Tuwuanẽt cĩ Mutha
2
Itik balna eeti ĩmma cĩ tatũk cĩ Levi ngaa cĩ et cĩ ẽẽn vurut codoi. 2 Ĩthõng ikiyyia ngaa anyaawõy ngaatĩ ũũkcanẽ doolec cĩ maacĩ. Ma balna mĩ acĩn nẽ logoo coo ngĩ abũnna, uluguny nẽ ĩnõõnõ nyĩĩlõwẽ iyyio. 3 Ĩthõng ĩnĩnga balna nẽ aluguny ĩnõõnõ naboo, ĩdĩma nẽ locibiro cĩ ẽẽn yiavac, ĩthõng idileek doolian, kĩĩ katĩ athii maama cĩ iithio. Ĩthõng arĩk nẽ doolec ĩcĩtõ, ĩthõng ngaatĩ aarĩcẽ nẽ locibiro galalay tõõna ĩcĩ Lĩĩl cĩ Naaĩlĩ. 4 Abĩlĩ balna ngoonia rẽẽna kĩĩ kĩcĩn nyia woccia cĩ õgõõn gõtõnĩ cĩnnĩ wo.5 Ũũk bũwẽnyĩ alaano õkkõ aranni lĩĩla, õwõ balna goonogua joonui lĩĩla cĩk ẽbẽk ĩnõõnõ. Ition nẽ doo cĩ ẽẽn nyakapanait cĩnnĩ kũũk kẽyẽha locibiro cĩ acĩn nẽ ẽẽ. 6 Ubuk nẽ locibiro, ĩthõng ĩcĩn doolec. Utulu balna nẽ, ĩthõng atamatĩk nẽ ĩnõõnõ. Ĩthĩ nẽ ne, “Ẽẽn doolec coo cĩ eet cĩk Heburu.”
7 Ĩthõng ijin balna ngoonia cĩnnẽ bũwẽnyĩ alaano, “Kõkkõ koccia na kẽyẽha ngaa cĩ ẽẽn Heburu kikiyyia kitilingaai doolec coo aniitia?”
8 Atajan nẽ, ĩthĩ ne, “Ii bĩtõ.” Ĩthõng ũũk ayaha ngoonia yaatĩ dooleco. 9 Ma natẽ ikiyyia uduwak bũwẽnyĩ alaano ngaa coo ennek ne, “Bĩtĩ logoo coo tilingaha aneeta, ĩthõng kadũmanni katĩ na aniitia.” Ĩthõng thĩ, ikiyyia ũũwĩ ngaa doolec, ĩthõng itilinga. 10 Ma balna ngĩ ĩtĩlĩtha doolec ĩthĩ maka, ũũwĩ yaatĩnnẽ doolec ĩcĩ bũwẽnyĩ alaano, ĩthõng ĩthĩ nẽ logoo cĩnnĩ. Akatek bũwẽnyĩ alaano ĩnõõnõ thar cĩk athĩ Muthaa a ne, “Kacalũwa na ĩnõõnõ maamĩy.”
Ivir Mutha ũũk looca cĩ Midianĩ
11 Ma balna ngĩ ĩtĩlĩtha Mutha ĩthĩ maka, ũũk balna nẽ ĩcĩn eet cĩgĩnĩk tiica ĩcĩ ẽnnẽ nyakapanak, acĩn nẽ et cĩ Ijibi ngĩ uuk et cĩ ẽẽn Heburenit. 12 Amuudi balna Mutha, ĩthõng acĩn kothii et ĩmma, ĩthõng kĩĩ kuruk nẽ et cĩ Ijibi, ĩthõng uluguny nẽ et cĩ aruk ẽẽ, kathacĩnta. 13 Ma baa vurtia cĩ kõr nĩcẽ ũũk ĩcĩn nẽ eet cĩk ẽẽn ramma cĩk Heburu ngĩ uukõy, ennek nẽ et cĩ ayak kirirẽn ẽẽ, ne, “Uuki niia goonu cĩ ẽẽn Heburenit nyia?”
14 Atajan eeti ĩthĩ ne, “Ngẽnẽ cĩ aarici aniitia ĩthĩ gaalinit cĩnang? Adiimi niia ngĩ arukca aneeta kĩ balna ngĩ arui Ijibenit?” Ĩthõng õtõngõlẽ Mutha, ĩthõng umuk ĩĩ ne, “Gii wũ balna kadĩmani na agawẽ.”
15 Ma balna ngĩ athĩhĩ alaanĩ thõõth coo wo, idiim uruk nẽ Mutha, ĩthõng ivir nẽ ĩcĩ alaano, ĩthõng ũũk abaak looca ĩcĩ Midianĩ, ngatĩ aavẽ balna nẽ loota duwwua cĩ adawuay. 16 Ayak balna paadĩrĩ cĩ Midianĩ dõõlĩ cĩk ngayyik tũrgẽrẽm, ĩthõng avvu balna nẽẽgẽ atĩla maam duwwua, ĩthõng aryik ijjionya kĩbbĩtĩt kĩĩ keellik ẽẽtha cĩgĩk maam kovowola. 17 Ivitia tũwayyiowa gwuak, ĩthõng umurit ĩnõõgõ kõõt nĩĩcẽ, ĩthõng ĩtĩnga Mutha, ĩthõng ikiyyia ẽẽla ĩnõõgõ, ĩthõng kĩĩ kẽẽlĩhĩ kaal maam.
18 Ma balna ngĩ oboddia doolia cĩk Reuli, ijin nẽ ĩnõõgõ ennek ne, “Nyia te oboddia kõr coo niigia nga waathĩn wo?”
19 Atajanit nẽẽgẽ athĩ ne, “Ẽẽlaneet eeti cĩ Ijibi ageeta tũwayyiowĩy. Atĩlacet ageeta maam, ĩthõng elihiet naboo kaal maam.”
20 Ijin nẽ dõõlĩ cĩgĩnĩk koo, ennek ne, “Aavĩ yoko thĩ nẽ nga? Uungniccu thĩtẽ niigia ĩnõõnõ nyia? Utuvvuyyia ĩnõõnõ kikiyyia kadak gimma.”
21 Ẽlẽm balna Mutha ngatĩ arũmẽẽnĩ kĩ Reul, wũ balna anyi nẽ ĩnõõnõ bũwanyĩnĩ cĩnnĩ Thipporaa kitik. 22 Itirria Thipporaa doolec, ĩthõng akatek Mutha thar cĩk athĩ ne, Gẽrthõm, thara cĩk athĩ Gẽrthõm wo a ne, “Kĩĩthĩ na et cĩ rẽẽng looca ĩcĩ rẽẽng.”
23 Ma balna vurtia ĩcĩ rẽẽnĩ ikiyyia adaak alaanĩ cĩ Ijibi. Õngõngõcõ eeta cĩk Ĩthraĩlĩ nyakapanthẽtĩna ĩcĩnĩng, nyatarka pĩrnanẽt cĩnĩng ũũk thĩ tuluwi cĩnĩng õdõlan Nyekuc. 24 Ĩthĩk Nyekuci tuluwi cĩnĩng, ĩthõng ahada ngẽrẽmngẽrẽm cĩnnĩ kĩ Abraham, Aĩthak kĩ Yokob. 25 Ma balna ĩcĩn Nyekuci eet cĩk Ĩthraĩlĩ, ĩthõng ĩrĩcana ĩnõõgõ.