6
Ĩthõng ennek Makayyioiti Mutha ne, “Acini tooko niia nyia katĩ cĩ kadĩmanei na alaan cĩ Ijibi, nyatarka tiirthẽt cobbi cĩ athiit cannĩ, anyi katĩ nẽ ĩnõõgõ kõõt, nyatarka tiirthẽt cobbi cĩ athiit cannĩ, umur katĩ nẽ ĩnõõgõ looca cĩnnĩ umurei ngĩtĩvõrĩ.”2 Ennek naboo Nyekuci Mutha ne, “Keeni na Makayyioit. 3 Kupuanai balna na Abraham kĩ Aĩthak, kĩ Yokob keeni na Makayyioit Nyekuc cĩ Tiiri cĩ Ijiar vẽlẽk, ĩthõng thaarĩy ĩcĩganĩk ĩcĩk Makayyioktak, athii na cĩ kaanyi ẽlẽ cannĩ ĩnõõgõ kagayyia aneeta. 4 Kadakca naboo na kĩ ĩnõõgõ ngẽrẽmngẽrẽm kĩĩ kaanyĩk ĩnõõgõ looc cĩ Kananĩ, nginiwa wũ balna abaaĩ nẽẽgẽ ẽnnẽ kerenniok. 5 Ma naboo, kĩthĩha na tuluwi cĩ eet cĩk Ĩthraĩlĩ, cĩk aari eeta cĩk Ijibi ĩnõõgõ kĩĩ nyakapanak koo, ĩthõng kahada na ngẽrẽmngẽrẽm cĩganĩk.
6 “Ĩthõng thĩna, duwak eet cĩk Ĩthraĩlĩ, ennek ne, ‘Keeni na Makayyioit, ĩthõng kẽyẽhanung katĩ na agiitia nyakapanthẽtĩna eetĩnẽy ĩcĩk Ijibi. Kẽẽlanung katĩ na agiitia pĩrnanta ĩcunung, ĩthõng kĩdĩmanewung jurrung kalaamanung athĩnẽy ĩcĩk tiirthẽt cannĩ. Ĩthõng kuuka na eet cĩk Ijibi tiirthẽta cĩ athĩn cĩganĩk. 7 Keyekcung katĩ na agiitia kĩ eeta cĩganniek kir, ĩthõng keeni katĩ na Nyekuc cunung. Ĩthõng agayyu katĩ niigia ngĩ keeni na Makayyioit Nyekuc cunung, wũ kẽyẽhanung na agiitia ngatĩvõrĩ nyakapanthẽtĩna eetĩnẽy ĩcĩk Ijibi. 8 Ĩthõng kẽyẽhanung katĩ na agiitia looca cĩ balna kũbũtana na dĩdĩ kaanyi Abraham, kĩ Aĩthak kĩ Yokob. Kaanyung katĩ na agiitia looc coo kĩĩ looc cunung. Keeni na Makayyioit.’ ”
9 Uduwak Mutha thõõth coo eet cĩk Ĩthraĩlĩ, ĩthõng thĩ, athii nẽẽgẽ cĩ athĩrar ĩnõõnõ, nyatarka ithii ĩcĩnĩng muwẽẽnĩtĩ cĩ abũnna tõõ kĩ pĩrnanẽt cĩnĩng.
10 Ĩthõng ennek Makayyioiti Mutha ne, 11 “Bĩt, duwak alaan cĩ Ijibi kaanyĩk eet cĩk Ĩthraĩlĩ kõõt ngatĩvõrĩ looca cĩnnĩ.”
12 Ĩthõng thĩ, ennek Mutha Makayyioit ne, “Ma katĩ ngĩ athii eeta cĩk Ĩthraĩlĩ wo cĩ athĩrarya aneeta, nyia koccia thẽk alaanĩ kĩthĩha aneeta wo, ma ngĩ ẽrẽkca thõõth wo?”
13 Ĩthõng uduwak Makayyioiti Mutha kĩ Aarõn thõõth cĩ eet cĩk Ĩthraĩlĩ kĩ alaan cĩ Ijibi, ĩthõng uduwak nẽ ĩnõõgõ kẽyẽkta eet cĩk Ĩthraĩlĩ ngatĩvõrĩ looca cĩ Ijibi.
