Mutha kĩ bõõnõ cĩ atũũthĩ
3
Ũũwa balna Mutha ẽẽtha cĩk baatĩnnĩ cĩ atihẽnĩ nẽnẽ, cĩ athĩ thar Jethũrũ, paadĩr cĩ Midianĩ, ĩthõng õkõyyĩ Mutha ẽẽtha many tõõna ĩcĩ baathu, kĩĩ kikiyyia Horeba thiira ĩcĩ Nyekuco. 2 Ilibak ĩnõõnõ anjĩlõ cĩ Makayyiokto natẽ guyyia cĩ alanyĩt bõõnatõ ĩmmanĩ ĩcĩtõ. Acĩn Mutha atũũthĩ bõõnõ, ĩthõng mĩ atũũthĩ ẽẽ, athii cĩ atũũthĩ bõõnõ buu. 3 Umuk Mutha ĩĩ ne, “Kõkkõ na, ĩthõng kĩcĩna nginicẽ nyia bõõnõ athii cĩ atũũthĩ wo.” 4 Ma balna mĩ acĩn Makayyioitia mĩ õkkõ Mutha acĩn guo wo, ũtũvvũ Nyekuci ĩnõõnõ bõõnatõ ĩcĩtõ, “Mutha! Mutha!”
Ĩthĩ Mutha ne, “Aneeta coo.”
5 Aduwaai Nyekuci ĩnõõnõ ennei ne, “Nyĩ akuni joonui noko, ara caava cugunik, ẽẽn ngĩtĩ abĩlnẽ niia wo, ngĩtĩ angiranni. 6 Keeni na Nyekuc cĩ õõ baaba, Nyekuc cĩ Abrahamĩ, Nyekuc cĩ Aĩthaĩ kĩ Nyekuc cĩ Yokobĩ.” Ĩthõng uluguny Mutha nguum cĩnnĩ, nyatarka ongollie balna nẽ ngatĩ acĩnĩ Nyekuc.
7 Ĩĩ Makayyioiti ne, “Kĩcĩna balna na kir pĩrnanẽt cĩ eet cĩganĩk Ijiba. Kĩthĩha na ĩnõõgõ mĩ alu, nyatarka makayyiok cĩk nyakapanawu cĩk adĩman ĩnõõgõ buth, ĩthõng kahada na pĩrnanẽt cĩnĩng. 8 Kakuni na kẽẽla ĩnõõgõ athĩnẽy ĩcĩk eet cĩk Ijibi, ĩthõng kẽyẽha ĩnõõgõ looca ĩcĩ arik irana kĩ lotec. Looc cĩ eet cĩk Kananĩ, Hiiti, Amõrĩ, Perithiti, Hiviti kĩ Jebu. 9 Õdõlana aneeta yoko tuluwi cĩ eet cĩk Ĩthraĩlĩ, ĩthõng kĩcĩna na gõõl cĩ ĩtdanyĩ eeta cĩk Ijibi ĩnõõgõ. 10 Bĩt thĩ yoko, kitionni na aniitia bĩt ĩcĩ alaano bĩt yaha eet cĩganĩk cĩk Ĩthraĩlĩ ngatĩvõrĩ Ijiba.”
11 Uduwak Mutha Nyekuc ethek ne, “Aneeta thẽk ngẽnẽ, kũũk na alaana, ĩthõng kẽyẽha eet cĩk Ĩthraĩlĩ ngatĩvõrĩ Ijiba?”
12 Ĩthõng ĩthĩ Nyekuci ne, “Karũmẽ katĩ na kĩ aniitia. Thõõth katĩ cĩ eyeliay coo cĩ katĩ aku kĩ aniitia, cĩ athĩ ne, aneeta cĩ kitionani aniitia. Ma ngĩ ayaha niia eet ngatĩvõrĩ Ijiba, alayyu katĩ niigia Nyekuc thiira ĩcoo.”
