Yelintiok cĩk Mutha
4
Atajan Mutha, “Ma katĩ mĩ athii cĩ athĩkna aneeta eeta cĩk Ĩthraĩlĩ, ĩthõng athii cĩ ẽlẽmnya aneeta? Ma katĩ mĩ ĩĩtõ nẽẽgẽ ne, ‘Nga Makayyioiti kupuanai aniitia’?”2 Ĩthõng ennek Makayyioiti ĩnõõnõ ne, “Nyia nĩcĩ ayai niia attia cunni wo?” Ẽdẽcĩ nẽ a ne, “Kẽẽt cĩ towominto.”
3 Ennek Makayyioiti ne, “Tdukek ĩnõõnõ loota.” Ĩthõng utdukeek Mutha kẽẽt loota, ĩthõng ũtũwẽ ĩthĩ kũwaat, ĩthõng ivir nẽ ĩcĩ kũwaato.
4 Ĩthõng ennek Makayyioiti ĩnõõnõ ne, “Gam kuul cĩ kũwaato attia cunni, ĩthõng ĩdĩma.” Agam thĩ Mutha kuula, ĩthõng ũtũwẽ ĩthĩ kẽẽt cĩ towominto naboo. 5 Uduwa Makayyioiti ĩĩ ne, “Dĩman thõõth coo, kĩĩ katĩ kelemit nẽẽgẽ kĩĩtõ ne, Makayyioit Nyekuc cĩ õõ baajigi cĩgĩk, Nyekuc cĩ õõ, Abrahamĩ, Nyekuc cĩ õõ Aĩthaĩ, kĩ Nyekuc cĩ õõ Yokobĩ, ilibai balna aniitia.”
6 Ĩthõng ĩthĩ Makayyioiti ne, “Arĩk athiit cunni cẽrẽma ĩcĩtõ.” Ĩthõng arĩk thĩ Mutha athiit cĩnnĩ cẽrẽma ĩcĩtõ, ĩthõng ma balna mĩ avũũca athiit wo, ĩthĩ athiiti cĩnnẽ nyataba ĩthĩ võõr pẽr utugu kĩ diitha.
7 Ennek nẽ ne, “Bõdẽẽĩ thĩ yoko athiit cunni naboo cẽrẽma.” Ĩthõng õbõdẽẽĩ thĩ Mutha athiit cẽrẽma naboo, ĩthõng ma balna ma ngĩ ara ngatĩvõrĩ wo, ũbũna balna athiiti cĩnnẽ uduktõy kĩ ẽlẽ cĩnnĩ vẽlẽk.
8 Ĩthõng ĩthĩ Makayyioiti ne, “Mĩ athii nẽẽgẽ cĩ elemnyi aniitia, kõdẽ athii cĩ athĩhĩ jurrung tiic cĩ owu cĩ anaat eeta cĩ adĩmani niia, ẽlẽmĩ katĩ nẽẽgẽ cĩ ẽẽn ramma. 9 Ĩthõng mĩ athii nẽẽgẽ cĩ ẽlẽmĩ thoothonniok cĩk eyeliay cĩk ẽẽn ramma, ĩthõng mĩ athii nẽẽgẽ cĩ athikni aniitia, tĩĩla maam õõgĩ Lĩĩla ĩcĩ Naaĩlĩ, ĩthõng utduutiwu loota ngatĩ õdõõĩ. Maama cĩk atĩla niia lĩĩla wo, ũũkcĩ katĩ ẽẽn biyyie loota.”
10 Ennek Mutha Makayyioit ne, “Makayyioit, athii na cĩ kothoothi jurrung, kõdẽ balna mĩ othoothĩca niia ticciannioit cunni. Keeni na et cĩ kothoothi kĩdĩĩc.”
11 Ennek Makayyioiti ĩnõõnõ ne, “Anyi ngẽnẽ et kũtũk cĩnnĩ? Ngẽnẽ cĩ anyi ĩnõõnõ kidiitie kĩĩna, kõdẽ athii cĩ õthõõthĩ? Anyi ngẽnẽ ĩnõõnõ kĩcĩnẽ, kõdẽ cĩ anyi kĩĩ ruben? Athii cĩ ẽẽn aneeta, Makayyioit? 12 Bĩt yoko, keelli katĩ na aniitia thõõthũ, ĩthõng katĩ kalimaneci na aniitia thõõth cĩ aduwa.”
13 Ĩthĩ Mutha ne, “Ii Makayyioit, tion baai et ĩmma mĩn kũũk kĩdĩman thõõth coo.”
14 Ĩthõng avaracĩk Makayyioiti Mutha, ĩthõng ennek ne, “Ma koccia gotonu wunnie, Aarõnĩ wũ ẽẽn tatũk cĩ Levi? Kagga na õthõõth nẽ jurrung. Aavu nẽ gõõla vẽlẽk arumonu katĩ kĩ aniitia, atalĩ katĩ nẽ, thĩnĩna cĩnnĩ mĩ icini nẽ aniitia. 15 Othoothi katĩna niia, ĩthõng arĩhẽ ĩnõõnõ thõõth kũtũga ĩcĩnnĩ, keelung katĩ na agiitia rammatuguan, ĩthõng kilimanung agiitia gii cĩ adĩmannu. 16 Othoothi katĩ nẽ eet thõõtha cunni, ĩthõng õgõõn katĩ kĩcĩ a niia ne, kũtũk cunni cĩ õthõõthĩ, ĩthõng õgõõn kĩcĩ a niia ne, aniitia cĩ aduwonu kĩ Nyekuc ĩcĩnnĩ. 17 Ĩthõng yak kẽẽt coo attia cunni, kĩĩ katĩ dĩman niia tiiciok cĩk anaat eeta.”
