Nyaraga cĩ
Lugitho
Ĩtdanycẽ eeta cĩk Ĩthraĩlĩ Ijiba
1
Õkkõ balna Yokobĩa cĩ athĩ thar õõgĩ Ĩthraĩl, looca cĩ Ijibi iriok nẽ kĩ lõgõõ cĩgĩnĩk vẽlẽk. Ĩthõng lõgõõ cĩgĩnnẽk buu iriok kĩ dõõlĩ cĩgĩk kĩ ngaay. Athĩ thar cĩgĩk, 2 Ruuben, Thimion, Levi, Yudaa, 3 Ithacar, Thebulun, Benyamin, 4 Daan, Navtali, Gad, kĩ Athẽr. 5 Aku meelitini cĩ eet cĩkkõ aku kir ĩcĩ tatũk cĩ Yokobĩ ẽẽn balna nẽẽgẽ vẽlẽk eet iyyio kõmmõtõ. Aavu balna ngẽrĩnẽ cĩnnẽ ĩmma Yothẽbõ looca ĩcĩ Ijibi.b6 Ma balna ngĩ adaaitõ Yothẽbõ kĩ gõtõõnõgĩ cĩgĩnĩk vẽlẽk, 7 ma balna ayait eeta cĩk Ĩthraĩlĩ dõõlĩ cĩk meelĩk, ĩthõng ĩbĩtĩt nẽẽgẽ looc.
8 Ma balna vurtia cĩ erkinya cĩk meelĩk, ikiyyia balna alaanĩ cĩ nganĩ jõr Ijiba cĩ athii cĩ agawĩ Yothẽbõ. 9 Ennek nẽ eet cĩgĩnĩk ne, “Ĩcĩnĩt ĩĩtõ mẽẽlĩ eeta cĩk Ĩthraĩlĩ ĩcĩnac õrrõt. 10 Ivitia niigia, adiim naaga kadĩman ĩnõõgõ buth, kõdẽ ngĩ avvu nẽẽgẽ, ĩthõng ĩĩtõ mẽẽlĩ, ĩthõng ma ngĩ ĩtĩnga jore, arũmẽ koccia nẽẽgẽ kĩ mĩrõk cĩgaac, ĩthõng kuuktõy kĩ ageeta, ĩthõng ũtũngtek looc cĩnac.”
11 Ĩthõng aanycĩk nẽẽgẽ gaala cĩk nyakapanawu kagamit eet cĩk Ĩthraĩlĩ kĩtdanyitõ komoktek ĩnõõgõ tiic, ketengenyit korookjiok cĩk gaalawu cĩk Pithomĩ kĩ Ramẽthẽthĩ kĩĩ kiitiangit ijjio cĩk alaan cĩ Ijibi.c 12 Ĩthõng balna ma ngĩ ĩtdany eeta cĩk Ijibi ĩnõõgõ õrrõt, avvu kẽnnẽ eeta cĩk Ĩthraĩlĩ mẽẽlĩ õrrõt, ĩthõng balna otongollie eeta cĩk Ijibi ĩnõõgõ, 13 ĩthõng aanycĩk nẽẽgẽ ĩnõõgõ kiticantõy õrrõt buth. 14 Ẽhẽcĩ nẽẽgẽ ĩnõõgõ kiticantõy õrrõt kĩdĩmanta namatavalĩnya, ĩthõng aryik tõdõwac kõdõwẽ kagamtõĩ kĩ namatavalĩnya kĩ tiiciok vẽlẽk cĩk evvintiak, tiica cĩnĩng vẽlẽk ĩcĩ õkõmĩ adĩman eeta cĩk Ijibi eet cĩk Ĩthraĩlĩ buth.
15 Uduwak alaanĩ cĩ Ijibi ngaay cĩk ũũkca ngaay cĩk ẽẽn Heburu,d cĩk balna athĩ thar cĩgĩk, Thivraa kĩ Pua. 16 Ethei ne, “Ma ngĩ ellu niigia ngaay cĩk ẽẽn Heburu katĩ ngĩ ũũkca dõõlĩ cĩk ngayyik anycĩk kũrũgĩt, ma ngĩ ẽẽn doolec cĩ maacĩ ruk ĩnõõnõ.” 17 Ongollie balna ngaay cĩk ũũkca ngaay Nyekuc, ĩthõng ĩnĩnga adĩman thõõth cĩ aduwaai alaanĩ ĩnõõgõ balna kĩdĩmanit, anycĩk nẽẽgẽ dõõlĩ cĩk maacĩk kũrũgĩt. 18 Ũtũvvũwa thĩna alaanĩ cĩ Ijibi ngaay cĩk ũũkca ngaay, ĩthõng ijin ĩnõõgõ ennek ne, “Adĩmannu niigia thõõth coo nyia? Anyiccu niigia dõõlĩ cĩk maacĩk kũrũgĩt nyia?”
19 Atajanit ngaay cĩkkõ alaan ethei ne, “Athii ngaay cĩk Heburu cĩ õgõõn kĩ ngaay cĩk Ijibi, uukciay nẽẽgẽ tamanoko nga kivitiaha naaga keelliaha ĩnõõgõ.”
20 Ĩdĩman thĩna Nyekuci ngaay cĩk ũũkca ngaay wo jurrung, ĩthõng ĩtooryie eeta, ĩthõng ĩĩtõ mẽẽlĩ õrrõt. 21 Nyatarka balna ongollie ngaay cĩk ũũkca ngaay Nyekuc, aanyĩk thĩ nẽ ĩnõõgõ dõõlĩ cĩgĩk.
22 Ennek alaanĩ eet cĩgĩnĩk vẽlẽk ne, “Utdukteek dõõlĩ cĩk maacĩk Lĩĩla ĩcĩ athĩ thar Naaĩl,e ĩthõng anyciwu dõõlĩ cĩk ngayyik kũrũgĩt.”