13 Uduwak Mutha Nyekuc, “Ma ngĩ kũwa na ĩcĩ eet cĩk Ĩthraĩlĩ, ĩthõng kennea ĩnõõgõ ne, ‘Itionana Nyekuci cĩ õõ baaba aneeta kikiyyia,’ ĩthõng ma ngĩ ijinta nẽẽgẽ aneeta a ne, ‘Athĩ thar cĩgĩnĩk ngẽnẽ?’ Ĩthõng kaduwai koccia na ĩnõõgõ kennei ne?”
14 Uduwak Nyekuci Mutha ethek ne, “ANEETA CĨ KEENI ANEETA. Thõõth katĩ cĩ õkkõ aduwaai niia eet cĩk ẽẽn Ĩthraĩl coo, ANEETA cĩ itionana nẽ aneeta kikiyyia ĩcunung wo.”
15 Ĩthõng uduwak naboo Nyekuci Mutha, ennek ne, “Duwak eet cĩk Ĩthraĩlĩ, ennek ne, ‘Makayyioit Nyekuc wunung cĩ baajigu cuguk, Nyekuc cĩ Abrahamĩ, Nyekuc cĩ Aĩthaĩ kĩ Nyekuc cĩ Yokobĩ cĩ itionana aneeta ĩcunung.’ Thar cĩganĩk cĩkkõ kũdũt,b thar cĩk ahadaniangũ koccia aneeta eetĩnẽy ĩcĩk katĩ ngaanĩ arittiay.
16 “Bĩt lũta eet cĩk obbitik cĩk Ĩthraĩlĩ, ĩthõng ennewu ĩnõõgõ ne, ‘Makayyioit Nyekuc cĩ baajigu cuguk, Nyekuc cĩ Abrahamĩ, Aĩthaĩ, kĩ Yokobĩ, ilibaha aneeta, ĩthõng enneha ne, Kĩcĩna na thõõth cĩ adĩmanung eeta agiitia buth Ijiba. 17 Ĩthõng kũbũtana balna na ngatĩ kẽyẽhanung agiitia pĩrnanta ngatĩvõrĩ looca ĩcĩ Ijibi looca ĩcĩ eet cĩk Kananĩ, Hiiti, Amõrĩ, Perithiti, Hiviti, kĩ Jebu, looc cĩ arik irana kĩ lotec.’
18 “Athikni katĩ eeta cĩk obbitik cĩk Ĩthraĩlĩ aniitia. Ĩthõng uuwu niia irioktu kĩ eet cĩk obbitik oottu alaana ĩcĩ Ijibi, ĩthõng uduktiawu ĩnõõnõ entewu ne, ‘Nyekuc cĩ õõ Heburu, kurumtowa kĩ ageeta. Anyet niia ageet koottia iinyia iyyio baatha kotodongteha kaal cĩk cavawu Makayyioit Nyekuc cĩnang.’ 19 Ĩthõng thĩ, kagga na thẽk athii katĩ alaanĩ cĩ Ijibi cĩ anyung agiitia õõtõ mĩ kothii gimma cĩ tiiri cĩ omogeei ĩnõõnõ. 20 Kodongi katĩ na athiit cannĩ, ĩthõng kĩĩ kuuk na eet cĩk Ijibi thoothiowẽy ĩcĩk anaat eeta ĩcĩk katĩ kadĩmani na kõrgẽna ĩcĩnĩng. Ĩthõng katĩ anyung agiitia alaanĩ õõtõ.
21 “Ĩthõng kaanyi katĩ na eet cĩk Ijibi kotongollie eet cĩk Ĩthraĩlĩ, kĩĩ katĩ ma ngĩ ovvoyyu niigia athii cĩ ovvoyyu athĩnẽy kollin. 22 Ajin woccia ngaay vẽlẽk et cĩ abakanõy, kõdẽ ngaa cĩ arũmẽ kĩ ĩnõõnõ ciitha kijin kaal cĩk adĩmaniay thĩĩhĩy ĩcĩk athĩ kathalkathalc kĩ daab kĩ ceremua cĩk katĩ ahimit doolia cuguk. Ĩthõng thĩ, katĩ eyektu niigia kaal cĩkkõ vẽlẽk eetĩnẽy ĩcĩk Ijibi.”