2
1 Mamara sõso bobona kɔɔ hale tɩbɩlaa thɩ̃thɩɩn, mɛna gɩ sõso dɩɩrdara na wolone na lõ anɩ thɩ̃thɩɩn na sõso dɩɩrɛɛkɛ na bũburoneni tibil. Wa bor Kɔ̃tɩnɩkɛ kɔɔ thɛ wɩnɩ dɩ wa gbaar bũburoneekɛ na phuroneni tibil dapaara a na heen dɩbara.
2 Tibil jɔjʋɔ na kpar awɩ dakhaba thɔna, dɩ wɛr na dɔ nɔɔ dɩ tɩbɩla na mɩɩ dapuu wa-n pɛ sobɔ hʋɛra.
3 Ha pɩɛrɛ na cʋʋ wɛr dɩ wa gba sõso thɩmɩɩr wɩ fɩɩlna nɩ wa-n 'lɛrɔ khor; sɩ gɩ maanɛ awɩ so heen hanɩ gbɛbɩrɔ, dɩ awɩ bũburõ ga do gɩ phɩnɛ daara'.
4 Gɩdonɩ Thãgba na kɔɔ sɩ thɔ̃thɔ̃daar thusɔraakɛ kɔɔ cʋɛnɩ sopugoə', sɩ a kɔɔ fʋlɛ wɛr, a li a faa kõkor huloona dabirə paar tĩtĩtĩ gɩ dana kɩɩl wire.
5 Aa kɔɔ sɩrɔ dakha mama thɩa', sɩ a kɔɔ cʋʋrɛ yɔ kɔ̃tɩ̃ɩ dɩɩ phã a thii tɩbɩla fɛʋʋkɛ na-n theranaana'; Noe dɩbara, kɛ n kɔɔ mɩanɩ tɩbɩla fɩl sar thɩmɩɩr, a kɔɔ taa na wɩ̃ tibil makonyɔ.
6 Dɩ dakha a kɔɔ heene Sɔdɔm na Gɔmɔɔrdara bũburõ so heene a thii wi na dɔɔ, a gba gɩ gɩrɛ da-n dɩɩrna wɩrɛ na-n theranaana' gɩrɛ na dana wɩnɩ.
7 A kɔɔ taarɛ dakha Lɔtɩ tɩɩ sarʋʋkɛ haar n helnɩ tɩɩ khabaasɔɔ cʋʋ pa kpalaale;
8 kũu sarʋʋlera kɔɔ hanɩ awɩ thɩ̃thɩɩn, wire fɛʋ haar n heluu gɩdonɩ tɩɩ sarʋ a do, sɩ da-n yɩ awɩ cʋʋ pa puu da-n nɩɛna ga thɩmɩɩ dakha.
9 Wɩrɛ n cʋɔnnɩ Kɔ̃tɩn a-n jɩ gɛr da-n taa wɩ bɔ gaarɛra, sɩ dɩ thɩɩn wɩrɛ na sarana', a heen wɩ sor kɩɩl wirera.
10 Wɩrɛ n bɔnɩ dɩ wa-n ɩɩrna thɩ̃ puu ƴaalɛɛkɛ n kɔnɩ awɩ tibil do pa thue, dɩ wa-n beesina dakha fãgaakɛ pɩɛrnɩ, wɛr ga bo na ɩɩrɔ. Sõso dɩɩrdaraale wɩ-n 'lar ka, wɩ gbɩllɛ, maar na-n kʋ wɩ ƴũ fãgadarasɔɔ kpɛra ga;
11 sɩ thɔ̃thɔ̃daar thusɔɔkɛrakɛ hananɩ fãga na punone a jɔ wɩ, na tu na pɛ ƴũ fãgadarasɔɔle sor na kpɛɩ Kɔ̃tɩnɩ ƴɛra ga.