Teheedinet cĩ tatũk cĩ Mutha kĩ Aarõn
14 Eet cĩk balna ẽẽn tatũk cĩnĩng wo cĩkkõ. Ẽẽn balna Ruubenĩ ngẽrtĩ Ĩthraĩlĩ cĩ ẽẽn abuu. Lõgõõ cĩk Ruubenĩ balna õõ Hẽnõcĩ kĩ Pallui, Hethron kĩ Carmi. Tatũk balna cĩ õõ Ruubenĩ coo.
15 Lõgõõ cĩk balna Thimionĩ õõ Jemueli, Jamin, Ohadi, Jakin, Thoharĩ kĩ Thaul. Ẽẽn balna Thaulĩ ngẽrtĩ ngaa cĩ eet cĩk Kananĩ. Tatũk balna cĩ õõ Thimionĩ coo.
16 Thar cĩk balna lõgõõ cĩk Levi cĩkkõ balna ngĩ eheeddi, Gẽrthõn, Kohath kĩ Merari. Arũgĩ balna Levi erkinya eet tur kĩ etĩmma kõmmõtõ kĩ tũrgẽrẽm (137).
17 Tatũk cĩ lõgõõ cĩk Gẽrthõnĩ, balna õõ Libni, kĩ Thimei.
18 Lõgõõ cĩk Kohathĩ balna õõ, Amrami, Ithhari, Hẽbõrõnĩ kĩ Uthieli. Arũgĩ balna Kohathĩ erkinya eet tur kĩ etĩmma kõmmõtõ kĩ iyyio (133).
19 Lõgõõ cĩk Merari balna õõ, Mali kĩ Muthi, tatũk balna cĩ õõ Levi balna ma ngĩ eheeddi cĩkkõ.
20 Atik balna Amrami ngõõnĩ baatĩnnĩ Jocebed, cĩ balna arittiai ĩnõõnõ lõgõõ cĩk ẽẽn ramma, Aarõn kĩ Mutha. Arũgĩ balna Amrami erkinya eet tur kĩ etĩmma kõmmõtõ kĩ tũrgẽrẽm (137).
21 Lõgõõ cĩk Ithhari balna õõ, Kõõra kĩ Nẽvẽk kĩ Thikri.
22 Lõgõõ cĩk Uthieli balna õõ, Mithheli, Elthavanĩ kĩ Thithri. 23 Atik Aarõnĩ Elitheba, doo cĩ Amminadabĩ cĩ ẽẽn ngõõnĩ Nathõnĩ, ĩthõng itiriak Elitheba ĩnõõnõ dõõlĩ wec Nadab kĩ Abiwu, Elithar kĩ Ithamar.
24 Lõgõõ cĩk Kõõra balna õõ, Athĩrĩ, Elkana kĩ Abiathapi. Ẽẽn balna eeta cĩkkõ eet cĩk tatũk cĩ Kõõra. 25 Atik balna Elithari ngẽrtĩ Aarõnĩ, doo ĩmma buweecinẽy ĩcĩk Puteli, ĩthõng itiriak ĩnõõnõ Vinehath.
Tatũgẽt balna cĩk õõ Levi cĩkkõ, dodoyyie.
26 Aduwaai balna Makayyioiti Aarõn kĩ Mutha ethei ne, “Ayakta thẽk eet cĩk Ĩthraĩlĩ looca ĩcĩ Ijibi ngatĩvõrĩ tatũgẽtẽy dodoyyie, õgõõn kĩ nyĩcẽkẽrĩ cĩk idiimitõ ngĩ uuktõy.” 27 Ĩnõõgõ balna cĩk õthõõthõy kĩ alaan cĩ Ijibi, thõõth cĩ ayahanĩ nẽẽgẽ eet cĩk Ĩthraĩlĩ ngatĩvõrĩ.
Õthõõth Aarõnĩ thõõth cĩ Mutha
28 Ĩthõng ma balna mĩ õthõõthõy Makayyioiti kĩ Mutha Ijiba, 29 Uduwak nẽ ĩnõõnõ ennek ne, “Keeni na Makayyioit. Duwak alaan cĩ Ijibi thõõth vẽlẽk cĩ kaduwaci na aniitia.”
30 Ĩthõng thĩ, ennek Mutha Makayyioit ne, “Ẽrẽkca aneeta thõõth cĩ kothoothi, athĩrarya koccia aneeta alaanĩ?”