Imiirie Mutha ũũk looca ĩcĩ Ijibi
18 Ĩthõng ũũk Mutha ĩcĩ Jethũrũ baatĩnnĩ cĩ atihẽnĩ, ĩthõng ennek ĩnõõnõ ne, “Anya aneeta kimiiri kũũk eetĩnẽy ĩcĩganĩk looca ĩcĩ Ijibi, kĩcĩn ma nga arũgĩ gwuak.” Ĩthĩ Jethũrũ ne, “Bĩtõ, ĩthõng bĩt niia jurrung.”
19 Uduwak Makayyioiti Mutha looca ĩcĩ Midianĩ, ennek ne, “Bĩt miirie bĩt looca ĩcĩ Ijibi, adaaitõ eeta wũk balna adiim arukci aniitia vẽlẽk.” 20 Ĩthõng ũũwĩ Mutha ngaa cĩnnĩ kĩ dõõlĩ, ĩthõng, arĩk ĩnõõgõ thigirieca tiddina, ĩthõng õõt ĩcĩ looc cĩ Ijibi, ĩthõng ayak nẽ kẽẽt cĩ Nyekuco attia cĩnnĩ.
21 Uduwak Makayyioiti Mutha thõõth, ennek ne, “Ma ngĩ imiirie niia uuwu looca ĩcĩ Ijibi, ticanek niia alaan kaal vẽlẽk wũk anaat eeta tiirthẽta cĩ kaanyi na aniitia dĩmanũ. Ĩthõng kaanyi katĩ na alaan kĩĩ gẽrtha kujuraaĩ eet athii cĩ anyi ĩnõõgõ kõõt. 22 Ĩthõng duwak alaan ethek ne, ‘Thõõth cĩ aduwa Makayyioiti coo, a ne, ẽẽn Ĩthraĩlĩ ngẽrnanĩ cĩ ẽẽn abuu. 23 Ĩthõng kuduwai balna na aniitia, “Anyĩk ngẽrnanĩ kũũk, kĩĩ katĩ kalawa nẽ aneeta.” Ĩthõng thĩ, balna utuburu niia ma ngĩ anyi ĩnõõnõ kũũk, ĩthõng thĩ, katĩ karui na ngeruni cĩ ẽẽn abuu.’ ”
24 Nginiwa ĩcĩ balna õõngẽ nẽ ẽẽ, urumtõy balna Makayyioiti kĩ Mutha gõõla, ĩthõng idiim ngĩ aruk ĩnõõnõ. 25 Ĩthõng thĩ, ĩdĩma Thipporaa kabath cĩ lẽhẽdĩ õrrõt kĩĩ kẽtẽd ẽlẽ cĩ ngẽrĩnĩ cĩnnĩ,a kĩĩ kuwumek ruccenit thoo cĩk Mutha. Ĩthõng kĩĩ kennek ne, “Eeni niia nyẽtẽranit cĩ biyyietu dĩdĩ.” 26 Ĩthõng ũtũngek Makayyioiti ĩnõõnõ mĩn. Ma thĩ kõr nĩcẽ ĩthĩ nẽ ne, “Nyẽtẽranit cĩ biyyietu.” Athĩ thõõth coo ne, teedinet cĩ elo.
27 Uduwak Makayyioiti Aarõn ennek ne, “Bĩt baatha õõt urumtõy kĩ Mutha” Ĩthõng urumtõy nẽ kĩ Mutha thiira cĩ Nyekuco, ĩthõng ĩthayyiõy õrrõt kĩĩ kucuccuyyiõy. 28 Ĩthõng uduwak Mutha Aarõn thõõth vẽlẽk cĩ aduwaai Makayyioiti ĩnõõnõ kuduwa, ĩthõng kĩ thoothonniok cĩk anaat eeta wũk aduwaai Nyekuci ĩnõõnõ kĩdĩman.
29 Ayakta Mutha kĩ Aarõn eet cĩk obbitik vẽlẽk cĩk Ĩthraĩlĩ ngatĩ odoi. 30 Ĩthõng uduwak Aarõnĩ ĩnõõgõ thõõth vẽlẽk cĩ aduwaai Makayyioiti Mutha, ĩthõng naboo ĩdĩman thoothonniok cĩk anatti eetĩnẽy, 31 ĩthõng elemit nẽẽgẽ. Ĩthõng ma balna mĩ athĩrar nẽẽgẽ a ne, ẽẽl Makayyioiti ĩnõõgõ, ĩthõng ĩthĩk nẽ pĩrnanẽt cĩnĩng, akatit nẽẽgẽ kuthungti, ĩthõng ulullie alayyiõy.