12 Sɩ tibil ca wele wɩ hʋrɛ lɩɔ̃ nʋnɩaakɛ na hananɩ yʋa', kɛ wɩ kɔnɩ wɩ fɔ a na kɔ; wɩ-n kpɛr gɩrɛɛkɛ wa jɩna', nʋ̃ khaara wa bũburõ.
13 Wa 'lɛr bɔ gaarɛ gɩdonɩ mɛ̃ wɩ-n gaar tɩbɩla. Gɩrɛ n daan warnɩ dʋɔn wɩ tɔɔ gbelẽ gbelẽ a na cʋɛ puureekɛ n kɔ wɩnɩ thue. Jɩɩn tɩbɩla wɛ a khã; mɔ̃ wɩ-n hanɩ anɩ fɛtɩ cʋʋ pa dɩ wa-n fɩɩl nɩ gɩ-n da warɛ ka.
14 Khɛ kpɩɩ ƴaal ƴɩɛ wɩ hana; wa-n hi sopugo cʋʋra'; wɩ-n fɩɩlɛ dakha tɩbɩlaakɛ na tɩɛnna'; ha pɩɛrɛ hi wer bɩnɔ; tɩbɩlaakɛ hanɩ sʋɔnna wɩ do.
15 Mɔ̃ wɩ faanɩ hʋ telẽe pɩ, wɩ buure dɩ wa-n kpaan Balam Bewɔɔrɩ bikuuni hʋra, kɛ kɔɔ naannɩ gõgolõ lɩmɩnɛ.
16 Sɩ a kɔɔ caananɛ phaanɛ ɔɔ puu cʋʋrara. Kũkə̃əkɛ na-n mɩanɩ nʋɔa', sɩ a kɔɔ mɩɩraarɛ thɩmɩɩr tibil khaa dɩɩ cʋʋ bobon də̃bəl dɩ jɩɩl.
17 Tɩbɩlaale hor yɔ bu kanaakɛ na-n hananɩ nyʋɔna'; wɩ hor dakha thãgbaakɛ n jonanɩ sɩ dɩ jɩɛ n ti gi; pa hulõ paarɩkɛ birəneni tĩtĩtĩ Thãgba thɩɩn khorr dɩ ga-n pɩɛr wɩ.
18 I ƴaal thɩmɩa na nɔfaar n thɛ wɩ nɔɔ. Thɩ̃ puukɛ n kɔnɩ tibil thue, kɛ dɔnɩ dakhaba thɔma wɩ gba dɩ wa-n fɩɩlna tɩbɩlaakɛ fuonni fuu phaa a the sa faa wɩrɛ hanɩ sõsorra.
19 Dɩ wɩ-n so warɛ dɩ wɩ yɩ, ɩna cʋʋ wɛr dɩ wa do waɩa, sɩɩ do wɛr thɛthɛ dea wɩ do thɩɛnaakɛ na kʋɛa wɩnɩ, gɩdonɩ tibil n dor dee thɩɛnaakɛ jʋɔraanɩ.
20 Ado tɩbɩla fuu thɩɩkɛɛdaraakɛ n biseneni tibil pɩ, mɔ̃ wɩ jɩnɩ asɩ Kɔ̃tɩ̃ na Taadaar Jeju Kirisiti, sɩ ado wɩ bir lõ ga thɩnaale dɩɩ puno wi, awɩ pɩpɩɩ pa na puurore a na jɔ cacadaa.
21 Mɔ̃kɛ wɩ jɩnɩ jɔfʋ phuukɛ Thãgba kɔɔ ha wɩnɩ sa gba faa, gɩ ka baarrakɛ ado wa ka kɔɔ jɩ fɩl sar hʋɛa'.
22 Gɩ dã warɛ waa mɔ̃kɛ sobɔ sokpaara hanɩ ger kɛ sɔnɩ ayɩ: «Bɩɩn n fire dɩ kho gɩrɛ a kɔɔ kpeenɩ», dakha wo: «Sɩthookɛ wɩ-n cɔcɔɔnɩ n bire dapaara dɩ bɩɩr pɔɔsɔ.»