5
1 Tibil wo tibilikɛ pɩɛrnɩ haar dɩ Jeju dʋɔn Kirisiti, Thãgba kɔnaa; dɩ tibil wo tibilikɛ n naannɩ Thãgbaakɛ n kɔnanɩ tibil, a-n nar dakha ʋrɛɛkɛ Thãgbara kɔnɩ.
2 Sɩ jɩrɛ dɩ sɩ-n nar Thãgbaa bɩsãsɔ ɔbɔɔkɛ sɩ-n nanɩ Thãgba dɩ sa-n cʋʋna ɔɔ jɔfʋ.
3 Gɩdonɩ Thãgba naar dʋɔn ɔɔ jɔfʋ hɩɩnɛ, dɩ ɔɔ jɔfʋra na khɩɩra'.
4 Gɩdonɩ ʋrɛ Thãgba kɔnɩ n punone thɩdaa; dɩ fãgaakɛ n punoneni thɩdaa dʋɔn asɩ ha pɛ.
5 Amɛ dɔ ʋrɛ n punoneni thɩdaa? Ʋrɛ dɩbara pɩɛrnɩ haar dɩ Jeju dʋɔn Thãgbaa Bikuun gɩ.
6 Ɔr dɔ Jeju Kirisitiikɛ kɔɔ ɩnanɩ na nyʋɔn na tɔmɩn, ga do nyʋɔn a ɩna dɩbara ga, sɩ nyʋɔn gɩ na tɔmɩn. Dɩ Thu Phuu dʋɔn ʋrɛɛkɛ n mɩanɩ sobɔ so jɩɩr, gɩdonɩ Thu Phuu dʋɔn sobɔr.
7 Gɩdonɩ yẽther hale n mɩanɩ sobɔ so jɩɩr:
8 Thu Phuu, nyʋɔn na tɔmɩn, dɩ wɛr yẽther dor kha nɔ bɩɛl.
9 Ado sa tu tɩbɩlaa sobɔ so jɩ, Thãgbaa sobɔ so jɩ kɔ̃tɩnɛ a jɔ gɩ, dɩ sobɔ so jɩɩrɩlera Thãgbaa thɛthɛ mɩa a pɛ ɔɔ Bikuunna.
10 Dɩ ʋrɛɛkɛ n pɩɛrnɩ haar Thãgbaa Bikuunna, a hananɛ ga sobɔ so jɩɩle ɔɔ bɩnɔ; sɩ ʋrɛɛkɛ na-n pɩɛrnɩ Thãgba haara', n cʋʋrɛ dɩɩ do sõsodaar Thãgba do, gɩdonɩ aa pɛr haar sobɔ so jɩɩrraakɛ Thãgba mɩɩnɩ a pɛr ɔɔ Bikuunna ga.
11 Dɩ hɩnɛ gɩrɛ dɔnɩ ga sobɔ so jɩɩkɛra, gɛr dʋɔn yire khorrɩkɛ Thãgba kɔɔ ha sɩnɩ, dɩ yireelera ɔɔ Bikuunna gɩ ha.
12 Ʋrɛɛkɛ hananɩ Bikuun a hananɛ yire, sɩ ʋrɛɛkɛ na hananɩ Thãgbaa Bikuuna', aa hana yirə'.
13 Mɩ khere narɛ ga thɩ̃sɔɔkɛ dɩ mɛ̃ na jɩɩ jɩ dɩ nɩ hananɛ yire khorr, nɛrɛɛkɛ n pɩɛrnɩ Thãgbaa Bikuuni i haar.
14 Tu jɩɩrɩkɛ sɩ hananɩ ɔrra dʋɔn, ado sa bɩɛlaa thɩ̃ɛ wo thɩ̃ɛ dɩɩ do ɔɔ tuur gɩ, a-n pɛ sɛr nũu.
15 Dɩ ado sɩ jɩrɛ dɩ a-n pɛ sɛr nũu thɩ̃ɛ wo thɩɛnaakɛ sɩ-n bɩɛlnɩ, sɩ jɩrɛ dɩ sɩ 'lɛr thɩ̃ dookɛra sɩ kɔɔ bɩɛlaanɩ.
16 Ado tibil yɩ ɔɔ omi dɩ cʋʋ sopugookɛ na halaanɩ na jalna khirrə ga, a bɩɛlnɛ Thãgba omi dɔɔle na 'lɛr yire. A thɩɛna gaa, wɩrɛɛkɛ na-n cʋɛnɩ sopugookɛ n halanɩ dɩɩ jalna khirrə ga mɩ so. Sopugo hale n halanɩ tibil dɩɩ jalna khirrə, ga do ga sopugoole mɩ yɩ nɩ bɩɛllɔ Thãgba ga.
17 Thɩ̃ɛ wo thɩ̃ɛ fɛʋʋkɛ na sarana', sopugo gɩ, sɩ sopugo hale na-n halanɩ tibil dɩɩ jalna khirrə ga.
18 Sɩ jɩrɛ dɩ tibil wo tibilikɛ Thãgba kɔnɩ aa-n cʋʋ sopugoə', gɩdonɩ Thãgbaa Bikuun n bɛraa, dɩ puu cʋʋ hɩ̃daar na-n thaaraa ga.
19 Sɩ jɩrɛ dɩ Thãgbaada sɩ do, sɩ thɩɩ koo puu cʋʋ hɩ̃daarɩ nyɔ̃kɔɔ gɩ ha.
20 Sɩ jɩrɛ dakha dɩ Thãgbaa Bikuun kɔɔ ɩnɛ kɛ a ha sɩ jɩɩr dɩ sa jɩna sobɔdaar; dɩ mɔ̃ sɩ hanɩ ɔɔ Bikuun Jeju Kirisitira, sobɔdaarra sɩ ha; ɔr gɩɩkɛ dɔnɩ sobɔ Thãgba a dona yire khorr.
21 Bɩsã bii, na-n jɩɛ hɩɩn, na-n ha kha dɩkha na thɩla fɩɩʋraka'.