kũwaat cĩ Aarõnĩ kũwaanya cĩk ngaretu. 13 Õkõmĩ thĩnĩn cĩ alaano, ĩthõng athii cĩ athĩhĩ ĩnõõgõ, kĩ balna mĩ aduwaai Makayyioiti.
Hecinit cĩ biyyietu
14 Ĩthõng uduwak Makayyioiti Mutha ethek ne, “Õkõmĩ thĩnĩn cĩ alaan cĩ Ijibi, ĩthõng ajuranĩ nẽ eet ngatĩ õvõyyĩ. 15 Bĩt alaana cĩ Ijibi ngerenniet ngaanĩ, katĩ mĩ õkkõ nẽ lĩĩla. Rẽẽwõy titimma cĩ Lĩĩl cĩ Naaĩlĩ, urumtõy niia kĩ ĩnõõnõ, ĩthõng yak attia cunni kẽẽt cĩ ũũkcĩ kĩĩ kũwaat. 16 Ĩthõng duwak ĩnõõnõ, ennek ne, ‘Makayyioit, Nyekuc cĩ Heburu, itionana aneeta kikiyyia ĩcunni, anyĩk eet cĩganĩk kõõt, kĩĩ katĩ kalayyia nẽẽgẽ aneeta baatha. Ĩthõng thĩ, kĩĩ itin coo nga niia thĩrara aneeta. 17 Thõõth cĩ aduwa Makayyioiti coo, aga katĩ niia ngatĩ keeni na Makayyioit katĩ ngĩ kadĩmani na kaal cĩkkõ, kuuki katĩ na Lĩĩl cĩ Naaĩlĩ kẽẽta ĩcĩ towominto ĩcĩ kagami na attia cannĩ wo, ĩthõng katĩ utuwuyyie maama ĩĩtõ biyyie. 18 Adaaĩ katĩ kulugua cĩk lĩĩlak, ĩthõng katĩ ummu lĩĩlĩ, athii katĩ eeta cĩk Ijibi cĩ awũd maam cĩgĩnĩk.’ ”
19 Uduwak Makayyioiti Mutha ethek ne, “Duwak Aarõn ethek ne, ‘Yak kẽẽt cunni cĩ towominto wo, ĩthõng odongewu athiit cunni maam cĩk Ijibi, duwwua kĩ bũlũca, lilliowẽy, bõwẽnĩy, mõrẽẽtẽy, kĩ vatĩk cĩk ayak maam vẽlẽk,’ ĩthõng ũũkcĩ katĩ nẽẽgẽ kĩĩ biyyie, ĩthõng aatĩ katĩ biyyieta looca ĩcĩ Ijibi vẽlẽk ijjionyay buu.”
20 Ĩdĩmanit balna Mutha kĩ Aarõn kĩ balna mĩ aduwaai Makayyioiti ĩnõõgõ. Õdõng balna Aarõnĩ kẽẽt cĩnnĩ ngatĩ aavẽ alaanĩ cĩ Ijibi kĩ gaala cĩgĩnĩk, ĩthõng ũũvĩ nẽ maam cĩk Lĩĩl cĩ Naaĩlĩ. Ĩthõng balna utuwuyyie maama vẽlẽk ĩĩtõ biyyie. 21 Adaaitõ kulugua lĩĩla ĩcĩtõ, ĩthõng ummuẽcõ maama gimmanoko. Ĩthõng ĩthĩnga eeta cĩk Ijibi cĩ awũdĩ. Ĩbĩtĩt balna biyyieta looc cĩ Ijibi vẽlẽk.
22 Ĩthõng thĩ, ĩdĩmanit ngarẽta cĩk Ijibi buu kĩyokowẽ gẽẽnyĩtha cĩnĩng labak, ĩthõng avarac alaanĩ cĩ Ijibi, athii nẽ cĩ athĩrar Mutha kĩ Aarõn, kĩ balna ngĩ aduwa Makayyioiti. 23 Õkkõ kẽnnẽ nẽ, ĩthõng ũtũwẽ ũũk õlõõ cĩnnĩ, ĩthõng athii cĩ aari thõõth coo thĩnĩna. 24 Ĩthõng adayyia eeta cĩk Ijibi vẽlẽk duwwuẽn titimma kĩĩ kumuddia maam cĩk awũdĩ, nyatarka athii nẽẽgẽ cĩ amũda maam cĩk lĩĩlak cĩk awũdĩ.
25 Edecciay balna iinyia cĩk ẽẽn tũrgẽrẽm wũk balna uuki Makayyioiti Lĩĩl cĩ Naaĩlĩ.