4
1 Nɛrɛɛkɛ mɩ-n nanɩ, na-n pɛ tɩbɩla fɛʋʋda haara', sɩ na-n jʋrɛ wɩ na hɩnɛ ado Thãgbaa Thu n thɔɔ wɩ, gɩdonɩ sõso bobona jɔɔ ɩɩrɛ a lõ thɩɩra.
2 Gɩrɛ na jɩrɔnɩ dɩ Thãgbaa Thu gɩ: Tibil wo tibilikɛ n tuonni dɩ tomɩr Jeju Kirisiti kɔɔ hana a ɩnɩ, Thãgbaa Thu ntɛɛle hana.
3 Sɩ tibil wo tibilikɛ na-n tuonni Jeju thala', ga do Thãgbaa Thu ntɛɛle hana ga, gɛr dʋɔn Kirisitii vardaarɩdara nɩ kɔɔ nɩɛnɩ ga ɩ̃, kɛ 'lenɩ hakɛrakɛ gɩrɛ thɩɩra.
4 Bɩsã bii, nɛrɛ, Thãgbaada nɩ do, dɩ nɩ puno wer, gɩdonɩ ʋrɛɛkɛ hanɩ anɩ bɩnɔ a kɔ̃tɩnɛ a jɔ ʋrɛɛkɛ hanɩ thɩdarara.
5 Wɛr, thɩɩda wɩ do, gɛr gɩ dɩ wa-n mɩɩ gɩrɛ thɩdara n mɩɩnɩ, dɩ thɩdara n pɛ wɛr nũu.
6 Sɩ sɛrɛ, Thãgbaada sɩ do. Ʋrɛɛkɛ jɩɛnnɩ jɩ Thãgba a-n pɛ sɛr nũu, sɩ ʋrɛɛkɛ na dɔnɩ Thãgbaada ga, aa-n pɛ sɩ nũə'; liir sɩ-n jɩna sobɔ thue na fɩfɩɩl thue.
7 Nɛrɛɛkɛ mɩ-n nanɩ, sa-n na kha fɛʋ bɩɛlbɩɛl, gɩdonɩ naʋ Thãgbara gɩ the, dɩ tibil wo tibilikɛ hananɩ naʋ, Thãgba kɔnaa dɩ jɩ Thãgba.
8 Ʋrɛɛkɛ na hananɩ naʋa', aa jɩ Thãgba ga, gɩdonɩ Thãgba dʋɔn naʋ.
9 Gɩrɛ n nɛnanɩ naʋʋkɛ Thãgba na sɩnɩ dʋɔn mɔ̃ a kɔɔ thɔnɩ ɔɔ Bikũu bɩɛl 'lẽ'lẽ'lẽ thɩɩra, dɩ mɛ̃ sa 'lɩɛraa yire.
10 Dɩ hɩnɛ mɔ̃ naʋra hanɩ, gɛr dʋɔn ga do sɛr kɔɔ naan Thãgba ga, sɩ ɔr gɩɩkɛ kɔɔ naan sɩnɩ a thɔ̃ ɔɔ Bikuun dɩ do sar bonɩ jirikɛ hɛlanɩ asɩ sopugo.
11 Nɛrɛɛkɛ mɩ-n nanɩ, ado Thãgba kɔɔ na sɛr thale, gɩ teenanɛ sɛrɛ dakha sa-n na kha fɛʋ bɩɛlbɩɛl.
12 Tibil na kɔɔ yɩ Thãgba yuuraka', sɩ ado sɩ-n nar kha fɛʋ bɩɛlbɩɛl Thãgba har asɩ bɩnɔ, dɩ ɔɔ naʋ daan waa vʋ̃ʋ sɛrɛra.
13 Gɩrɛ sɩ jɩnanɩ dɩ sɩ tooraarɛ dɩ ɔr ha sɛrɛra dʋɔn gɩ ther gɩrɛraakɛ a kɔɔ ha sɩnɩ ɔɔ Thu.
14 Dɩ sɛrɛ, sɩ yɩrɛ mɔ̃kɛ Thɩrɛ kɔɔ thɔnɩ ɔɔ Bikuun dɩ do tɩbɩla fɛʋ thɩɩraa Taadaar, dɩ gɛr sɩ-n mɩɩrɔ sobɔ so jɩɩr.
15 Ʋrɛɛkɛ na tuonni nayɩ Jeju dʋɔn Thãgbaa Bikuun, Thãgba haaraarɛ, dɩ ɔr dakha too Thãgbara.
16 Dɩ sɛrɛ, sɩ jɩrɛ naʋʋkɛ Thãgba hana sarnɩ dɩ sɩ pɛ gɛr haar. Thãgba dʋɔn naʋ, dɩ ʋrɛɛkɛ tɔɔnɩ naʋra a toore Thãgbara, dɩ Thãgba haaraa.
17 Mɔ̃ a hanɩ mɛ̃ sɩ ha ser thɩɩraakɛ, gelela dɔ nɔɔ dɩ naʋ dã waa vʋ̃ʋ asɩ bɩnɔ, dɩ mɛ̃ sa hana tu jɩɩr kɩɩl wire.
18 Naʋ na-n hana maara', sɩ naʋʋkɛ dananɩ vʋ̃ʋ n weere maar, gɩdonɩ maar n nɩnanɛ dɩ so 'lɛr n kpaanɛ, dɩ ʋrɛɛkɛ maar n kʋnɩ na hana naʋʋkɛ dananɩ bɔɔbɔa'.
19 Ado sɛr gɩ, sɩ-n naarɛ gɩdonɩ ɔr kɔɔ naan sɩ caca.
20 Ado tibil so ayɩ, ɩnɩ-n nar Thãgba, sɩ na laar ɔɔ omi, sõsodaar gɩ; gɩdonɩ ʋrɛɛkɛ na-n naannɩ ɔɔ omiikɛ a-n yɩna', mɔ̃ a na puno a na na Thãgbaakɛ aa yɩna?
21 Dɩ ɔrra sɩ 'lɛ jɔfʋʋkɛ ayɩ: Dɔ ʋrɛɛkɛ n naannɩ Thãgba a na-n na dakha ɔɔ omi.