1
1 Mɛr Sɩmɔ̃ Pɩɛrɩkɛ dɔnɩ Jeju Kirisitii thɔ̃daar na thɔ̃thɔn, thɔna sɛbɛɛkɛ a ha nɛrɛɛkɛra 'lɛnɩ ha pɛ ca bɩɛlɩkɛ ɓɔnanɩ mɔ̃kɛ sɩ 'lɛ gɩnɩ, dɩɩ the Jeju Kirisitii fɩl sarra, kɛ dɔnɩ asɩ Thãgba a dona Taadaar.
2 Thãgba na-n jɛ nɩ bʋɔra jɔɔ, a na-n hana nɩ dakha ha ɩɩ jɔɔ, mɔ̃ nɩ-n jɩnɩ ɔr Thãgba na Jeju asɩ Kɔ̃tɩ̃ dɩ ga-n pɛr.
3 Fãgaakɛ thɛnɩ ɔɔ Thãgba dora, gɛr hana sɩ thɩ̃ɛ fɛʋʋkɛ na bulo sini asɩ yi hanana na Thãgba fɩl hananɛna, gɩ the asɩ jɩraakɛ sɩ jɩnɩ ʋrɛɛkɛ kɔɔ wɛ sɩnɩ sɩ bulo kha na ɔɔ i dʋbɩ na ɔɔ bɔɔkɛ a bɔrnɩ,
4 kɛ dɔnɩ thɩ̃ɛsɔɔkɛ dɔnɩ nɔɔ dɩ ʋlfɛna sɩ ʋlfɛrɛsɔɔkɛ kɔ̃tɩnanɩ ka a ɓɔ̃ dakha ka, dɩ gɛrra na dɔ hʋɛ na yɩrɔnɩ a na debiro na do wɩrɛ na ɓananɩ kha na Thãgba ɔɔ Thãgba dora, mɔ̃ nɩ fuuni kʋɛrɛraakɛ ha pɩɛrɛ cʋʋnɩ dɩɩ lõ thɩɩraakɛ.
5 Dɩ gɛrra dɔ nɔɔ na-n gbɛ̃gbɛrɛnɛ dɩphã a hanana fɩl telẽe a dɛba anɩ ha pɛra, a hanana jɩɩr a dɛba fɩl teleena,
6 a hanana dɩbara fʋrɛ a dɛba jɩɩrra, a hanana yɩrrɛ a dɛba dɩbara fʋrɛra, a hanana Thãgba fɩlɛ a dɛba yɩrrɛra,
7 a hanana omi naar a dɛba Thãgba fɩlɛla, a hanana naʋ hulõo a dɛba omi naarra.
8 Gɩdonɩ ado ga thɩ̃sɔɔkɛ har anɩ bɩnɔ jɔɔ na too mɔlɔa', sɩ na-n cʋʋrɛ thɩ̃ɛ, na khʋɔn dakha na-n pɛr jɩɩrraakɛ nɩ jɩnɩ asɩ Kɔ̃tɩ̃ Jeju Kirisiti.
9 Sɩ ʋrɛɛkɛ na hananɩ ga thɩ̃sɔɔka', yaarʋ a do, aa-n yɩ ƴɔa', a diinəne mɔ̃ Thãgba cɔcɔgɔɔnɩ ɔɔ sopugo tɩ̃sɔ.
10 Gɛr dɔ nɔɔ ɩ̃ omisɔ, na-n bãbanɛ a cʋɛ werɩkɛ Thãgba we nɩnɩ na phiireekɛ a phiir nini gɩ jɩɩ do thɩ̃ɛ phubi. Ado na cʋʋ mɛ̃ na tharsɩ na ji kpɩɩraka'.
11 Ga dor mɛ̃ Thãgba na ha nɩ hʋɛ kpẽgelẽ dɩ na lõ asɩ Kɔ̃tɩ̃ na Taadaar Jeju Kirisitii khorr fãgadaar dɩra.
12 Gɛrra dɔ kɩrʋ dɩ ɩ̃ ƴaal ma-n khe nar wire fɛʋ ga thɩ̃sɔɔkɛ sɩɩ dorakɛ nɩ kɔɔ 'lire jɩ gar a jɩɩl kɩbɩ sobɔrraakɛ nɩ kɔɔ 'lɛnɩ.
13 Bɔɔraakɛ mɩ hanɩ gɩrɛ ɩ̃ waraakɛ, mɩ yɩɛrɛ dɩɩ bɔr dɩ ma khe nar ga thɩ̃sɔɔkɛra gɩ jaa nar,
14 mɔ̃ mɩ jɩnɩ tue gɩrɛ dɩɩ ha mɔ̃kɛra asɩ Kɔ̃tɩ̃ Jeju Kirisiti kɔɔ nɩ marnɩ, dɩ bɔɔkɛ ma thenɩ ɩ̃ warara ga hʋnɔa'.
15 Ma dor bʋɔ sɩ ɩ̃ cʋʋ thɩ̃ɛ, a mɩ kɔ̃ pɩ sɩ dɩɩ ha mɔnakɛ, sɩ na-n jɩna gɩ.
16 Ɔbɔɔkɛ sɩ kɔɔ mɩɩ nɩnɩ asɩ Kɔ̃tɩ̃ Jeju Kirisitii fãgada na ɔɔ bir ɩ̃ thɩmɩɩ, ga do kpuro nɩɛ 'lã'lã'lã sɩ kɔɔ pɛ nũu a gba a dɩɩrna na', sɩ wɩrɛ kɔɔ yɛnɩ ɔɔ wabɩ na yire sɩ do.
17 Gɩdonɩ a kɔɔ 'lɛr Thãgba Thɩrɛra cʋrɛ na i dʋbɩrɛ ɔbɔɔkɛ nʋɔ kɔɔ thenɩ carbara kʋkʋʋraale a so ayɩ: «Ʋrɛɛkɛra dʋɔn ɩ̃ Bikuunikɛ mɩ-n nanɩ, ɔr dɔ ʋrɛ lona mɩnɩ haar ka.»
18 Sɛrɛɛ thɛthɛ kɔɔ nɩɛnɛ na asɩ nũ nʋɔɔkɛ kɔɔ thɛnɩ ƴũ ɔbɔɔkɛ sɩ kɔɔ hanɩ kha na ɔr gɔ̃gɔ̃ phuurəəle.
19 Mɛ̃ sɩ jɩɩ jɩ tue gel thɩmɩɩrraakɛ Thãgbaa bobonasɔ kɔɔ mɩɩnɩ; gɩ bɔrɛ dɩ na pɛ gɩ nũu, gɩdonɩ gɩ hʋrɛ lãphãakɛ n hɩrɛnɛnɩ pa birə paar phaphapha dɩɩ n wɩl, dɩwɩl ƴepələ̃bire n phã anɩ hara.
20 Sɩ caca thɩ̃ɛ, dɔ nɩ jɩ dɩ tibil na puno na ɔɔ thɛthɛɛ kpɩɛr na ti Thãgbaa bobonɩ thɩmɩɩkɛ kherenenɩɩ kɩra';
21 gɩdonɩ Thãgbaa bobonɩ thɩmɩɩkɛ kɔɔ thɛnɩ, ga do mɔ̃ tibili ƴaal hanɩ mɛ̃ gɩ kɔɔ ha kpɩɩraka', sɩ Thu Phuu kɔɔ cʋɛ tɩbɩla dɩ wɩ kɔɔ mɩɩ thɩmɩɩrɩkɛ thɛnɩ Thãgbaa pa.